ބޮލީވުޑްގެ އެކްޓަރު ރަންބީރު ކަޕޫރުގެ ކެރިއަރުގެ އެންމެ ބޮޑު ކާމިޔާބީއެއް ހޯދި ފިލްމު "އެނިމަލް"ގެ ދެވަނަ ފިލްމުގެ މަސައްކަތް ކުރިއަށްދާ ކަމަށާއި ފިލްމުގެ ވިލެންއަކީ ވެސް ރަންބީރު ކަމަށް އެކްޓަރު ބުނެފިއެވެ.
ސަޢުދީ ޢަރަބިއްޔާގައި ކުރިއަށްދާ ރެޑް ސީ އިންޓަނޭޝަނަލް ފިލްމު ފެސްޓިވަލުގެ ތެރެއިން މުނިފޫހިފިލުވުމުގެ ދާއިރާގެ ޚަބަރުތައް ގެނެސްދޭ ޑެޑްލައިން ނޫހަށް ދިން އިންޓަވިއުގައި ރަންބީރު ބުނެފައިވަނީ, ފިލްމު "އެނިމަލް" ގެނެސްދޭން ނިންމާފައިވަނީ ތިން ބަޔަކަށް ބަހާލައިގެން ކަމަށެވެ.
އެގޮތުން، މި ފްރެންޗައިސްގެ ދެވަނަ ބަޔަށް ދީފައިވާ ނަމަކީ "އެނިމަލް ޕާކް" ކަމަށް ޑެޑްލައިންއާ ހަވާލާދީ ރިޕޯޓުތައް ބުނެއެވެ.
ފިލްމު "އެނިމަލް 2"ގެ ސްކްރިޕްޓްގެ މަސައްކަތް ފަށާފައިވާއިރު ފިލްމުގެ ޝޫޓިންގް ފެށޭނެ ކަމަށް ލަފާކުރެވެނީ 2027ވަނަ އަހަރު ކަމަށް ރަންބީރު ވަނީ ބުނެފައެވެ. މި ފިލްމު އިތުރަށް ތަރައްޤީކުރާނެ ގޮތްތަކާ ބެހޭގޮތުން ޑައިރެކްޓަރު ސަންދީޕް ރެޑީ ވަންގާ ވަރަށް ގިނަ ގޮތްގޮތުން މަޝްވަރާތައް ކުރިއަށްގެންދާ ކަމަށާއި ދެވަނަ ބައިގައި ރަންބީރު ފެންނާނީ ޑަބަލް ރޯލުން ކަމަށް އެކްޓަރު ވަނީ ބުނެފައެވެ.
ރަންބީރު ކަޕޫރު ރެޑް ސީ އިންޓަނޭޝަނަލް ފިލްމު ފެސްޓިވަލަށް ޒިޔާރަތްކުރި ސަޕޯޓަރަކާ އެކު ފޮޓޯއަކަށް ހުއްޓިލައިގެން--ފޮޓޯ/ޑެޑްލައިން
ރަންބީރު ވިލެންގެ ރޯލް ކުޅޭއިރު ފިލްމުގެ ލީޑް އެކްޓަރަކީ ވެސް އޭނާ ކަމަށާއި އެއީ މި ފިލްމާ މެދު އިތުރު ޝައުގުވެރިކަމެއް އުފެދުނު ކަމެއް ކަމަށް ރަންބީރު ވަނީ ބުނެފައެވެ. ބަތަލާ ރަޝްމިކާ މަންދަނާ މުހިއްމު ރޯލް ކުޅުނު ފިލްމު "އެނިމަލް"އިން ގިނަ ބައެއްގެ ސަމާލުކަން ހޯދި އިތުރު ތަރިންގެތެރޭ އަނިލް ކަޕޫރު، ތުރިޕްތީ ދިމްރީ، ބޮބީ ޑިއޯލް އަދި ޗާރޫ ޝަންކަރު ހިމެނެއެވެ.
ޖުމްލަ 100 ކްރޯޑު ރުޕީސްއިން އުފެއްދި މި ފިލްމަށް ބޮކްސް އޮފީހުގައި 900 ކްރޯޑު ރުޕީސް ގާތްގަނޑަކަށް (108.43 މިލިއަން އެމެރިކާ ޑޮލަރު)ގެ އާމްދަނީ ވަނީ ލިބިފައެވެ. މި ފިލްމަށް ބޮކްސް އޮފީހުގައި ބޮޑު ކާމިޔާބީއެއް ހޯދުނު ނަމަވެސް ވަރަށް ގިނަ ބައެއްގެ ފާޑުކިޔުންތައް ވެސް ފިލްމަށް ވަނީ އަމާޒުވެފައެވެ.