މަސައްކަތުގައި އަވަދިނެތި އުޅުމަކީ ނަމާދަށް ފަރުވާކުޑަކުރާން ޖެހޭ ސަބަބެއް ނޫން ކަމަށާއި އެހެންނަމަވެސް މިއަދު ގިނަ މީހުން ދުނިޔެވީ ކަންކަމުގައި މަޝްއޫލުވެ ނަމާދާ މެދު ޣާފިލުވެތިބޭ ތަން ފެންނަ ކަމަށް ހުކުރު ޚުތުބާގައި ބުނެފިއެވެ.
މިއަދުގެ ހުކުރު ޚުތުބާ ޚާއްސަކޮށްފައި ވަނީ "އަވަދިނެތިވުމަކީ ނަމާދު އެޅުމަށް އޮތް އުޒުރެއް ނޫން" މި މައުޟޫއުގެ މައްޗަށެވެ.
އިސްލާމްދީނުގެ ތަނބުކަމުގައިވާ ނަމާދަކީ ކޮންމެ މުކައްލަފަކު ކުރުން ވާޖިބުވެގެންވާ އަޅުކަމެކެވެ. އެއީ ރަށުގައި ގާއިމުވެހުރި މީހާއާއި ދަތުރެއްގެމަތީގައިވާ މީހާއާއި ބަލި ތަންމަތީގައި އޮންނަ މީހާ ވެސް ކުރާން އަންގަވައިފައިވާ އަޅުކަމެކެވެ. ކީރިތި ރަސޫލާ ވަނީ ނަމާދު ކުރަން ވަރަށް ބޮޑަށް ބާރު އަޅުއްވާފައެވެ.
މިއަދުގެ ހުކުރު ޚުތުބާގައި ބުނީ ނަމާދު ނުކުރެވޭނެ ހަމައެކަނި ހާލަތަކީ ތިމާގެ ބުއްދި ފިލައިދިޔުން ކަމަށެވެ. އެހެންކަމުން އެ މަތިވެރި އަޅުކަމަށް އަހަރެމެން ވަގުތު ހުސްކުރަން ޖެހެނީ ދުނިޔެވީ ގޮތުން ކުރާން ހުރި ހުރިހާ ކަމެއް ނިމުމުން ކުރާ ކަމެއްކަމުގައި އެއްވެސް ހާލެއްގައި ދެކިގެންނުވާނެ ކަމަށް ޚުތުބާގައި ބުންޏެވެ. އިންސާނާގެ އަމަލުތަކުގެ ތެރެއިން ގިޔާމަތްދުވަހު އެންމެ ފުރަތަމަ ސުވާލުކުރެވޭނީ ނަމާދާ މެދުގައިކަން ފާހަގަކުރައްވާ ޚުތުބާގައި ބުނީ ދިވެހީންނަކީ ޒަމާނުއްސުރެ ބުރަ މަސައްކަތްކޮށްގެން އާމްދަނީ ހޯދާ ބައެއް ކަމަށެވެ.
އަހަރެމެންގެ ތެރެއިން ގިނަ މީހުންނަކީ، ދުވާލުގެ ގިނަ ވަގުތު ތަކުގައި އަވަދިނެތި ވަޒީފާތަކުގައި އުޅޭ ބައެއް ކަމަށާއި އެގޮތަށް ދުވާލުގެ ވަގުތުތައް ހޭދަކުރާ އިރު، ނަމާދުތަކަށް ސަމާލުކަން ދެވެނީ ކިހާ މިންވަރަކަށްތޯ ސުވާލުކުރާން ޖެހޭ ކަމަށް ޚުތުބާގައި ބުންޏެވެ.
ޚުތުބާގައި ބުނީ މުސްލިމެއްގެ ހައިސިއްޔަތުން ތިމާ އެންމެ ބޮޑަށް އިސްކަން ދޭންޖެހޭނީ ނަމާދަށް ކަމަށެވެ. ނަމަވެސް މިއަދު ގިނަ މީހުން ދުނިޔެވީ ކަންކަމުގައި މަޝްއޫލުވެ ނަމާދާ މެދު ޣާފިލުވެތިބޭ ތަން ފެންނަ ކަމަށް ޚުތުބާގައި ބުންޏެވެ.
"މަސައްކަތުގައި އަވަދިނެތި އުޅުމަކީ ތިމާ ނަމާދުތަކަށް ފަރުވާކުޑަކުރާން ޖެހޭ ސަބަބެއް ނޫން. ދިރިއުޅުމުގެ ބޭނުން ފުއްދުމަށްޓަކައި ކޮންމެ ފަދަ މަސައްކަތެއް ކުރިކަމުގައިވިއަސް ނަމާދު ވަގުތު ޖެހުމުން އެ ނަމާދުކުރާން އަވަސްވެގަންނާން ޖެހޭ،" ޚުތުބާގައި ބުންޏެވެ.
"...ނަމަވެސް ބައެއް ބާވަތުގެ މަސައްކަތުގައި އުޅެންޖެހޭ ގޮތުން މިސްކިތުގެ ޖަމާއަތަށް ހާޒިރުވުމަށް ދަތިތަކެއް ހުރެދާނެ. އެ ފަދަ މީހުންނަށް އޮތީ އެ ތިބި ތަނެއްގައި ތިބެ ނަމާދުކުރުން. މިސްކިތު ޖަމާއަތަށް ހާޒިރު ނުވެވުމަކީ ނަމާދު އެޅުމަށް އޮތް އުޒުރެއް ނޫން،" ޚުތުބާގައި ބުންޏެވެ.
އިސްލާމީ މަރުކަޒަށް ބަޔަކު ނަމާދަށް އަރަނީ -- ސަން ފޮޓޯ
ފަރުޟު ފަސް ނަމާދު އޭގެ ވަގުތުގައި އަދާކުރުމަކީ ތިމާގެ އަމަލުތައް ސީދާވެ، ކުރާ މަސައްކަތުގައި ބަރަކާތް ލައްވާނެ ކަމެއްކަމަށް ޚުތުބާގައި ބުންޏެވެ. އަދި ދީނުގައި އަންގަވައިފައިވާ ގޮތުގެ މަތީން ނަމާދުތައް އޭގެ ޝަރުތުތަކާއި، ރުކުންތަކާއި، ވާޖިބުތަކާއި، މުސްތަހައްބު ކަންތައް ފުރިހަމަކޮށްފި މީހާއަށް ލިބޭ ފައިދާތައް ގިނައެވެ. އޭގެ ތެރޭގައި:
- ފާހިޝްކަންތައްތަކާއި މުންކަރާތްތަކުން ދުރުހެލިކޮށްދިނުން.
- ވަގުތަށް ކަމޭހިތުން.
- އަމުރަށް ކިޔަމަންވުން.
- މާތްﷲއަށް ބިރުވެތިވެ ޚުޝޫއަތްތެރިވުން.
ނަމާދަކީ އަހަރެމެން އެންމެންގެ މައްޗަށް ފަރުޟުކުރައްވައިފައިވާ އަޅުކަމަކަށް ވީ ހިނދު، ހުކުރުގެ ޖަމާއަތަށް ސަމާލުކަން ދޭ ފަދައިން ފަރުޟު ފަސް ނަމާދަށް ވެސް ސަމާލުކަން ދޭން ޚުތުބާގައި ވަނީ ނަސޭހަތްތެރިވެފައެވެ. އަދި ނުކުޅެދުންތެރިކަން ހުންނަ މީހުންނާއި ޢުމުރުން ދުވަސްވެފައިވާ މީހުން ނަމާދަށް ފަރުވާތެރިވާ މަންޒަރަކީ ނުހަނު އުފާވެރިކަން ހިތަށް ގެނުވާ މަންޒަރެއް ކަމަށް ޚުތުބާގައި ބުންޏެވެ. އެހެންނަމަވެސް ހިތާމައަކީ ޒުވާނުންނާއި ފުރާވަރުގެ ކުދިން މިސްކިތްތަކުން ފެންނަ އަދަދު މަދުވުން ކަމަށް ވެސް ޚުތުބާގައި ބުންޏެވެ.
"ދިވެހިރާއްޖެއަކީ ސައްތައިން ސައްތަ އިސްލާމީ ގައުމެއްކަމުގައި ވީހިނދު ރާއްޖޭގެ ހުރިހާ ކަންކޮޅުތަކެއްގައި ވެސް މިސްކިތްތައް ވަރަށް ގިނަ. ނަމަވެސް ހިތާމައަކީ އެ މިސްކިތްތަކަށް އަރައި ނަމާދުކުރާ މީހުންގެ އަދަދު މަދުވުން،" ޚުތުބާގައި ބުންޏެވެ.
ރީތި މިސްކިތްތަކެއް ކިތަންމެ ބައިވަރު އަދި ކައިރި ކައިރީގައި ބިނާކުރެވުނަސް އެ މިސްކިތްތަކުގެ ފަޅުފިލުވާން އަރާނެ ބަޔަކު ނުވާ ނަމަ އެއީ އަހަރެމެން އެ ކަމާ ބިރުގަންނާން ޖެހޭނެ ކަމެއް ކަމަށް ޚުތުބާގައި ވަނީ ހަނދާންކޮށްދީފައެވެ.