ދަރުމާ ޕްރޮޑަކްޝަންގެ މަގުބޫލު ފްރެންޗައިސް ކަމަށްވާ "ސްޓޫޑެންޓް އޮފް ދަ އިޔާ"ގެ ތިންވަނަ ބައިގެ ދަރިވަރުންގެ ގޮތުގައި ފެންނާނީ އަލާޔާ ފަރްނީޗްރުވާލާއާއި ޝަނާޔާ ކަޕޫރު ކަމަށް ރިޕޯޓުތައް ބުނެފިއެވެ.
ފިލްމު "ސްޓޫޑެންޓް އިފް ދަ އިޔާ"ގެ ތިންވަނަ ބައި ގެނެސްދޭން ނިންމާފައިވަނީ ދަރުމާގެ ވެބް ކޮންޓެންޓް ގެނެސްދޭ ގޮފި ދަރުމެޓިކް އެންޓަޓެއިންމަންޓްއިންނެވެ. ތިންވަނަ ބައި ގެނެސްދޭނީ ފިލްމެއްގެ ގޮތުގައި ނޫން ކަމަށާއި ނަމަވެސް ވެބް ސީރީޒެއްގެ ގޮތުގައި ކަމަށް ކަރަން ވަނީ ކުރިން މީޑިއާއަށް ދިން އިންޓަވިއުއެއްގައި ބުނެފައެވެ.
ފިލްމީ ރިޕޯޓުތައް ބުނާގޮތުން "ސްޓޫޑެންޓް އޮފް ދަ އިޔާ"ގެ ތިންވަނަ ބައި ޑައިރެކްޓްކުރާނީ އިންޓަނޭޝަނަލް ޕްރޮޖެކްޓްތަކެއް އުފައްދާފައިވާ ޑައިރެކްޓަރު ރީމާ މާޔާއެވެ. މި ވެބް ސީރީޒް އުފެއްދުމުގެ އެއްވެސް މަސައްކަތެއްގައި ކަރަން ބައިވެރިނުވާނެ ކަމަށާއި ރީމާ މާޔާ ބޭނުންވާ ގޮތަށް ބެލުންތެރިންނަށް ވެބް ސީރީޒް ގެނެސްދިނުމުގެ އިޚުތިޔާރު ދީފައިވާނެ ކަމަށް ކަރަން ކުރިން ދީފައިވާ އިންޓަވިއުއެއްގައިވަނީ ބުނެފައެވެ.
ދަރުމާ ޕްރޮޑަކްޝަންސްއިން ގެނެސްދިން "ސްޓޫޑެންޓް އޮފް ދަ އިޔާ"ގެ ކުރީ ދެ ފިލްމުން ބޮލީވުޑަށް ތައާރަފްވި ފިލްމީ ތަރިން--ފޮޓޯ/ބޮލީވުޑްހަންގާމާ
ދަރުމާގެ އެންމެ މަގުބޫލު އަދި ބެލުންތެރިންގެ ބޮޑު ތަރުހީބެއް ހޯދި ފްރެންޗައިސްއިން ޝަނާޔާ ކަޕޫރު ފެންނާނެ ކަމަށް ރިޕޯޓުތައް ބުނެފައިވާއިރު އޭނާ އަންނަނީ ކެރިއަރުގެ ފުރަތަމަ ފިލްމުގެ މަސައްކަތް ފަށާފައެވެ. ކުރީގެ އެކްޓަރު ސަންޖޭ ކަޕޫރުގެ ދަރިފުޅު ބޮލީވުޑަށް ތައާރަފުވާ ފިލްމަކީ އެކްޓަރު ވިކްރާންތު މަސޭއާ އެކު މަސައްކަތްކުރާ ފިލްމު "އާންކޯން ކީ ގުސްތާންކިޔާން"އެވެ.
ޝަނާޔާއާ އެކު މި ފިލްމުން ދެން ފެންނާނެ ކަމަށް ރިޕޯޓުތަކުން ބުނެފައިވާ ޒުވާން ބަތަލާ އަލާޔާއަކީ ކުރީގެ މަޝްހޫރު އެކްޓަރު ކަބީރު ބެދީގެ ކާފަ ދަރިފުޅެވެ. އާލާޔާގެ އެންމެ ފަހުން ފެނިފައިވަނީ މިދިޔަ އަހަރު ރިލީޒްކުރި ދެ ފިލްމު ކަމަށްވާ "ބަޅޭ މިޔާން ޗޯޓޭ މިޔާން" އަދި "ސްރީކާންތު"އިންނެވެ.