އަމާޒަކީ ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ އާ ޓާމިނަލްގެ ޚިދުމަތް މިހާރު ކަނޑައަޅައިފައި އޮތް މުއްދަތަށްވުރެ ކުރިން ދޭން ފެށުންކަމަށް ޓްރާންސްޕޯޓް މިނިސްޓަރު މުޙައްމަދު އަމީން މިއަދު ވިދާޅުވެއްޖެއެވެ.
ކޮންމެ އަހަރެއްގެ ވެސް ޑިސެންބަރު ހަތްވަނަ ދުވަސް ފާހަގަކުރަނީ ބައިނަލްއަގްވާމީ މަދަނީ ވައިގެ ދަތުރުފަތުރުގެ ދުވަހުގެ ދުވަހުގެ ގޮތުގައެވެ.
ބައިނަލްއަގްވާމީ މަދަނީ ވައިގެ ދަތުރުފަތުރުގެ ދުވަހާ ގުޅިގެން ދެއްވި ޚިތާބުގައި މިނިސްޓަރު އަމީން ވިދާޅުވީ އާ ޓާމިނަލްގެ މަސައްކަތް ވަރަށް ހަލުވިކަމާއެކު ކުރިއަސްދަ ކަމަށެވެ.
"މި ސަރުކާރުގެ އިސް ނެގުމާއެކު މިހާރު މަސައްކަތްކުރަމުން މި ދަނީ އިރާދަކުރެއްވިއްޔާ ކުރިން ކަނޑައެޅި ތާރީޚަށް ވުރެ އަވަސް ތާރީޚެއްގައި އައު ޓާމިނަލް ހުޅުވައި ޚިދުމަތް ދޭން ފެށުމަށެވެ،" ޚިޠާބުގައި ވިދާޅުވިއެވެ.
އިންތިޚާބީ ރައީސްގެ ގޮތުގައި ރައީސް ޑރ. މުޙައްމަދު މުއިއްޒު ވިދާޅުވީ މި ވެރިކަމުގެ ފުރަތަަމަ އަށް މަހުގެ ތެރޭ އާ ޓާމިނަލް ހުޅުވޭތޯ މަސައްކަތްކުރައްވާނެ ކަމަށެވެ. ނަމަވެސް އެ ތާރީޚު ދިޔައިރު ވެސް އާ ޓާމިނަލް ނުނިމޭތީ ބޭނުންކުރަން ނުފަށައެވެ.
އާ ޓާމިނަލްގެ މަސައްކަތް ނިންމޭނެކަމަށް ކޮންޓްރެކްޓަރުން ދީފައިވާ ތާރީޚަކީ މި ފެށޭ 2025ވަނަ އަހަރުގެ ދެވަނަ ކުއާޓަރުގެ ތެރެއެވެ.
އެމިއަދު ވައިގެ ދަތުރުފަތުރަކީ ހަމައެކަނި މީހުން އެއްތަނުން އަނެއް ތަނަށް ވާސިލްވާން ބޭނުންކުރާ ޚިދުމަތެއް ނޫން ކަމަށާއި، މިއަދު މިއީ އިގްތިޞާދީ އަދި އިޖްތިމާއީ ތަރައްގީގެ ކުރިއެރުމާއި 'އިންޖީނު' ކަމަށެވެ.
އަމީން ވިދާޅުވީ ޒަމާނީ ތަރައްގީ ވައިގެ ދަތުރުފަތުރުގެ ސިނާއަތަށް ވާސިލްވަމުން އަންނައިރު ރާއްޖެއަކީ ވެސް އެ ބަދަލުތަކާ ފައިހަަމަކޮށް ތަރައްގީވަމުން އަންނަ ގައުމުތަކުގެ ތެރޭގައި ހިމެނޭ ގައުމެއް ކަމަށެވެ.
އެގޮތުން ރައީސް ޑރ. މުޙައްމަދު މުއިއްޒުގެ ސިޔާސަތުތަކާ އެއްގޮތަށް ރާއްޖޭގެ އެއާލައިންތަކުން ވެސް ތަފާތު މަރުކާތަކުގެ ބޯޓުތައް ގެނެސް ފްލީޓު ބޮޑުކުރުމުގެ މަސައްކަތް ކުރަމުން އަންނަ ކަމަށް ވަނީ ބުނެފައެވެ.
ހަމައެއާއެކު އަމާޒަކީ
ޚާއްސަކޮށް ރާއްޖޭގެ ގައުމީ އެއާލައިން، މޯލްޑިވިއަނުން ވައިޑްބޮޑީ އެއާކްރާފްޓު ގެނެސް ބައިނަލްއަގްވާމީ ދަތުރުތައް ފުޅާކުރުމަށް ކުރަމުން އަންނަ މަސައްކަތް ފާހަގަކޮށްލެވޭ ކަމަށް މިނިސްޓަރު ވިދާޅުވިއެވެ.
އެގޮތުން މި ފެށޭ ޖެނުއަރީ މަހުގެ ތެރޭގައި މޯލްޑިވިއަންގެ ފުރަތަމަ ވައިޑްބޮޑީ މަތިންދާބޯޓު ރާއްޖެ ގެނެސް އިތުރު މަންޒިލްތަކަށް ދަތުރުތައް ފަށާނެކަމަށް އަމީން ވިދާޅުވިއެވެ.
ހަމައެއާއެކު ރާއްޖޭގައި ހެލިކޮޕްޓަރު އޮޕަރޭޝަންތައް އަލުން ފެށުމަށް މިހާރު ތައްޔާރުވަމުން އަންނައިރު، އެ ޚިދުމަތް ފެށުމުން ރިސޯޓުތަކާއި، އެއާޕޯޓުތަކާ ދެމެދު ފަތުރުވެރިން އުފުލުމުގެ ޚިދުމަތް ދޭނެކަމަށް ޚިޠާބުގައިވެއެވެ. އަދި އެއާޕޯޓު ނެތް ސަރަހައްދުތަކަށް ވެސް ރޭގަނޑު ދަތުރުކުރުމުގެ މަގުފަހިވާނެކަމަށް ވެސް ވިދާޅުވިއެވެ.
މީގެ އިތުރުން މިހާރު މަސައްކަތްކުރަމުން އަންނަނީ ސިވިލް އޭވިއޭޝަން އޮތޯރިޓީއަށް އައިކާއޯގެ އޮޑިޓުގައި ރަނގަޅު ނަތީޖާއެއް ހޯދުމަށް ކަމަށާއި އެ ކަން ހާސިލްވާނެ ކަމުގެ ޔަގީންކަން އެބައޮތް ކަމަށް ވެސް އަމީން ވިދާޅުވިއެވެ.
އެއާއެކު އަމީންވަނީ މި ދާއިރާގެ އެންމެހާ ޚިދުމަތްތެރިންގެ އަގު ވަޒަންކުރައްވައި، ޝުކުރު ދަންނަވައި، ޚިދުމަތުގައި ދެމިތިބުމަށް އިލްތިމާސްކުރައްވައިފައެވެ.