ޓެލްއަވީވު (10 ޑިސެންބަރު 2024) : ސޫރިޔާގެ އިދިކޮޅު ހަނގުރާމަ ވެރިން ވެރިރަށް ދިމިޝްގަށް އެރުމާއެކު ރައީސް ބައްޝާރުލް އަސަދުގެ ވެރިކަން ނިމުމަކަށް އައި ދަނޑިވަޅު ބަލާފައި ސޫރިޔާއަށް ވައިގެ ވަރުގަދަ ހަމަލާތަކެއްދީ ސޫރިޔާގެ އަސްކަރިއްޔާއަށް ބޮޑެތި ގެއްލުންތަކެއް ދެވިއްޖެ ކަމަށް އިސްރާއީލު ބުނެފިއެވެ.
އިސްރާއީލު ސިފައިންގެ ރޭޑިއޯ ބުނިގޮތުގައި ފާއިތުވި ތިންދުވަހު ތެރޭގައި ސޫރިޔާގެ 250 އަށް ވުރެ ގިނަ ތަންތަނަށް އިސްރާއީލު ވަނީ މިސައިލުންނާއި ފައިޓާޖެޓްތަކުން 300 އަށްވުރެ ގިނަ ހަމަލާދީ އެތަންތަން ހަލާކުކޮށް ބިމާހަމަކޮށްލުމުގައި ކާމިޔާބު ހޯދާފައެވެ.
ސޫރިޔާގެ އަސްކަރީ ބާރުތައް ފުނޑުފުނޑުކޮށްލުމަށް މި ދިން ހަމަލާތަކަކީ އިސްރާއީލުގެ މުޅި ތާރީޚުގައިވެސް ހިންގި އެންމެ ކާމިޔާބު އަދި އެންމެ ބޮޑު ވައިގެ އޮޕަރޭޝަން ކަމަށް އިސްރާއީލު ސިފައިންގެ ކޮމާންޑާ އިން ޗީފް އާ ހަވާލާދީ އިސްރާއީލު ސިފައިންގެ ރޭޑިއޯ ބުނެއެވެ.
ބައްޝާރުގެ ވެރިކަން ވެއްޓި ސޫރިޔާގެ އިދިކޮޅު ފަރާތްތަކަށް ހިންދެމިލުމުގެ ވަގުތު ނުލިބެނީސް މިހަމަލާތައް ދެވުމުން ސޫރިޔާގެ ފަރާތުން އިސްރާއީލަށް ރައްދު އެއްވެސް ހަމަލާއެއް އައިސްފައިނުވާ ކަމަށާއި މިއީ ދަނޑިވަޅު ބަލާފައި ތަންފީޒު ކޮށްލެވުނު ވަރަށް ސްޓްރެޓީޖިކް މޮޅު ރޭވުމެއްކަމަށްވެސް އިސްރާއީލު ސިފައިންގެ ރޭޑިއޯ ބުނެފައިވެއެވެ.
އިސްރާއީލު ހަމަލާދިން ސޫރިޔާގެ އަސްކަރީ ތަންތަނުގެ ތެރޭގައި ފައިޓާޖެޓްތަކާއި ހަނގުރާމަ މަތީ މަނަވަރުތަކާއި ވައިގެ ބޭސްތަކުގެ އިތުރުން ސައެންޓިފިކް ރީސާޗް ސެންޓަރުތަކަށާއި ހަތިޔާރު އުފެއްދުމަށް މަސައްކަތްކުރާ ޢަސްކަރީ ކާރުޚާނާ ތަކާއި އަސްކަރީ ޓެކްނޮލޮޖީގެ ދިރާސާ މަރުކަޒުތައްވެސް ހިމެނޭ ކަމަށާއި މިއީ ވަރަށް ކާމިޔާބު އަދި ފަޚުރުވެރި މަސައްކަތްތަކެއް ކަމަށް އިސްރާއީލު ސިފައިންގެ ރޭޑިއޯ ބުނެފައިވެއެވެ.
އިސްރާއީލުން ސޫރިޔާއަށް ދެމުންގެންދާ ހަމަލާތައް
ސޫރިޔާގެ ރައީސް ބައްޝާރުލްއަސަދުގެ ވެރިކަން ވެއްޓުނުތާ މިވީ ހަތަރު ދުވަހުގެ ތެރޭގައި އިސްރާއީލުގެ ފައިޓާ ޖެޓްތަކުން ގެންދަނީ ސޫރިޔާގެ އެތަން މިތަނަށް ބޮން އަޅަމުންނެވެ. ވެރިރަށް ދިމިޝްގާއި ދިމިޝްގުގެ ވަށައިގެންވާ ސަރަހައްދުތަކަށާއި ސޫރިޔާގެ ދުރުހިސާބުތަކުގައިވާ އަސްކަރީ މަރުކަޒުތަކާއި ހަތިޔާރު އުފައްދާ ކާރުޚާނާތަކަށްވެސް ބޮމުގެ ވާރޭ ވެއްސަމުންނެވެ.
ސޫރިޔާއިން އިސްރާއީލަށް އެންމެ ހަމަލާ އެއް ނުދޭއިރުވެސް އަދި ދޭ ހަމަލާއަކަށް ރައްދު ނުދެވޭ އިރުވެސް އިސްރާއީލު ގެންދަނީ ރެއާއި ދުވާލު ސޫރިޔާއަށް ގަދަފަދަ ހަމަލާތައް ދީ މުޅި ގައުމު ސުންނާފަތި ކުރަމުންނެވެ. ބައްޝާރުގެ ވެރިކަން ވެއްޓުމާއެކު ސޫރިޔާގެ ސިފައިންގެ ލަޝްކަރުތައް ހައިރާން ކަމެއްގެ ތެރޭގައިވާއިރު އިދިކޮޅުން ގެންދަނީ ބައްޝާރުގެ ސަރުކާރުގެ ބޮޑުވަޒީރާ އަދި ވަޒީރުންނާ ވާހަކަ ދައްކައި ވެރިކަން ނަގުލު ކުރުމުގެ މަސައްކަތް ކުރަމުންނެވެ.
އެހެންކަމުން ސޫރިޔާ މިވަގުތު މިއޮތީ ވަރަށް ހައްސާސް ހާލަތެއްގައެވެ. ސޫރިޔާ އޮތީ މިފަދަ ހަމަލާއަކަށް ސަމާލު ވެވޭ ހާލަތެއް ގައެއް ނޫނެވެ. ގިނަ ބަޔަކު ތިބީ ބައްޝާރުގެ ވެރިކަން ވައްޓާލެވުމުގެ އުފަލުގައެެވެ. މިދަނޑިވަޅު ބަލާފައި އިސްރާއީލު މިފެށީ ސޫރިޔާގެ އިލްމީ މުމައްސަސާތަކާއި އަސްކަރިއްޔާ އެއްކޮށް ފުނޑާލުމުގެ ޖަރީމާތަކެވެ.
އިސްރާއީލު ސިފައިންގެ ރޭޑިއޯ ބުނާގޮތުން ސަތޭކަ ވަރަކަށް ބިލިޔަން ޑޮލަރުގެ ގެއްލުން ފާއިތުވި ތިން ދުވަސް ތެރޭގައި އިސްރާއީލުން ވަނީ ސޫރިޔާގެ އަސްކަރިއްޔާއަށް ދީފައެވެ. މިކަމާމެދު ފަޚުރުވެރިވާ ކަމަށްވެސް އިސްރާއީލު ސިފައިންގެ އިސްވެރިންނާ ހަވާލަދީ ސިފައިންގެ ރޭޑިއޯ ބުނެއެވެ. އިސްރާއީލުގެ މި ޖަރީމާތައް އެމެރިކާވެސް އަދި ޔޫރަޕްގެ ގައުމުތަކަށް އެނގޭކަމަށްވެސް ހަދާފައެއް ނުވެއެވެ. ހުޅަނގުގެ މި ގައުމުތަކުން ދައްކަނީ ބައްޝާރުގެ އަނިޔާވެރި ކަމުގެ ވާހަކަތަކާއި އީރާނާއި ހިޒްބުﷲ އާ ދެމެދުގައިވާ ސަޕްލައި ކަނޑާލެވުނު ވާހަކަތަކެވެ.
އަލްޖަޒީރާގައި ވާހަކަ ދެއްކެވި މުހައްލިލުން ވަނީ މިއީ 1991 ވަނަ އަހަރު އިރާގު ސިފައިން ކުވައިތަށް އެރުމުން ކުވައިތު މިނިވަން ކުރުމުގެ ނަމުގައި އެމެރިކާ ފެށި ހަނގުރާމައިގައި އިރާގުގެ މުޅި ލަޝްކަރުތައް ފުނޑާލިގޮތަށް އިސްރާއީލު ކުރި ކަމެއްކަމަށް ސިފަކުރައްވާފައެވެ.
ކުވައިތު މިނިވަން ކުރުމުގެ ނަމުގައި އެމެރިކާ ހަނގުރާމަ ފެށުމާއެކު ކުވައިތުގައި ތިބި އިރާގު ސިފައިން އެމެރިކާއަށް އަމާންދިނެވެ. މިއާއެކު އެމެރިކާ ވަނީ ކުވައިތުން ފާބައިގެން ދިޔުމަށް އިރާގު ސިފައިންނަށް ފުރުސަތު ދީފައެވެ. ނަމަވެސް ފުރުސަތު ދީފައި އެމެރިކާ ހެދި ގޮތަކީ އިރާގު ސިފައިން ބަރު ހަތިޔާރާއެކު ކުވައިތުން ފައިބަމުން ދާން ފެށުމުން އެ މީހުން ދަތުރުކުރި މަގުތަކަށް ބޮންއަޅައި އިރާގުގެ ބަރުހަތިޔާރުތައް ހަލާކުކޮށް އިރާގު ސިފައިންގެ 80 ހާހަށް ވުރެ ގިނަ ސިފައިން މަރާލައި އަދި އެތައް ހާސް ބަޔަކު ޒަޚަމްކޮށްލާފައެވެ.
މިއީ އިރާގު ސިފައިން ސަލާމަތުން ތިބެއްޖެނަމަ އިރާގު ބާރުގަދަ ގައުމެއްގެ ގޮތުގައި އޮވެދާނެތީ ދަނޑިވަޅު ބަލާފައި އިރާގު ބަލިކަށިކޮށްލަން އެމެރިކާ ހިންގި ހަނގުރާމައިގެ ޖަރީމާތަކެއްކަމަށް އަލްޖަޒީރާގެ މުހައްލިލުން ސިފަކުރެއްވިއެވެ. އެމެރިކާގެ މި ހަމަލާތައް ހަނގުރާމައިގެ ޖަރީމާއަކަށް ވަނީ އިރާގު ސިފައިން އަމާން ދިނުމަށްފަހު އަނބުރައި އިރާގަށް ދިޔަ މަގުމަތީގައި އެ މީހުންނަށް ހަމަލާދީ މީހުން އެ މީހުން މެރުންކަމަށް އަލްޖަޒީރާގެ މުހައްލިލުން ވިދާޅުވިއެވެ.