ސަރުކާރު މަސް ކުންފުނި، މިފްކޯގެ ސީއީއޯކަމުގެ މަގާމަށް ޔޫކްރެއިންގެ ބޭފުޅަކު އައްޔަންކޮށްފިއެވެ.
މިފްކޯއިން ބުނު ގޮތުގައި އެ މަގާމަަށް އައްޔަންކޮށްފައިވަނީ ޑރ. ވިޓާލީ ލްޔުބިމޯވްއެވެ.
އޭނާގެ ލިންކްޑިން ޕްރޮފައިލްގައިވާ ގޮތުން އޭނާއަކީ ކްރައިސިސް މެނޭޖްމަންޓުގެ ދާއިރާއިން ޚާއްސަ ބޭފުޅެކެވެ. އަދި ހާލަތު ގޯސް ވިޔަފާރިތައް ކުރިއަރުވައި، ދެމެހެއްޓެނިވި ގޮތުގައި ހިންގޭނެ ވިޔަފާރިއަކަށް ވިޔަފާރި ބަދަލުކުރުމުގެ ތަޖުރިބާ ހުންނެވި ބޭފުޅެކެވެ.
މި ދާއިރާގައި 20 އަހަރުގެ ތަޖުރިބާ ހުރިކަމަށް އޭނާގެ ޕްރޮފައިލްގައި ލިޔެފައިވެއެވެ.
އެނާއަކީ ގާނޫނީ ދާއިރާގައި ވެސް ތަޖުރިބާ ހުރި މީހެއްކަމަށް ޕްރޮފައިލްގައި ވެއެވެ. އެ ނޫނަސް ހިންގުމުގެ ދާއިރާގެ އިސް މަގާމުތަކާއި އިސް މަސައްކަތްތަކުގައި އޭނާގެ ތަޖުރިބާ ހުރިކަމަށް ޕްރޮފައިލްގައި ވަނީ ފާހަގަކޮށްފައެވެ.
މާދަމާ ޑރ. ވިޓާލީ މަގާމާ ހަވާލުވެ މަސައްކަތް ފަށާނެ ކަމަށް މިފްކޯއިންވަނީ ބުނެފައެވެ.
މިފްކޯއަށް ސީއީއޯއަކު ލިބިފައިވަނީ ބޭރު ސީއީއޯއަކު ހޯދަން ދެވަނަ ފަހަރަށް, ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އިއުލާނު ކުރިފަހުންނެވެ.
މި މަގާމަށް ކުރިމަތިލުމުގެ ޓާމްސް އެންޑް ރެފަރެންސްގައި ވާގޮތުން މިފްކޯގެ ސީއީއޯއަށް މުސާރަ ދޭނީ ޑޮލަރުންނެވެ. މުސާރައަކީ 12،000 ޑޮލަރާއި 15،000 ޑޮލަރާ ދޭތެރޭގެ އަދަދެކެވެ. މުސާރަ ކަނޑައަޅާނީ ތަޖުރިބާއަށް ބެލުމަށް ފަހުކަމަށް އެ އިއުލާނުގައިވެއެވެ.