ގުރުއާން ހިތުދަސްކުރާ ދަރިވަރުންނަށް ހިތްވަރު ދިނުމުގެ ގޮތުން އުމްރާއަށް ފޮނުވުމުގެ ޕްރޮގްރާމުގެ ދަށުން މިހާތަނަށް ހަ ދަރިވަރުން އުމްރާއަށް ފޮނުވައިފިއެވެ.
މި ޕްރޮގްރާމު ފެށުމަށް ނިންމާ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އެކަން އިއުލާނު ކުރެއްވީ، މިދިޔަ އޮގަސްޓު މަހުގެ 27ވަނަ ދުވަހުއެވެ.
މިކަމާ ގުޅިގެން "ސަން"އަށް މައުލޫމާތު ދެއްވަމުން އެ މިނިސްޓްރީގެ ޑެޕިއުޓީ މިނިސްޓަރު އަލީ އަހުސަން ވިދާޅުވީ، މި ޕްރޮގްރަމުގެ ދަށުން މިހާތަނަށް ހަ ދަރިވަރުން އުމްރާއަށް ފޮނުވާފައި ވާކަމަށެވެ. މިއަހަރު އަދިވެސް ދަރިވަރުން އުމްރާއަށް ފޮނުވާނެކަމަށް އޭނާ ވިދާޅުވިއެވެ. ނަމަވެސް، އެއީ ކިހާ ދަރިވަރުންނެއްކަން ހާމަކުރައްވާފައެއް ނުވެއެވެ.
އަންނަ އަހަރުން ފެށިގެން ތިން ފޮތަށްވުރެ ގިނައިން ގުރުއާން ހިތުދަސްކުރާ މީހުންނަށް ޕޮކެޓު މަނީއެއް ދޭން ނިންމައިފައިވާކަން މީގެ ކުރިން މިނިސްޓަރު ޝަހީމް އިއުލަނު ކުރެއްވިއެވެ. މިނިސްޓަރު ވިދާޅުވި ގޮތުގައި އެއީ ރާއްޖޭގައި ގުރުއާނުގެ އިލްމު ފުޅާކޮށް، ގުރުއާން ހިތުދަސްކުރުމަށް ބާރު އެޅުމަށް ކުރަމުންދާ މަސައްކަތުގެ ތެރޭގައި ހިމެނޭ ކަމެކެވެ.
މީގެ އިތުރުން، ސްކޫލުގައި ނޫޅޭ ހާފިޒުން ޢުމްރާއަށް ފޮނުވުމުގެ މަޝްރޫއެއް ވެސް އިސްލާމިކް މިނިސްޓްރީން ފެށިއެވެ.
އިސްލާމިކް މިނިސްޓްރީން އަންނަނީ ރާއްޖޭގައި އިމާމުން ލިބުން މަދުވުމާ ގުޅިގެން ގްރޭޑް 10، 11 އަދި 12 ނިންމާފައިވާ ދަރިވަރުންގެ ތެރެއިން ހުކުރު ނަމާދުކޮށް ޚުތުބާ ކިޔުމަށް ޝައުގުވެެރިވާ ކުދިންނަށް 'ޒުވާން ޚަތީބުން'ގެ ނަމުގައި ޕްރޮގްރާމެއް ހިންގަމުންނެވެ.