ގުރުއާން ހިތުދަސްކުރާ ދަރިވަރުންނަށް ހިތްވަރު ދިނުމުގެ ގޮތުން އުމްރާއަށް ފޮނުވުމުގެ ޕްރޮގްރާމް މާދަމާ ފެށުމަށް ނިންމާފައިވާ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު މިރޭ ވިދާޅުވެއްޖެއެވެ.
މިނިސްޓަރު ކުރެއްވި ޕޯސްޓެއްގައި ވިދާޅުވީ، ގުރުއާން ހިތުދަސްކޮށް ނިންމާ ދަރިވަރުންނަށް ހިތްވަރު ދިނުމަށް އުމްރާއަށް ފޮނުވުމުގެ ޕްރޮގްރާމްގެ ދަށުން ފުރަތަމަ ހާފިޒަށް މާދަމާ އެ ފުރުސަތު ދެވޭނެ ކަމަށެވެ.
އެގޮތުން، އެ ހާފިޒަކީ ގުރުއާނުގެ އާޔަތުގެ ނަންބަރާއެކު ހިތުދަސްކޮށްފައިވާ ދަރިވަރެއް ކަން މިނިސްޓަރު ވަނީ ފާހަގަކުރައްވާފައެވެ. ނަމަވެސް އެ ހާފިޒާ ގުޅޭ އިތުރު ތަފުސީލެއް ޝަހީމް ނުދެއްވައެވެ.
ފާހަގަކޮށްލެވޭ ގޮތުގައި، އިސްލާމިކް މިނިސްޓްރީން އަންނަނީ ރާއްޖޭގައި އިމާމުން ލިބުން މަދުވުމާ ގުޅިގެން ގްރޭޑް 10، 11 އަދި 12 ނިންމާފައިވާ ދަރިވަރުންގެ ތެރެއިން ހުކުރު ނަމާދުކޮށް ޚުތުބާ ކިޔުމަށް ޝައުގުވެެރިވާ ކުދިންނަށް 'ޒުވާން ޚަތީބުން'ގެ ނަމުގައި ޕްރޮގްރާމެއް ހިންގަމުންނެވެ.
އެ ޕްރޮގްރާމްގެ ފުރަތަމަ ބުރު ނިމިފައިވާއިރު، މިހާރު ވަނީ އެ ޕްރޮގްރާމްގެ ދެވަނަ ބުރު ފަށާފައެވެ.
އިސްލާމިކް މިނިސްޓްރީން ގުރުއާން ހިތުދަސް ކުރަން ހިތްވަރު ދިނުމުގެ ގޮތުން ވަނީ، ތިން ފޮތަށްވުރެ ގިނައިން ގުރުއާން ހިތުދަސްކުރާ މީހުންނަށް ޕޮކެޓު މަނީއެއް ދޭން ނިންމައިފައެވެ.
ޝަހީމް މީގެ ކުރިން ވިދާޅުވެފައިވާ ގޮތުގައި އެ ފައިސާ ދޭން ފަށާނީ އަންނަ އަހަރުން ފެށިގެންނެވެ.