ސޫރިއާގެ ރައީސް ބައްޝާރުލް އަސަދާއި އޭނާގެ އާއިލާ ތިއްބެވީ ރަޝިއާގައި ކަމަށާއި ރަޝިޔާގެ ކަމާބެހޭ ފަރާތްތަކުން އެމީހުންނަށް ހިމާޔަތް ދީފައިވާ ކަމަށް ކްރެމްލިންގެ މަސްދަރަކާ ހަވާލާދީ ރަޝިޔާގެ ނޫސް އެޖެންސީތަކުން ބުނެފިއެވެ.
ނަން ހާމަނުކުރާ ފަރާތާ ހަވާލާދީ އިންޓަފެކްސް ނިއުސް އެޖެންސީން ބުނެފައިވަނީ ސީރިއާގެ ރައީސް އަލްއަސަދު މޮސްކޯއަށް ވަޑައިގެންފައިވާކަމަށެވެ. އަދި ރަޝިޔާއިން ބައްޝާރަށާއި އޭނާގެ އާއިލާއަށް ހިމާޔަތް ދީފައިވަނީ އިންސާނީ ސަބަބުތަކާހުރެ ކަމަށް ވެސް އެ ނޫހުން ބުނެފައިވެއެވެ.
ރަޝިއާގެ ގައުމީ ޓީވީން ވެސް ވަނީ ބައްޝާރު ރަޝިއާގައި ހުންނެވިކަން ރިޕޯޓުކޮށްފައެވެ.
ވެރިކަން ދެމެހެއްޓުމަށް ބައްޝާރަށް ވާގިވެރިވާ ރަޝިޔާއިން ވަނީ ބައްޝާރު ގައުމު ދޫކޮށް ވަޑައިގަތް ކަމަށް ބުނެ އިއްޔެ ވެސް ބަޔާނެއް ނެރެފައެވެ. އެކަމަކު ވަޑައިގަތް ތަނަކާ ބެހޭ ގޮތުން އެއްވެސް އެއްޗެއް ކުރިން ބުނެފައެއްނުވެއެވެ.
ދިމިޝްޤުން ފުރާވަޑައިގަތުމުގެ ކުރިން ބައްޝާރު އެންމެ ފަހުން ފެނިފައި ވަނީ މީގެ ހަފްތާއެއްހާ ދުވަސް ކުރިން ދިމިޝްގުގައި އިރާނުގެ ޚާރިޖީ ވަޒީރާ ބައްދަލުކުރެއްވިއިރެވެ. އެ ދުވަހު އޭނާ ވަނީ ސޫރިއާގެ އެކި ހިސާބުތައް ހަލުވިކަމާއެކު ހިފަމުން އައި ހަނގުރާމަވެރިން ޗިސްޗިސް ކޮށްލާނެ ކަމަށް ވިދާޅުވެފައެވެ.
އިނގިރޭސިވިލާތުގެ މޮނިޓަރިން ގްރޫޕެއް ކަމަށްވާ ސީރިއަން އޮބްޒަވޭޓަރީ ފޯ ހިއުމަން ރައިޓްސް (އެސްއޯއެޗްއާރު)ގެ ވެރިޔާ ރާމީ އަބްދުއްރަހްމާން ބުނި ގޮތުގައި ބައްޝާރު ވަޑައިގަތް ކަމަށް ބެލެވޭ މަތިންދާބޯޓެއް ދިމިޝްގު އިންޓަނޭޝަނަލް އެއާޕޯޓުން ފުރައިގެން ދިޔައެވެ.
އޭގެ ފަހުން ސިފައިން ވަނީ އެއާޕޯޓްގެ ސަލާމަތީ ކަންކަން ބެލެހެއްޓުން ވެސް ދޫކޮށްލައިފައެވެ. އޭނާ ބުނީ އެއީ ހޮނިހިރު ދުވަހުގެ ރޭ 10:00 ގައި ފުރަން ހަމަޖެއްސި ބޯޓެއް ކަމުގެ މައުލޫމާތު ލިބިފައިވާ ކަމަށެވެ.
ރޮއިޓާސް ނިއުސް އެޖެންސީން ސީރިއާ ސިފައިންގެ އިސް ދެ އޮފިސަރުންނާ ހަވާލާދީ ބުނެފައި ވަނީ އާދީއްތަ ދުވަހުގެ ވަގުތެއްގައި ދިމިޝްގު އެއާޕޯޓުގައި ސީރިއަން އެއާގެ ބޯޓަކަށް އަސަދު އަރާވަޑައިގެންނެވި ކަަމަށެވެ.
ފްލައިޓްރާޑާ24 ގެ ޑޭޓާއިން ދައްކާ ގޮތުން މަތިންދާބޯޓު އެންމެ ފުރަތަމަ ދަތުރުކުރީ ވެރިރަށާ ދުރަށް އިރުމައްޗަށެވެ. އެއީ ބައްޝާރުގެ އަލަވީ މަޒުހަބުގެ ބާރުގަދަ މެޑިޓެރޭނިއަން އައްސޭރިފަށާ ދިމާލަށެވެ. އެއީ ރަޝިޔާގެ ކަނޑުގެ ސިފައިންނާއި ވައިގެ މަރުކަޒުތައް ހަދައި ރަޝިޔާގެ ބާރު ގަދަކޮށް އޮންނަ ހިސާބެކެވެ.
ނަމަވެސް ހަނގުރާމަވެރިން ހިފާފައިވާ ހިމްސްގެ 20،000 ފޫޓު އުސްމިނުގައި މައްޗަށް އުދުހުމަށް ފަހު ބޯޓު ވަނީ އައިކޮޅަށް އަނބުރާލާފައެވެ. އަދި އިރުމައްޗަށް ދަތުރުކޮށް، ބޯޓުގެ ސިގްނަލް ގެއްލިފައިވަނީ މެންދަމުން އަލިވެ ގާތްގަނޑަކަށް 04:39 ގައެވެ.
ފްލައިޓްރެޑާ24 ގެ ތަފާސް ހިސާބުތަކުން ދައްކާ ގޮތުގައި ރަޝިޔާގެ އަސްކަރީ މަތިންދާބޯޓެއް އާދިއްތަ ދުވަހު ލަތާކިއާގެ ބައިނަލްއަގްވާމީ އެއާޕޯޓުން، މޮސްކޯއަށް ދަތުރުކޮށްފައިވެއެވެ. ނަމަވެސް ބޯޓުގައި ތިބީ ކޮން ބައެއް ކަމެއް ސާފުނުވާ ކަމަށް ބުނެފައިވެއެވެ.
ސޫރިއާގެ ސަރުކާރާއި އިދިކޮޅު ފަރާތްތަކާ ދެމެދު ހަނގުރާމަ ކުރާތާ މިހާރު 13 އަހަރަށް ވުރެ ދިގު މުއްދަތެއް ވެފައިވާއިރު، މީގެ 10 ވަރަކަށް ދުވަސް ކުރިން ހަނގުރާމަވެރިން ވަނީ ކުއްލި ގޮތަކަށް ހަމަލާތައް ވަރުގަދަކޮށްފައެވެ.
އެގޮތުން ސޫރިއާގެ އިދިކޮޅު ހަނގުރާމަވެރިން ރޭ ދިމިޝްގަށް ވަދެގަތުމާއެކު ބައްޝާރު، އާއިލާއާއެކު ފިއްލަވައިފައިވާ ކަމަށް ރިޕޯޓުތަކުގައިވެއެވެ.