އިންޑިއާގެ މަޝްހޫރު ރެޕް ލަވަކިޔުންތެރިޔާ ޔޯޔޯ ހަނީ ސިންގްގެ ހަޔާތާ ގުޅޭ ގިނަ ވާހަކަތަކެއް ކިޔައިދޭ ޑޮކިއުމެންޓްރީ ފިލްމު މި މަހުގެ 20ވަނަ ދުވަހު ނެޓްފްލިކްސްގައި ޕްރީމިއާކުރާނެކަން އިއުލާނުކޮށްފިއެވެ.
"ޔޯ ޔޯ ހަނީ ސިންގް: ފޭމަސް"ގެ ނަމުގައި ގެނެސްދޭ މި ޑޮކިއުމެންޓްރީ ފިލްމަކީ، އޮސްކާ އެވޯޑު ކާމިޔާބުކޮށްފައިވާ ފިލްމު ކުންފުނި ސިހްޔާ އެންޓަޓެއިންމަންޓްއިން އުފައްދާ ފިލްމެކެވެ. ގުނީތު މޮންގާ އަދި އަޗިން ޖެއިން ޕްރޮޑިއުސްކުރާ މި ޑޮކިއުމެންޓްރީގެ ޑައިރެކްޓަރަކީ މޮޒޭޒް ސިންގްއެވެ.
ކާމިޔާބު ގިނަ ޑޮކިއުމެންޓްރީ ފިލްމުތައް އުފައްދާފައިވާ ގުނީތު މޮންގާ ބުނެފައިވާ ގޮތުގައި ޔޯޔޯ ހަނީ ސިންގްގެ ކެރިއަރުގެ ގިނަ ވާހަކަތަކެއް މި ޑޮކިއުމެންޓްރީގައި ހިމެނިފައި ވާއިރު ލަވަކިޔުންތެރިޔާގެ ތަރި އޮއްސުނު ގޮތާއި މަޝްހޫރު ރެޕް ލަވަކިޔުންތެރިޔާ ހިރްދޭޝް ސިންގްގެ އެނބުރިއައުން ވަރަށް ތަފުސީލުކޮށް ކިޔައި ދެވޭނެއެވެ.
ހަނީ ސިންގްގެ އެންމެ ފަހު އަލްބަމް "ގްލޯރީ"ގެ ޕޯސްޓަރެއް--ފޮޓޯ/ޕިންކްވިލާ
މި ޑޮކިއުމެންޓްރީއާ ގުޅޭގޮތުން ވާހަކަ ދައްކަމުން ޕްރޮޑިއުސަރު ގުނީތު ބުނެފައި ވަނީ ސްޓޭޖް ނަމުގެ އިތުރުން ޔޯޔޯ ހަނީ ސިންގްގެ ދިރިއުޅުމާ ގުޅޭގޮތުން އާއްމުންނަށް އެނގެނީ ވަރަށް މަދު ވާހަކަތަކެއް ކަމަށެވެ. ނެޓްފްލިކްސްއާ ގުޅިގެން ގެނެސްދޭ މި ޑޮކިއުމެންޓްރީ މެދުވެރިކޮށް ދޭސީ ލަވަކިޔުންތެރިޔާގެ މީގެކުރިން ނޭނގޭ ގިނަ ވާހަކަތަކެއް ބެލުންތެރިންނަށް ގެނެސްދެވުމަކީ ލިބޭ ވަރަށް ބޮޑު އުފަލެއްގެ ގޮތުގައި ގުނީތު ވަނީ ފާހަގަ ކޮށްފައެވެ.
ހަނީ ސިންގްގެ ދިރިއުޅުމުގައި ކުރެވުނު ހިތި ތަޖުރިބާތަކާ އެކު ކެރިއަރުގައި ތަޖުރިބާކުރި ކާމިޔާބީތައް ވެސް "ޔޯ ޔޯ ހަނީ ސިންގް: ފޭމަސް"ގައި ހިމެނޭ ކަމަށް ޑައިރެކްޓަރު މޮޒޭޒް ސިންގް ވަނީ ބުނެފައެވެ. އަމިއްލަ ދިރިއުޅުމުގެ ވަރަށް ޒާތީ ވާހަކަތައް ވެސް މޮޒޭޒްގެ ޓީމާއެކު ހިއްސާކޮށް އެ ޓީމަށް އިތުބާރު ކުރީތީ ހަނީ ސިންގްއަށް ވަރަށް ބޮޑަށް ޝުކުރު އަދާކުރާ ކަމަށް ޑައިރެކްޓަރު މޮޒޭޒް ވަނީ ބުނެފައެވެ.
މިހާތަނަށް ގިނަ އަދަދެއްގެ އަމިއްލަ މިއުޒިކް ވީޑިއޯތައް ޔޯޔޯ ހަނީ ސިންގް ނެރެފައިވާއިރު އޭނާ ވަނީ ވަރަށް ގިނަ ބޮލީވުޑް ފިލްމުތަކަށް ވެސް މިއުޒިކް ތައްޔާރުކޮށްދީފައެވެ. ކާމިޔާބު މިއުޒިކް ކެރިއަރެއް ބިނާކުރި ނަމަވެސް ރަލާއި މަސްތުވާތަކެތީގެ ވަބާގައި ޖެހުމުގެ ސަބަބުން ޔޯޔޯ ސިންގްގެ ކެރިއަރަށް އޭގެ އަސަރުކޮށް އޭނާ ވަނީ ދިގު މުއްދަތަކަށް ރިހެބްގައި އެކަމަށް ފަރުވާ ހޯދާފައެވެ.