ދިރާގަށް މި އަހަރުގެ ޝަރަފުވެރި ޕައިޕްލައިން އެވޯޑްސްގައި 'އިނޮވޭޝަން އިން ޑިޖިޓަލް ޓްރާންސްފޯމޭޝަން' އެވޯޑް ލިބިއްޖެއެވެ.
ދިރާގަށް މި އެވޯޑް ލިބިފައިވަނީ އެތިޔާއާ އެކު ކުރިއަށް ގެންދިޔަ ކަސްޓަމާ ރިލޭޝަންޝިޕް މެނޭޖްމެންޓް (ސީއާރްއެމް) ޓްރާންސްފޮމޭޝަން ޕްރޮޖެކްޓަށެވެ.
މި އެވޯޑަކީ ދިރާގުން ކަސްޓަމަރުންގެ ތަޖުރިބާތައް އިތުރަށް ފުރިހަމަކޮށް، އޮޕަރޭޝަންތައް ސްޓްރީމްލައިންކުރުމަށް ޒަމާނީ ޓެކްނޮލޮޖީ ގެނައުމަށް
ކުރާ މަސައްކަތުގެ އަގު ވަޒަންކުރުމުގެ ގޮތުން އެކުންފުންޏަށް ދިން އެވޯޑެކެވެ.
އެތިޔާގެ ބިޒްނަސް ސަޕޯޓް ސިސްޓަމް (ބީއެސްއެސް) ޕްލެޓްފޯމްގެ އެހީގައި ކުރިއަށްގެންދިޔަ މި ޕްރޮޖެކްޓަކީ ކަސްޓަމަރުންނާ ގުޅުން ބަދަހިކޮށް، އެފަރާތްތަކަށް ކުރިއަށް ވުރެ ރަނގަޅު ފެންވަރުގެ ޚިދުމަތް ދިނުމަށް ކުރާ މަސައްކަތަށް ލިބުނު ވަރަށް ބޮޑު ކުރިއެރުމެއްކަން ވެސް ދިރާގުން ވަނީ ފާހަގަކޮށްފައެވެ.
ދިރާގުގެ ސީޓީއައިއޯ، މުހައްމަދު މުއްސަދު ވިދާޅުވީ ޑިޖިޓަލް އިނޮވޭޝަން ކުރިއަރުވަން މަސައްކަތްކުރާ ފަރާތްތަކަށް ޚާއްސަކޮށްފައިވާ މި އެވޯޑް ލިބުމަކީ ކުންފުންޏަށް ލިބުނު ވަރަށް ބޮޑު ޝަރަފެއް ކަމަށެވެ.
"މި ކާމިޔާބީން ދައްކުވައިދެނީ އަޅުގަނޑުމެންގެ ހީވާގި ޓީމާއި ޕާޓްނަރުންގެ ބުރަ މަސައްކަތާއި އެއްބާރުލުން،" އޭނާ ވިދާޅުވިއެވެ.
ޕައިޕްލައިން އެވޯޑްސްއަކީ ޑިޖިޓަލް އީޖާދުތައް ގެނައުމުގައި އިސް ސަފުގައި ހަރަކާތްތެރިވާ ފަރާތްތައް ފާހަގަކުރާ ބައިނަލްއަގްވާމީ އެވޯޑެކެވެ. މި އެވޯޑް ދިރާގަށް ލިބުމަކީ އެކުންފުނިން މިހާރަށްވުރެ ހަރުދަނާ، މުވާސަލާތީ ގޮތުން އިތުރަށް ގުޅިފައިވާ މުސްތަގުބަލެއް ބިނާކުރުމަށް ގެންގުޅޭ ދެމެހެއްޓެނިވި ވިސްނުމުގެ ހެއްކެއް ކަމަށް ދިރާގުން ވަނީ ބުނެފައެވެ.
މީގެ އިތުރުން ދިރާގުން ވަނީ ޕައިޕްލައިން އެވޯޑްސްއިން މި ލިބުނު އެވޯޑްގެ އަގުވަޒަންކޮށް، މި އިންގިލާބީ ދަތުރުގައި ދިރާގާ އެކު މަސައްކަތްކުރި ހުރިހާ
ޕާޓްނަރުންނާއި މުވައްޒަފުންނަށް ވަރަށް ޚާއްސަ ޝުކުރެއް އަދާކޮށްފައެވެ.