ވަޒީފާގެ އެއްބަސްވުމަކީ ހަމައެކަނި މުސާރަ ހޯދަން ހަދާ އެއްބަސްވުމަކަށް ނުހަދަން ނަސޭހަތްތެރިވެ، ވަޒީފާއަކީ އަމާނާތެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ހުކުރު ޚުތުބާ ޚާއްސަކޮށްފައިވަނީ "މަސައްކަތުގެ އަޚްލާގު" މި މައުޟޫއުގެ މައްޗަށެވެ.
ޚުތުބާގައި ބުނީ، މުޖުތަމައުގައި ހިމެނޭ ގިންތިތަކުގެ ތެރެއިން މުވައްޒަފުންނަކީ އެންމެ މަތިވެރި ސުލޫކުން އެންމެ ފުރިހަމައަށް ޒީނަތްތެރިވާންޖެހޭ މީހުންކަމަށެވެ. އެގޮތުން، ވަޒީފާގެ މައިދާނުން ރިވެތި މާތް އަޚުލާގީ ސިފަތައް ފެންނަންޖެހޭ ކަމަށާއި، ކޮންމެ މުވައްޒަފަކީ އޭނާވާ ކޮންމެ ތަނެއްގައި އޭނާ ހެއްދެވި މަގުސަދު މަތިން ހަނދާންކޮށް، އެ މަގުސަދު ހާސިލުކުރުމަށް މަސައްކަތް ކުރަންޖެހޭނޭ މީހެއް ކަމަށް ޚުތުބާގައި ބުންޏެވެ.
އެ މަގުސަދު ހާސިލްކުރެވޭނީ މާތްﷲއާއި އެކަލާނގެ އަޅާއާ ދެމެދު އޮންނަ ގުޅުން ރަނގަޅު ކުރެވިގެންކަން ފާހަގަކުރައްވާ ޚުތުބާގައި ބުނީ، ދޭދޭ ފަރުދުންގެ މެދުގައި ކުރެވޭ މުއާމަލާތްތަކަކީ އަޚުލާގީ އިމުގެ ތެރެއިން ކުރެވޭ ހެޔޮ މުއާމަލާތްތަކަކަށް ވާންޖެހޭ ކަމަށެވެ.
އިސްލާމީ ޝަރީއަތާއި އަދި ވަޟްޢީ ގާނޫނު ބުނެދޭ މަތިވެރި އަޚްލާގުގެ އެންމެ ކުރީގައި ވަނީ ޢަހުދަށް ރައްކާތެރިވުމެވެ. އެގޮތުން، ހަވާލުކުރެވޭ ޒިންމާ ފުރިހަމައަށް އަދާކޮށް، މުވައްޒަފެއްގެ ހައިސިއްޔަތުން ތިބާ އެއްބަސްވެ، ސޮއިކުރި ވަޒީފާ ބަޔާނާ އެއްގޮތަށް އަމަލުކުރުމަށް ޚުތުބާގައި ވަނީ ނަސޭހަތްތެރިވެފައެވެ. އަދި، ވަޒީފާގެ މަސްއޫލިއްޔަތަކީ މުވައްޒަފު ރައްކާތެރިވާންޖެހޭ ބޮޑު އަމާނާތެއް ކަމަށާއި އެއީ ވެވޭ އަހުދަކާއި އަގުދެއް ކަމަށް ވަނީ ބުނެފައެވެ.
ވަޒީފާގެ އެއްބަސްވުމަކީ ހަމައެކަނި މުސާރަ ލިބިގަތުމަށް ޓަކައި ވެވޭ އެއްބަސްވުމަކަށް ނުހަދާށެވެ! ސޮއިކުރާ އަގުދަކީ އޮފީސް ވަތްގަނޑުގައި ބާއްވާލުމަށް ކުރަހައިލެވޭ ތަސްވީރަކަށް ނުހަދާށެވެ! އެހެނީ، ވަޒީފާ ބަޔާނަކީ ޚިދުމަތް ފޯރުކޮށް ދިނުމަށް ހިފޭ އަހުދު ކަށަވަރެކެވެ. އެހެންކަމުން އެ ޢަޤުދުގައި ލިޔެވިފައިވާ ކޮންމެ ލަފުޒަކަށް، ޖުމްލައަކަށް ފަރުވާތެރިވެ ރައްކާތެރިވާށެވެ! ހުކުރު ޚުތުބާ
ޚުތުބާގައި އެދުނީ ވަޒީފާގެ ތެރެއިން ޚިދުމަތަށް އެދޭ ފަރާތްތަކަށް ފަރުވާތެރިކަމާ އެކު އެ ޚިދުމަތެއްވީ އެންމެ ފުރިހަމައަށް އިހުތިރާމާއި އޯގާތެރިކަމާ އެކު ފޯރުކޮށްދިނުމަށެވެ. މުވައްޒަފުންގެ ފަހަތުން ޚިދުމަތް ލިބިގަންނަ މީހާ ދުވަން ނުޖެހޭގޮތަށް، ތިބާގެ ދުވަހުގެ މަސައްކަތް ތަރުތީބު ކުރުމަށް ނަސޭހަތްތެރިވިއެވެ.
މަސައްކަތުގެ މާހައުލެއް: މިއަދުގެ ޚުތުބާގައި ނަސޭހަތްތެރިވީ ވަޒީފާއަކީ ހަމައެކަނި މުސާރައަށް ކުރާ ކަމަކަށް ނުހެދުމަށް -- ފޮޓޯ/ އިންޓަނެޓް
ވަޒީފާގެ ވެށި ތަހުޒީބު އަމާން ވެށްޓަކަށް ހެދުމަކީ ކޮންމެ މުވައްޒަފެއްގެ ވާޖިބަކަށްވާއިރު، މުވައްޒަފުންގެ މެދުގައި އޮންނަންޖެހޭ އަޚުވަންތަ ގުޅުންތަކަށް ބުރޫ އަރާފަދަ އަމަލުތައް ކުރުމާއި އެފަދަ ވާހަކަތައް ފެތުރުމަކީ ވަޒީފާގެ ވެށި ކިލަނބުކޮށް، ތަޣައްޔަރުކުރާ ކަމެއް ކަމަށް ޚުތުބާގައި ބުންޏެވެ. އެއީ މަސައްކަތުގެ ރޫހު ގެއްލި، މުވައްޒަފުންގެ ކުރިއެރުމަށް ހުރަސްއެޅޭ ކަމެއް ކަމަށް ޚުތުބާގައި ބުންޏެވެ.
ވަޒީފާގެ މުހިއްމު ވަގުތުތައް އޮފީހުން ބޭރުގައި އަމިއްލަ ކަންކަމަށް ހޭދަކުރާއިރު، ހަވާލުވި އަމާނާތުގެ މަތިން ހަނދުމަކުރުމަށް ޚުތުބާގައި ވަނީ ގޮވާލައިފައެވެ. އަފި އޮފީހުގެ ތަކެތި ނަހަމަ ގޮތުގައި ބޭނުން ކުރާއިރު، މާތްﷲ ބައްލަވައިވޮޑިގެންވާކަން ހަނދުމަކުރުމަށް ވެސް ވަނީ ގޮވައިލާފައެވެ. އަދި އޮފީހުގެ ސިއްރުތައް މީސްމީޑިއާގެ މަންސަތަކުގައި ފަތުރާއިރު، ފަހުން ހިތާމަކުރަން ޖެހޭނެކަމަށް ޚުތުބާގައި ބުންޏެވެ.
އޮފީހުގެ ކަރަންޓާއި ފެނަކީ ވެސް އަމާނާތެކެވެ. ފޯނާއި ކަރުދާހާ ދެއްޔަކީވެސް އަމާނާތެކެވެ. އޮފީހުގެ މެޝިނަރީތަކަކީވެސް އަމާނާތެކެވެ. ވަޒީފާއަށް ކަނޑައެޅިފައިވާ ވަގުތަކީ ވެސް އަމާނާތެކެވެ. މުއައްސަސާގެ މުހިއްމު މަސައްކަތްތަކާ ގުޅޭ ވަޒީފާގެ ސިއްރުތައް ހިފެހެއްޓުމަކީވެސް އަމާނާތެކެވެ. އެހެންކަމުން މި އަމާނާތްތަކަށް ރައްކާތެރިވާށެވެ! ހުކުރު ޚުތުބާ
މުވައްޒަފުގެ މައްޗަށް ވާޖިބުތަކެއްވާ ފަދައިން ވަޒީފާ ދޭ ފަރާތުގެ މައްޗަށްވާ ހައްގުތަކެއް ވެސް ވާކަން ފާހަގަކޮށް ޚުތުބާގައި ބުނީ، މުވައްޒަފުގެ ސަލާމަތާއި ރައްކާތެރިކަމަށް ސަމާލުވެ، ކަނޑައެޅިފައިވާ މުސާރައާއި އިނާޔަތްތައް ގަވާއިދުން ދޭންޖެހޭނެ ކަމަށެވެ. ވަޒީފާގެ އުޞޫލުތަކުގެ ތެރެއިން ދޭންޖެހޭ ޗުއްޓީއާއި ހުސްވަގުތު ދީ، މުވައްޒަފުންގެ މެދުގައި އަދުލު އިންސާފު ގާއިމުކޮށް، އޯގާތެރިކަމާ އެކު މުއާމަލާތު ކުރަންޖެހޭނެކަން ޚުތުބާގައި ވަނީ ހަނދާންކޮށްދީފައެވެ.
ދައުލަތާއި، ރައްޔިތުންގެ މުދަލާއި، އާއްމު މިލްކިއްޔާތަށް ރައްކާތެރިވުމަކީ އިސްލާމްދީނުގައި ނުހަނު ބާރުއަޅުއްވައިފައިވާ ކަމެކެވެ. އެހެންކަމުން އެ ލަނޑުދަނޑި ހާސިލުކުރެވޭނީ އެ މުއައްސަސާގެ މަގާމުތަކުގައި ގާބިލު މީހުން ތިބެގެން ކަމަށް ޚުތުބާގައި ވަނީ ބުނެފައެވެ. މަގާމުތަކުގައި ތިބޭ މީހުންގެ ކިބައިގައި ތެދުވެރިކަމާއި އިޚުލާސްތެރިކަން ހުރެގެން މެނުވީ އެ މުއައްސަސާއެއްގެ ހިންގުން ހަލުވިވެގެން ނުދާނެ ކަމަށް ވެސް ޚުތުބާގައި ބުންޏެވެ.
މަސައްކަތުގައި މަކަރުހަދައި، ފަރުވާކުޑަކޮށް، އިހުމާލުވެއްޖެނަމަ މަސައްކަތުގެ ބަރަކާތް ކެނޑިދާނެކަން ފާހަގަކޮށް ޚުތުބާގައި ބުނީ ވަޒީފާގެ ވެއްޓާއި ނިޒާމު އޮންނަންވާނީ، މާތްﷲގެ ރުއްސެވުމާއި ފުއްސެވުން ލިބިގަނެވޭނެ ގޮތަށް ރާވައި ތަރުތީބު ކުރެވިފައި ކަމަށެވެ. އެގޮތުން، ވަޒީފާގެ އުސޫލުތަކާއި ވެށި ބައްޓަންކުރަންވާނީ، ފަރުޟު ނަމާދު އަދާކުރެވޭނޭ ގޮތަށް ކަމަށް ޚުތުބާގައި ބުންޏެވެ.
ވަޒީފާގެ މައިދާނުގައި ވަޒީފާ ދޭ ފަރާތާއި ތިބާއާއި އަދި ތިބާއާއެކު މަސައްކަތްކުރާ މުވައްޒަފުން ދަތުރު ކުރަނީ އެއް ނަވެއްގައިކަން ޚުތުބާގައި ވަނީ ހަނދާންކޮށްދީފައެވެ. އެ ނައު ޣަރަގު ވެއްޖެނަމަ އެންމެން ޣަރަގު ވެދާނެކަމަށް ޚުތުބާގައި ބުންޏެވެ. އަދި އެ ނައު ފަރަކަށް ނާރައި، ނުބެހި ހެޔޮމިސްރާބުގައި ދަތުރުކޮށް، ސަލާމަތުގެ އައްސޭރިއަށް ވާސިލުވެއްޖެނަމަ ދަތުރުގެ އެންމެހާ ބައިވެރިންނަށް އަމާންކަމާ އުފާވެރިކަން ލިބޭނޭކަމަށް ޚުތުބާގައި ބުންޏެވެ.