ފިލްމު "ވިރާސަތު" އަދި "ހެރާ ޕެރީ" ފަދަ ފިލްމުތައް އުފައްދާފައިވާ ޑައިރެކްޓަރު ޕްރިޔާދަރްޝަންގެ ހޮރޯ ކޮމެޑީ ފިލްމު "ބޫތު ބަންގްލާ"އަށް ބަތަލާ ތައްބޫ ސޮއިކޮށްފިއެވެ.
ފިލްމު "ބޫލް ބުލައްޔާ 2"ގައި ތައްބޫ ކުޅުނު ބިރުވެރި ކެރެކްޓާއަށް ލިބުނު ތަރުހީބާ އެކު ބަތަލާ އަނެއްކާ ވެސް ބިރުވެރި ފިލްމަކުން ފެންނަ ޚަބަރަކީ ތައްބޫގެ ސަޕޯޓަރުންނަށް ލިބުނު ވަރަށް ބޮޑު ހިތްހަމަޖެހުމެކެވެ.
މި ފިލްމަކީ ފިލްމީ ތަރި އަކްޝޭ ކުމާރާ ޑައިރެކްޓަރު ޕްރިޔާދަރުޝަން 14 އަހަރަށް ފަހު އެކީގައި މަސައްކަތް ކުރާ ފުރަތަމަ ފިލްމު ވެސް މެއެވެ. ތައްބޫއާ އެކު މި ފިލްމުގެ ވަރަށް މުހިއްމު ރޯލަކުން ހެއްވާ މަޖާ ކެރެކްޓާތައް ކުޅެފައިވާ ޕަރޭޝް ރާވަލް ފެންނާނެކަން ވެސް އަކްޝޭ ވަނީ ކަށަވަރުކޮށްދީފައެވެ.
ބަތަލާ ތައްބޫ އަދި ފިލްމު "ބޫތު ބަންގްލާ"އަށް ސޮއިކުރިކަން އިއުލާނުކުރަމުން އިންސްޓަގްރާމްގައި ބަތަލާ ކުރި ޕޯސްޓު--ފޮޓޯ/ބޮލީވުޑްހަންގާމާ
ޕްރިޔާ ދަރުޝަން ޑައިރެކްޓްކޮށް ބޮޑު ކާމިޔާބީއެއް ހޯދި ފިލްމު "ވިރާސަތު"އަކީ ތައްބޫގެ ކެރިއަރުގެ ވަރަށް ކުރީކޮޅު ކުޅުނު ފިލްމެކެވެ. ފިލްމު "ބޫތު ބަންގްލާ"ގެ މަސައްކަތް ފެށިކަން އިއުލާނުކުރަމުން ތައްބޫ ބުނެފައިވަނީ، ބޮޑު ހަވޭލީއެއްގައި މިހާރު ބަންދުވެފައިވާ ކަމަށެވެ.
ތައްބޫ އެންމެ ފަހުން ބެލުންތެރިންނަށް ފެނިފައިވަނީ މަޝްހޫރު އެމެރިކަން ސައިންސް ފިކްޝަން ޓެލެވިޒަން ސީރީޒް "ޑިއުން:ޕްރޮފެސީ"ގެ ފަހު ބައިންނެވެ. ބަތަލާގެ އެންމެ ފަހުން ރިލީޒްކުރި ބޮލީވުޑް ފިލްމަކީ މިދިޔަ އަހަރު ރިލީޒްކުރި ލޯބީގެ ފިލްމު "އޯރޯ މޭ ކަހާ ދަމްތާ"އިންނެވެ.
ތައްބޫއާ އެކު މި ފިލްމުގެ ލީޑް ރޯލްއިން ފެނިފައިވަނީ އެކްޓަރު އަޖޭ ދޭވްގަންއެވެ. ތައްބޫ އެންމެ ފަހުން މަސައްކަތް ފެށި ހޮރޯ ކޮމެޑީ ފިލްމު "ބޫތު ބަންގްލާ" ސިނަމާތަކަށް ގެންނަން ނިންމާފައިވަނީ އަންނަ އަހަރުގެ އޭޕްރިލް މަހެވެ.