ސަރުކާރުގެ މަސް ކުންފުނި، މިފްކޯއިން ދެކެން ބޭނުންވަނީ ދިވެހި މަސްވެރިން ބާނާމަހުގެ އަގު، އެ މަސްވެރިން ކަނޑައަޅާ ދުވަސް ކަމަށް އެ ކުންފުނިން މިއަދު ބުނެފިއެވެ.
އެސްއެސްޓީވީގެ ބާރު ހަތަރެއް ޕްރޮގްރާމުގައި ވާހަކަ ދައްކަވަމުން މިފްކޯގެ ޕަބްލިކް ރިލޭޝަންސްގެ ޑެޕިއުޓީ މެނޭޖަރު އިބްރާހީމް ސައީދު (ކޭޑު) ވިދާޅުވީ މަސްވެރިން ބާނާ މަހުގެ އަގު އެ މީހުން އަމިއްލައަށް ކަނޑައަޅައިގެން ކުރިޔަށް ދެވެން އޮތީ، މިފްކޯގެ ކެޕޭސިޓީ ފުޅާ ކުރުމުގެ ޕްރޮޖެކްޓުތައް ވަރަށް ބާރު ދުވެލީގައި ކުރިޔަށް ގޮސްގެން ކަމަށެވެ.
އޭނާ ވިދާޅުވި ގޮތުގައި މިފްކޯއިން މަސައްކަތް ކުރަނީ ވީހާ ވެސް އަވަހަކަށް މަސް އެކްސްޕޯޓުކޮށް، އެއަށްވާ ފައިސާ ހޯދުމަށް ފަހު މަސްވެރިންނަށް އެ ފައިސާ ދެވޭތޯއެވެ. އެހެން ނަމަވެސް ސައީދު ވިދާޅުވީ މިއީ މިފްކޯގެ އަމާޒު ނޫން ކަމަށެވެ.
"...[މަސް] ގިނައިން ލިބުނީމާ ކެރިއަރު ގެނެސްގެން އަވަހަށް އޭތި އޮތް ތަނަކަށް ފޮނުވައިގެން ލިބެން އޮތް އަގެއް އަވަހަށް ހޯދައިގެން މަސްވެރިންނަށް ދެވޭތޯ. އެކަމަކު މީއެއް ނޫނޭ އަޅުގަނޑުމެން ބޭނުންވާ އަމާޒަކީ. އަޅުގަނޑުމެން ބޭނުންވަނީ ދިވެހީންގެ ކަނޑު މަހުގެ އަގު ކަނޑައަޅާނީ ދިވެހީންނޭ ބުނާ ދުވަހެއް،" އޭނާ ވިދާޅުވިއެވެ.
ސައީދު ވިދާޅުވި ގޮތުގައި، ރައީސް ޑރ. މުހައްމަދު މުއިއްޒުގެ ސަރުކާރުން މަސައްކަތް ކުރައްވަނީ މިފްކޯގެ ފެކްޓަރީއަށް ބޭރުގެ ފަރާތްތަކުން އައިސް މަސް ގަނެވޭނެ އިންތިޒާމް ހަމަޖެއްސުމަށެވެ.
އެއްވެސް ދަތިކަމެއް ނެތި މިފްކޯގެ އޮޕަރޭޝަން މިހާރު އޮތް ގޮތަށް ކުރިޔަށް ގެންދެވޭނެ ކަމަށް ވިދާޅުވެ، އޭނާ އެދިވަޑައިތީ އެ ކުންފުނީގެ މަސައްކަތުގައި ވީހާ ވެސް ގިނަ ފަރާތްތަކަކުން އެއްބާރުލުން ދިނުމަށެވެ.
އެ މަގުން ކުރިޔަށްދާ ނަމަ، ދިވެހި މަސްވެރީން ބާނާ ކަނޑުމަހުގެ އަގު ކަނޑައަޅާނީ ސީދާ އެ މީހުން ކަމަށް އޭނާ ވިދާޅުވިއެވެ.
މަސްވެރިން ބާނާ މަސް މިފްކޯއަށް ކިރުމުގައި ވެސް ދިމާވާ އެންމެ ބޮޑު ދައްޗަކީ އެ ކުންފުންޏަށް ނުތަކާ ވަރަށް މަސްވެރިކަމުގެ ސިނާއަތް ފުޅާވެގެން ދިއުމެވެ. އެ ގޮތުން އެ ކުންފުނިން އެންމެ އިސްކަމެއް ދީގެން ކުރަމުން އަންނަ އެއް މަސައްކަތަކީ، މަސް ރައްކާ ކުރުމާއި، ޕްރޮސެސް ކުރުމުގެ ކެޕޭސިޓީ އިތުރު ކުރުމެވެ.
މިދިޔަ އަހަރުގެ ސެޕްޓެމްބަރު މަހު ރިޔާސީ އިންތިޚާބުގެ ދެވަނަ ބުރުގެ ކެމްޕެއިން ދުވަސްކޮޅު އޭރު އޮތް ސަރުކާރުން މަސް ގަންނަ އަގު 17 ރުފިޔާއިން 25 ރުފިޔާއަށް ބޮޑުކުރިއެވެ. ނަމަވެސް، މިދިޔަ ފެބްރުއަރީ މަހު މި ސަރުކާރުން އެ އަގު 20އަށް ދަށްކުރަން ނިންމިއެވެ.
މަސް ކިލޯއެއްގެ އަގު 20 ރުފިޔާއަށް ވުރެ ދަށް ނުކުރުމަކީ ރައީސްގެ ވައުދުފުޅެކެވެ. ނަމަވެސް މާކެޓު އަގަށް ރިއާޔަތްނުކޮށް މަސްވެރިންގެ އަތުން މަސްގަނެ ޕްރޮސެސްކޮށް އެކްސްޕޯޓުކުރަމުން ދިއުމަކީ މާލީގޮތުން ދެމެހެއްޓެނިވި ކަމެއްނޫން ކަމަށް ބުނެ، މިދިޔަ ޖޫން މަހު މިފްކޯއިން ވަނީ ބައިނަލްއަގުވާމީ ބާޒާރުގެ އަގަށް މަސް ގަންނަން ފަށައިފައެވެ.
މަސްވެރިން ބާނާ މަހަށް 48 ގަޑިއިރުގެ ތެރޭގައި ފައިސާ ދިނުމަކީ ވެސް ރައީސް މުއިއްޒުގެ ވައުދުފުޅެކެވެ.
އެ ވައުދު ނުފުއްދި، މަސްވެރިންނަށް ފައިސާ ދިނުން ލަސްވާތީ މީގެ ކުރިން މަސްވެރިން އިހުތިޖާޖުކޮށްފައިވެއެވެ. ނަމަވެސް އެ ވައުދުގެ ދަށުން މިއަދުވަނީ މަސްވެރިންނަށް ފުރަތަމަ ޕޭމަންޓު ޖަމާކޮށްދީފައެވެ. ފިޝަރީޒް މިނިސްޓަރު އަހުމަދު ޝިޔާމް ވިދާޅުވި ގޮތުގައި އެއީ މިދިޔަ އާދިއްތަ ދުވަހު މަސްވެރިން ކިރި މަހަށްވާ 2.04 މިލިއަން ރުފިޔާއެވެ.