އިންޑިއާގެ މަގުބޫލު ލަވަކިޔުންތެރިން ކަމަށްވާ އަރިޖިތު ސިންގް އާއި އަންކިތު ތިވާރީ އެކީގައި މަސައްކަތް ކޮށްފައިވާ ލަވައެއް 11 އަހަރު ފަހުން ބެލުންތެރިންނަށް ގެނެސްދީފިއެވެ.
"ތުމް ކިޔާ ހޯ"ގެ ނަމުގައި އުފައްދާފައިވާ މި ލަވައިގެ ތަރިންނަކީ ބޮލީވުޑްގެ މަގުބޫލު އެކްޓަރު ޖޯން އަބްރަހަމް އަދި ޓެލެވިޒަން ބަތަލާ ސަންޖީދާ ޝައިހްއެވެ. މި ލަވައިގެ މިއުޒިކް އަންކިތު ތިވާރީ އުފައްދާފައިވާއިރު ލަވަ ކިޔާފައި ވަނީ އަރިޖިތު ސިންގް އާއި އަންކިތު އަޑު އެކުލެވޭ ގޮތަށެވެ.
މި ލަވަޔަކީ އަންކިތު އާއި އަރިޖިތު އެކީގައި މަސައްކަތް ކުރި ފިލްމު "އާޝިޤީ 2"ގެ މިއުޒިކަށް ދެ ލަވަކިޔުންތެރިންގެ އަޑު ބެލުންތެރިންނަށް އިވޭނެ ފުރަތަމަ ލަވައެވެ.
އަންކިތު ވަނީ މީގެކުރިން ޖޯން އަބްރަހަމްއާ އެކު ފިލްމު "އޭކް ވިލެން ރިޓާންސް"ގައި ވެސް މަސައްކަތް ކޮށްފައެވެ.
މި މިއުޒިކް ވީޑިއޯ މިހާރު ރިލީޒްކޮށްފައިވާއިރު ސަންޖީދާ އާއި ޖޯންގެ ކެމިސްޓްރީއަށް ވަރަށް ގިނަ ބަޔަކު ވަނީ ތައުރީފުކޮށްފައެވެ. ހަމައެއާއެކު މި ލައިވައިގައި ގެނެސްދީފައިވާ ސްޓޯރީ ވަރަށް ގިނަ ބަޔަކަށް ވަނީ ކަމުގޮސްފައެވެ.
ޖޯން އެންމެ ފަހުން ފިލްމު "ވެދާ"އިން ބެލުންތެރިންނަށް ފެނިފައިވާއިރު މިހާތަނަށް ސަންޖީދާ ވަނީ ބައެއް ބޮލީވުޑް ފިލްމުތަކުގައި ވެސް މަސައްކަތްކޮށްފައެވެ.
އޭގެތެރޭގައި ދާދިފަހުން ރިލީޒްވި އެކްޝަން ތުރިލާ "ފައިޓާ" އަދި މަގުބޫލު ޕްރޮޑިއުސަރު ސަންޖޭ ލީލާ ބަންސާލީގެ ފިލްމު "ހީރާމަންޑީ" ހިމެނެއެވެ. މިފަހުން އިންޑިއާގައި ރިލީޒްކުރާ ބޮލީވުޑްގެ ކޮންމެ ފިލްމެއްގައި ވެސް އަރިޖިތުގެ ލަވައެއް ހިމެނޭއިރު އަންކިތު އާއި އަރިޖިތު ވެފައި ވަނީ މިއުޒިކީ ދާއިރާއިން ކުޑަ ދުވަސްކޮޅެއްގެ ތެރޭގައި ވަރަށް ބޮޑު މަޝްހޫރުކަމެއް ލިބުނު ދެ ލަވަކިޔުންތެރިންނަށެވެ.