ރައީސް ޑރ. މުހައްމަދު މުއިއްޒަށް ހައްދަވަން ޖެހޭނީ ކުރީގެ ރައީސް މުހައްމަދު އަމީން ދީދީއަށް ހެއްދެވި ގޮތް ކަމަށް ވިދާޅުވެ، އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް ދެއްކެވީ ޓެރަރިޒަމަށް ހިތްވަރުދޭ ފަދަ ވާހަކަތަކެއް ކަމަށާއި އެހެންކަމުން އެ މައްސަލަ ބެލުމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ގޮވާލައްވައިފިއެވެ.
އެމްޑީޕީއިން އިއްޔެ ހަވީރު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ފައްޔާޒު ވަނީ "އަނިޔާވެރިވެއްޖެ ނަމަ އަނިޔާވެރިވާނެ" ކަމަށް ވިދާޅުވެފައެވެ. އަދި އަނިޔާވެރިވާނަމަ، ތާރީޚުގެ ފޮތްތަކުން ރާއްޖޭގެ ރައްޔިތުން "ކުޅޭނެ" ކަމަށް ވެސް ވިދާޅުވެފައެވެ.
ފައްޔާޒު އެފަދައިން ވިދާޅުވީ ހދ. ކުޅުދުއްފުށީގައި އެމްޑީޕީއިން މިފަހުން ބޭއްވި ޖަލްސާއެއްގައި ކުރީގެ ރައީސް މުހައްމަދު އަމީނާ ގުޅޭ ގޮތުން މީހަކު ދެއްކި ވާހަކައަކާ ގުޅިގެންނެވެ.
އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް -- ފޮޮޓޯ/ އެމްޑީޕީ
"އެހެންވީމަ މުހައްމަދު އަމީނެއް ކަމެއް، އަނދިރި އަނދިރިން ކަމެއް ނޭނގެ. ރައްޔިތުންނަށް އަނިޔާވެރިނުވާށޭ [މި ގޮވާލަނީ]. އަނިޔާވެރިވާނަމަ ތާރީޚުގެ ފޮތްތަކުން ރާއްޖޭގެ ރައްޔިތުން ކުޅޭނޭ،" ފައްޔާޒު ވިދާޅުވިއެވެ.
އެ މައްސަލަ ހޫނުވެ، މިއަދު މަޖިލީހަށް ވެސް ވަނީ ކުއްލި މައްސަލައެއް ހުށަހަޅާފައެވެ.
އެކަމާ ގުޅިގެން އެކްސްގައި ކުރެއްވި ޕޯސްޓެއްގައި ސަރުކާރު މައި ޕާޓީ ޕީއެމްސީގެ ޗެއާޕާސަންކަން ވެސް ކުރައްވާ އަބްދުއްރަހީމް ވިދާޅުވީ އެ އަމަލަކީ ކަނޑައެޅިގެން ޓެރަރިޒަމަށް ހިތްވަރުދިނުން ކަމަށެވެ. އަދި އެއީ ކަމާ ގުޅޭ މުއައްސަސާތަކުން ވަރަށް ސީރިއަސްކަމާއެކު ވަގުތުން ބަލަންޖެހޭ ކަމެއްކަމަށް އެ މަނިކުފާނު ވިދާޅުވިއެވެ.
އަމުދުން އިދިކޮޅު ސިޔާސީ ޕާޓީގެ އެންމެ އިސް މަގާމުގައި ހުންނެވި ބޭފުޅަކު އެފަދަ ވާހަކައެއް ދެއްކުމަކީ އާދައިގެ ކަމެއް ކަމަށް ބަލައިގެން ނުވާނެ ކަމަށް އެމަނިކުފާނު ވިދާޅުވިއެވެ.
ފައްޔާޒުގެ އެ ވާހަކައާ ގުޅިގެން ޕީއެންސީގެ މެންބަރުން ގެންދަވަނީ ތަކުރާރުކޮށް ފައްޔާޒުގެ ވާހަކަތައް ބަލާ ތަހުގީގުކުރުމަށް ގޮވާލަމުންނެވެ. އަދި ފައްޔާޒާ މެދު ފިޔަވަޅު އެޅުމަށް ވެސް ބައެއް މެންބަރުން ވަނީ ގޮވާލާފައެވެ.
އެ މައްސަލަ ސަރުކާރުގެ ސަމާލުކަމަށް ގެނައުމަށް މިއަދު ހުށަހެޅި ކުއްލި މައްސަލައިގައި ބުނެފައި ވަނީ ޓެރަރިޒަމްގެ އަމަލެއް ކުރުމަށް ހިތްވަރުދީ އެކިއެކި ޕޯޑިއަމްތަކުގައި އެމްޑީޕީން ވާހަކަދައްކަމުންދާ ކަމަށެވެ. އަދި ޓެރަރިޒަމްގެ ގާނޫނުގެ ދަށުން ނުސީދާކޮށް ނަމަވެސް، ޓެރަރިޒަމްގެ އަމަލެއް ކުރުމަކީ ކުށެއް ކަމުގައި ބަޔާންކޮށްފައިވާ ކަމަށާއި އަދި އެފަދަ އަމަލެއްކުރުން ގާނޫނުގެ ދަށުން މަނާވާނެކަން އެ މައްސަލާގައި ވަނީ ފާހަގަކޮށްފައެވެ.
އަދި އެފަދަ ވާހަކައެއް ފެތުރުމަކީ ވަކި ސިޔާސީ ފިކުރެއް ކުރިއަރުވަން ކުރާ ކަމެއް ކަމަށް އެ މައްސަލާގައި ވަނީ ފާހަގަކޮށްފައެވެ. ހަމައެއާއެކު އާންމުންގެ ތެރެއިން ބައެއްގެ ހިތްތަކުގައި ބިރުވެރިކަން އުފެއްދުމަށާއި އެހެން މީހެއްގެ ފުރާނައަށް ނުރައްކާވާ ފަދަ އެ އަމަލު، ކުށްވެރިކުރައްވާކަމަށް އެ މައްސަލައިގައިވެއެވެ.