ދެކުނު ކޮރެއާގެ ރައީސް ޔޫން ސުކް ޔޮލްގެ އަސްކަރީ ގާނޫނާ ގުޅިގެން އެ ގައުމުގެ ފުލުހުން ރިޔާސީ އޮފީހަށް ވަދެއްޖެއެވެ.
ރިޔާސީ އޮފީހަށް ފުލުހުން ވަދެފައިވާއިރު، އަސްކަރީ ގާނޫނު ތަންފީޒުކުރުމުގައި ބައިވެރިވެވަޑައިގަތް ކަމަށް ތުހުމަތުކޮށް އެ ގައުމުގެ ކުރީގެ ދިފާއީ ވަޒީރު ކިމް ޔޮންގް ހިޔުންއާއި އިތުރު ސީނިއާ އޮފިޝަލުން ވެސް ވަނީ ހައްޔަރުކޮށްފައެވެ.
ކިމް ހައްޔަރުކޮށްފައިވަނީ ޕީޖީންގެ އެދުމުގެ މަތިން ސޯލް ސެންޓްރަލް ޑިސްޓްރިކްޓް ކޯޓުން އަމުރެއް ނެރެގެން މިދިޔަ ބުދަ ދުވަހުއެވެ.
ކޮރެއާގެ ނޭޝަނަލް ޕޮލިސް އެޖެންސީގެ ކޮމިޝަނަރު ޖެނެރަލް ޗޯ ޖީ ހޯއާއި ސޯލް މެޓްރޮޕޮލިޓަން ޕޮލިސް އެޖެންސީގެ ވެރިޔާ ކިމް ބޮންގް ސިކް ވެސް ވަނީ އެ ތުހުމަތުގައި ހައްޔަރުކޮށްފައެވެ.
މިއީ އޭޝިއާގެ ހަތަރުވަނައަށް އެންމެ ބޮޑު އިގުތިސާދު އޮންނަ ދެކުނު ކޮރެއާއަށް މި ފަހުން ކުރިމަތިވި ސިޔާސީ އެންމެ ބޮޑު އެއް ގޮންޖެހުމެވެ. މި މައްސަލައާ ގުޅޭ އެންމެ ފަހުގެ މައުލޫމާތަށް ބަލާއިރު، އިދިކޮޅު ޑިމޮކްރެޓިކް ޕާޓީ އަނެއްކާ ވެސް އަންނަނީ ޔޫން ވެރިކަމުގެ ދުރުކުރުމަށް އެ މަނިކުފާނުގެ އިތުބާރު ނެތްކަމުގެ މައްސަލަ ގާނޫނޫ ހަދާ މަޖިލީހަށް ހުށައެޅުމަށް ތައްޔާރުވަމުންނެވެ.
ޔޫންގެ އިތުބާރު ނެތްކަމުގެ މައްސަލަ ހުށަހަޅައިގެން މަގާމުން ވަކިކުރަން އިދިކޮޅުން ފުރަތަމަ ކުރި މަސައްކަތް ނާކާމިޔާބުވީ ޔޫންގެ ޕީޕަލް ޕަވާ ޕާޓީ (ޕީޕީޕީ)ގެ ތިން މެންބަރުން ފިޔަވައި އެހެން ހުރިހާ މެމްބަރުން ހޮނިހިރު ދުވަހު ބޭއްވި ޖަލްސާގައި ވޯޓު ބޮއިކޮޓްކުރުމުންނެވެ.
އެ މައްސަލައިގައި ޔޫން ގައުމުން ބޭރަށް ވަޑައިގަތުން ވެސް ވަނީ މަނާކޮށްފައެވެ.
އަންގާރަ ދުވަހު ގައުމީ މަޖިލީހުން ވަނީ ޔޫންއާއި އެހެން އިސް އޮފިޝަލުން ތަހުގީގުކުރުމަށް މިނިވަން ޚާއްސަ ކައުންސެލެއް އައްޔަންކުރުމަށް ބިލެއް ފާސްކޮށްފައެވެ.
މި މަހުގެ ތިންވަނަ ދުވަހު ޔޫން އަސްކަރީ ގާނޫނު އިއުލާނުކުރެއްވީ އިދިކޮޅުން ބަޣާވާތެއް ކުރަން އުޅޭ ކަމަށާއި އުތުރު ކޮރެއާއާ ގުޅިގެން މަސައްކަތް ކުރާ ކަމަށް ތުހުމަތު ކުރައްވައެވެ. ނަމަވެސް، ގާނޫނު ހަދާ މަޖިލީހުން ފާސްނުވުމުން އަސްކަރީ ގާނޫނު ދެތިން ގަޑިއިރުތެރޭގައި ވަނީ އަނބުރާ ގެންގޮސްފައެވެ.