މޫސުމީ ބަދަލުތައް ފަދަ ނާޒުކު ކަންކަމުން އަރައިގަތުމަށް އާބާރަކާއެކު މަަސައްކަތް ކުރުމަށް ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕޮރޭޝަން (ސާކް)ގެ ކިބައިން ރައީސް ޑރ. މުހައްމަދު މުއިއްޒު އެދިވަޑައިގެންފިއެވެ.
ރައީސް މިފަދައިން އެދިވަޑައިގެންނެވީ ސާކްގެ 40ވަނަ ޗާޓާ ދުވަހުގެ މުނާސަބަތުގައި ފޮނުއްވި ތަހުނިޔާގެ މެސެޖެއްގައެވެ. އެ މެސެޖުގައި ވަނީ ސާކްގެ ސެކްރެޓަރީ ޖެނެރަލަށާއި، ސާކްގެ ސެކްރެޓޭރިއެޓަށާއި ސާކާ ގުޅިފައިވާ ހުރިހާ މުއައްސަސާތަކަށާއި ދެކުނު އޭޝިއާގެ ޤައުމުތަކުގެ ރައްޔިތުންނަށް، ދުވަހުގެ ހެޔޮއެދުމާއި ތަހުނިޔާ އަރިސްކުރައްވާފައެވެ.
ސަރަހައްދީ ސުލްހަމަސަލަސްކަން ހާސިލުކުރުމަށްޓަކައި ސާކް ޗާޓަރުގައި ބަޔާންކޮށްފައިވާ އުސޫލުތަކާއި އަސާސްތަކަށް އެމަނިކުފާނުގެ މެސެޖުގައި އަލި އަޅުއްވާލައްވާފައިވެއެވެ.
އެގޮތުން މޫސުމަށް އަންނަ ބަދަލުތަކާއި، އާންމު ސިއްހަތާއި، އިޤުތިޞާދީ ހަމަހަމަކަން ފަދަ، ނާޒުކު މައްސަލަތަކަށް ހައްލު ހޯއްދަވައިދެއްވުމަށް ކުރައްވާ މަސައްކަތްތައް އާ ބާރެއްލައިގެން ކުރެއްވުމަށް އެދިވަޑައިގެންފައި ވެއެވެ. އަދި އެ މެސެޖުގައި، ދެމެހެއްޓެނިވި ތަރައްޤީއާއި އުފެއްދުންތެރިކަމާއި ވިލުންތެރި ބިނާރުތަކަށް އިސްކަންދިނުމުގެ މުހިންމުކަމުގެ މައްޗަށް ވެސް އަލިއަޅުއްވާލައްވާފައިވެއެވެ.
ރައީސްގެ މެސެޖު ނިންމަވާލައްވަމުން، ދެކުނު އޭޝިއާގެ ރައްޔިތުންނަށް އުފާވެރި، އުޖާލާ މުސްތަޤުބަލެއް ބިނާކުރުމަށްޓަކައި، ސާކްގެ މަސައްކަތްތައް އިތުރަށް ހަރުދަނާކުރުމަށާއި، ޝާމިލުވުން އިތުރުކުރުމަށް ރާއްޖެއިން އަބަދު ވެސް މަސައްކަތް ކުރާނެކަމުގެ ޔަޤީންކަން ދެއްވާފައިވެއެވެ.
"ސާކް ޗާޓާ ޑޭ"ގެ ގޮތުގައި ފާހަގަކުރަނީ ކޮންމެ އަހަރެއްގެ ވެސް ޑިސެމްބަރު މަހުގެ އަށްވަނަ ދުވަހެވެ.
ސާކުގެ ގައުމުތަކުގެ ތެރޭގައި ހިމެނެނީ ރާއްޖެ، އިންޑިއާ، ސްރީލަންކާ، ބަންގްލަދޭޝް، ބޫޓާން، ނޭޕާލް، ޕާކިސްތާން އަދި އަފްގާނިސްތާނެވެ.