މޮސްކޯ (30 ސެޕްޓެމްބަރު 2026) : ދުނިޔެއަށް އަންނަމުންދާ ބަދަލުތަކާއެކު ގައުމުތައް ކުރިއަރައި ޓެކްނޮލޮޖީ ފެތުރެމުންދާލެއް އަވަސްވުމުގެ ނަތީޖާއެއްގެ ގޮތުން ބައިނަލްއަގްވާމީ ނިޒާމަށް އަންނަމުންދާ ބަދަލުތައް އެމެރިކާ ގަބޫލުކުރަންޖެހޭ ކަމަށް ރަޝިއާއިން ބުނެފިއެވެ.
ރަޝިއާގެ ސްޕޮޓްނިކް ނޫސްއެޖެންސީއަށް ދެއްވި ބަސްދީގަތުމެއްގައި އެ ގައުމުގެ ޚާރިޖީ ވަޒީރު ސަރްގޭ ލާވްރޯވް ވިދާޅުވީ ދުނިޔޭގެ ނިޒާމު މިހާރު އޮތީ އެއްބާރުގެ ބަދަލުގައި ގިނަ ބާރުތަކެއްގެ މައްޗަށް ބިނާވެފައެވެ. މިކަން އެމެރިކާ ގަބޫލުކުރަން ޖެހެއެވެ. ބޭނުންވާ ހުރިހާކަމެއް އެމެރިކާއަށްވެސް ނުކުރެވޭނެ ކަމާއި އެމެރިކާގެ އަސްކަރިއްޔާގެ ލިމިޓޭޝަން ހުރިމިންވަރު އީރާންއާ ދެކޮޅަށް އެމެރިކާ އިސްވެ ފެށި ހަނގުރާމައިން ހާމަވެގެން ގޮސްފައިވާކަން އޭނާ ފާހަގަ ކުރެއްވިއެވެ.
ޔުކްރެއިން ހަނގުރާމައިގެ ހާލަތަށް ބަލާލައްވަމުން ލާވްރޯވް ވިދާޅުވީ ޔުކްރެއިންއަށް ހަތިޔާރާއި ފައިސާއާއި ވަސީލަތްތައްދީގެން ރަޝިއާ ބަލިކުރަން އުޅުނުނަމަވެސް އެކަން ނުކުރެވުނުކަން ވަރަށް ސާފުކޮށް ފެންނަން އެބައޮތެވެ. މި ހަގީގަތް ގަބޫލުކުރަން އެމެރިކާވެސް އަދި ޔޫރަޕްވެސް ދަނީ ފަސްޖެހެމުންނެވެ. ދަތިކުރުމުގެ ފިޔަވަޅުތައް އަޅައި ޕްރެޝަރުކޮށްގެންވެސް ގައުމުތަކުގެ ސިޔާސަތުތައް ބަދަލުނުކުރެވޭނެކަން ރަޝިއާގެ ހާލަތުންނާއި އީރާނުގެ ހާލަތުން އެމެރިކާއާއި ޔޫރަޕަށް ވިސްނެންޖެހޭކަން ލާވްރޯވް ފާހަގަ ކުރެއްވިއެވެ.
ލާވްރޯވް ވިދާޅުވިގޮތުގައި އެމެރިކާގެ ސިޔާސަތު ބިނާކޮށްފައިވަނީ ދުނިޔޭގެ ހުރިހާ ކަމެއްވެސް ހަމައެކަނި އެމެރިކާ އެދޭގޮތަށް ބައްޓަން ކުރުމުގެ މައްޗަށެވެ. ނަމަވެސް ހަގީގަތަކީ ގައުމުތައް ކުރިއަރައި ނޮލެޖާއި ޓެކްނޮލޮޖީ އާއި ރީސާޗްތައް ފެތުރި ފުޅާވެގެން ދިޔުމާއެކު ދުނިޔޭގެ މަސްރަހަށް ބޮޑެތި ބަދަލުތަކެއް އަންނަމުންދާކަމެވެ. ހައިޓެކްގެ ބަރުހަތިޔާރުގެ ކުރިމަތީގައި އަގު ހެޔޮ އާދައިގެ ޓެކްނޮލޮޖީގެ ހަތިޔާރުތައް ވަރަށް އިފެކްޓިވްކަން ފަހުގެ ހަނގުރާމަ ތަކުން ހާމަވެގެން ގޮސްފައިވާކަން އޭނާ ފާހަގަ ކުރެއްވިއެވެ.
އެމެރިކާއާއި ރަޝިއާއާ ދެމެދުގައިވާ މައްސަލަތަކަށް އަލިއަޅުވާލައްވަމުން ލާވްރޯވް ވިދާޅުވީ ތަޖުރިބާކާރުންގެ ފެންވަރުގައި ރަޝިއާއާއި އެމެރިކާގެ ބައްދަލުވުންތަކެއް ވަރަށް އަވަހަށް ބޭއްވޭނެކަމާއި މި މައްސަލާގައި އެމެރިކާގެ ޚާރިޖީ ވަޒީރު މާކޯ ރުބިއޯ އާ ވާހަކަދައްކަވާފައިވާނެކަމުގައެވެ. މިމޭރުމުން ވާހަކަ ދައްކަވަމުން ސުލްހައިގެ ވާހަކަތައް އެއްފަރާތްކޮށް ހަމައެކަނި ބާރުގެ ބޭނުންކޮށްގެން ރަޝިއާ ފަދަ ބޮޑުގައުމެއް ބަލިނުކުރެވޭނެކަން ހުޅަނގުގެ ގައުމުތައް ދަންނަންޖެހޭކަން ލާވްރޯވް ފާހަގަ ކުރެއްވިއެވެ.