ފިލްމު "ގަދަރު 2"ގެ ކާމިޔާބީއަށް ފަހު ސަނީ ޑިއޯލްގެ ވަރުގަދަ އެކްޝަން ރޯލަކުން ފެންނަ ފިލްމު "ޖާތު" އަންނަ އަހަރު އޭޕްރިލް މަހު ރިލީޒް ކުރަން ނިންމައިފިއެވެ.
މި ފިލްމުގެ ފުރަތަމަ ޓީޒާ ދައްކާފައި ވަނީ ބޮޑު ކާމިޔާބީއެއް ހޯދަމުން އަންނަ ފިލްމު "ޕުޝްޕާ 2"ގެ ސްކްރީނިންގްއާ އެކުއެވެ. ފިލްމު "ޕުޝްޕާ 2" ސްކްރީންކުރި 12،500 ސިނަމާ ހޯލްގައި ފިލްމު "ޖާތު"ގެ ޓީޒާ ވަނީ އާއްމުންނަށް ދައްކާލާފައެވެ.
ބޮލީވުޑްގެ އެންމެ އައިކޮނިކް އެކްޝަން ހީރޯގެ ނަމުން ގިނަ ބަޔަކު މުހާތަބުކުރާ ސަނީއަކީ މިހާރު ވެސް އެހެން އެކްޓަރުން ފަހަތަށް ޖައްސާލުމުގެ ބުންވަރު ލިބިފައިވާ އެކްޓަރެއް ކަމަށް ގިނަ ބަޔަކު ވަނީ ބުނެފައެވެ.
ސަނީ ލީޑްރޯލް ކުޅޭ މި ފިލްމުގައި ވިލެންގެ ރޯލްއިން ފެންނާނީ ހުނަރުވެރި އެކްޓަރު ރަންދީޕް ހޫދާއެވެ. ރަންދީޕަކީ މީގެކުރިން ވެސް ކުޅެފައިވާ ވިލެން ރޯލްތަކުން ބެލުންތެރިންގެ ތަރުހީބު ހޯދާފައިވާ އެކްޓަރެކެވެ.
އެކްޓަރު ސަނީ ޑިއޯލް އަދި ބަތަލާ އަމިޝާ ޕަޓޭލް ފިލްމި "ގަދަރު 2"ގެ ޕްރޮމޯޝަންގައި--ފޮޓޯ/ބޮލީވުޑްހަންގާމާ
މި ދެ ތަރިންގެ އިތުރުން ފިލްމުން ބަތަލާގެ ރޯލްއިން ސައްޔާމީ ހޭރް ވެސް ފެންނާނެއެވެ. އަންނަ އަހަރުގެ އޭޕްރިލް މަހު ފިލްމު ރިލީޒްކުރާނެކަން އިއުލާނުކުރި އިރު ސިނަމާތަކުގައި ފިލްމު ދައްކާނެ ތާރީޚެއް އަދި އިއުލާނެއް ނުކުރެއެވެ.
ފިލްމު "ގަދަރު 2" ހޯދި ކާމިޔާބީއާ ގުޅިގެން ސަނީގެ ފިލްމީ ކެރިއަރަށް އިތުރު ކުރިއެރުމެއް ލިބި މީގެކުރިން ތަޖުރިބާކޮށްފައިނުވާ ކާމިޔާބީ އެކްޓަރު ވަނީ ތަޖުރިބާކޮށްފައެވެ.
ފިލްމު "ޖާތު"ގެ ކުރިން އެކްޓަރު އާމިރު ޚާން ޕްރޮޑިއުސްކުރާ ފިލްމު "ލާހޯރު 1947"އިން ސަނީ ބެލުންތެރިންނަށް ފެންނާނެއެވެ. ސަނީ އަންނަނީ ކެރިއަރުގައި ބޮޑު މަގުބޫލުކަމެއް ހޯދި ފިލްމު "ބޯޑާ"ގެ ދެވަނަ ފިލްމުގެ މަސައްކަތް ވެސް ކުރަމުންނެވެ.