މަސްތުވާތަކެތީގެ ގާނޫނަށް މިހާރު ހުށަހަޅާފައި އޮތް އިސްލާހުގެ ބިލުގައި ކުށް ސާބިތުނުވާ ހާލަތުގައި އެ މީހެއްގެ މުދާ ދައުލަތަށް ނެގޭ ގޮތަށް އޮތުމުން ރައްޔިތުންގެ މަޖިލީހުގެ އައްޑޫމީދޫ ދާއިރާގެ މެންބަރު އަބްދުއްރަހްމާން މިއަދު ކަންބޮޑުވުން ފާޅުކުރައްވައިފިއެވެ.
އެ ބިލަށް ބަހުސްކުރައްވަމުން މެންބަރު އަބްދުއްރަހްމާން ވިދާޅުވީ، މަސްތުވާތަކެއްޗާއި ކޮރަޕްޝަނާ ޖެހޭއިރު "ބާ ފުރޭންޏަކަށް ވުރެ" ގާނޫނުގެ ހާލަތު ދަށް ކަމަށެވެ.
އެއްވެސް ވަރަކަށް މަސްތުވާތަކެތީގެ މައްސަލައިގައި ގާނޫނު ތަންފީޒުކުރެވޭ ތަނެއް ނުފެންނަ ކަމަށް އޭނާ ވިދާޅުވިއެވެ. އަދި، ތަންފީޒީ އިދާރާތަކަށް އަންނަ މީހުންގެ އެފަދަ ކެޕޭސިޓީއެއް އަދި އިޚުލާސްތެރިކަމެއް ވެސް ނެތް ކަމަށް ވިދާޅުވިއެވެ.
"...ފުރަތަމަ ކަމަކަށް އިސްލާހުކުރަން އަންނަ މީހާ މި އަންނަނީ އިންތިޚާބުތަކުގައި ވެސް މަސްތުވާތަކެއްޗާއި ފައިސާ ބަހައި، ގޭންގު ހިންގުވައި، ކޮރަޕްޝަން ހިންގައި، މަގާމު ހޯދައިގެން. މިކަން ނުކޮށް ޕޮލިސީ މޭކަރުން މަގާމުތަކަށް އައި ދުވަހަކުން މެނުވީ މިކަން ހައްލުވާނެ ތަނެއް އަޅުގަނޑަށް ނުފެނޭ،" އަބްދުއްރަހްމާން ވިދާޅުވިއެވެ.
އޭނާ ވިދާޅުވީ، މިހާރު ހުށަހަޅާފައި އޮތް ބިލުގައި ކުށް ސާބިތުނުވާ ހާލަތުގައި އެ މީހެއްގެ މުދާ ދައުލަތަށް ނެގޭ ގޮތަށް އޮތް އޮތުން އޭނާގެ ސިކުނޑިއަކަށް ގަބޫލެއްނުކުރެވޭ ކަމަށެވެ.
"އަޅުގަނޑު އެންމެ އަޅައިގަތީ މި ގާނޫނުގެ 161 ވަނަ މާއްދާއަށް މި ގެންނަ އިސްލާހު. ކުށް ސާބިތުނުވާ ހާލަތުގައި ދައުލަތަށް މުދާނެގުން. އަޅުގަނޑުގެ ސިކުނޑިއަށް ގަބޫލެއްނުކުރެވޭ މީހެއްގެ މުދަލެއް ދައުލަތަށް ނެގޭނެ އެއްވެސް ހަމައެއް ކުށް ސާބިތުނުވެ އޮންނަން ވާނެ ކަމަށް،" އޭނާ ވިދާޅުވިއެވެ.
"...އަދި 151 ވަނަ މާއްދާގެ ހ. ގެ 10 ގައި ވާގޮތަށް އުޅަނދެއް ދައުލަތަށް ނެގޭނަމަ އޮޑިވެރިޔާގެ އެއްވެސް ބައިވެރިވުމެއް ހިއްސާއެއް ނެތް ކަމެއްގައި އޮޑި ދައުލަތަށް ނެގުމުގެ ފުރުސަތު ބޮޑު،"
އޭނާ ވިދާޅުވީ، އެ މާއްދާތައް ގާނޫނުއަސާސީގެ 40 ވަނަ މާއްދާއާ ޚިލާފު ކަމަށެވެ.
އެ ގާނޫނަކީ މަސްތުވާތަކެތީގެ މައްސަލައަށް ޖުމްލަ ހައްލު ކަމުގައި ނުވީ ނަމަވެސް ގާނޫނަށް އިތުރު އިސްލާހުތަކެއް ގެނެސް، ކޮންމެ ވެސް ވަރެއްގެ ހައްލެއް ލިބޭނެ ކަމަށް އުންމީދުކުރައްވާ ކަމަށް އަބްދުއްރަހްމާން ވިދާޅުވިއެވެ. އެގޮތުން، އެމެރިކާ އަދި ސިންގަޕޫރު ފަދަ ގައުމުތަކުގައި އަމަލުކުރާ ގޮތަށް ރިއާޔަތްކޮށް، ހެކި ހޯދުމުގެ އިޖުރާއަތުތައް ހަރުދަނާކުރެވޭނެ ކަމަށް އުންމީދުކުރައްވާ ކަމަށް ވެސް އޭނާ ވިދާޅުވިއެވެ.
އެހެންނަމަވެސް، މިހާރު ފެންނަނީ ކޮރަޕްޝަންގެ ސަބަބުން ކުށްވެރިން ދޫވެގެންދާ މަންޒަރު ކަމަށް ވިދާޅުވެ އޭނާ ވަނީ ކަންބޮޑުވުން ފާޅުކުރައްވާފައެވެ.