މުސްލިމް ވޯލްޑް ލީގް (ރާބިޠަތުލް ޢާލަމިލް އިސްލާމީ) ގެ ދަޢުވަތަކަށް އިސްލާމީ މުޖުތަމަޢުތަކުގައި އަންހެން ދަރީންނަށް ތައުލީމުދިނުމާ ބެހޭ ގޮތުން ބާއްވާ ބައިނަލްއަޤުވާމީ ކޮންފަރެންސްގައި ބައިވެރިވެ, އިސްލާމިކް މިނިސްޓަރު ޑރ މުޙައްމަދު ޝަހީމް ޢަލީ ސަޢީދު ތަޤުރީރު ކުރައްވައިފިއެވެ.
ޕާކިސްތާނުގައި އޮތް މި ކޮންފަރެންސްގެ އިލްމުވެރިންގެ ސެޝަންގައި ތަގުރީރު ކުރައްވައި، މިނިސްޓަރު ވިދާޅުވީ، އިސްލާމްދީނަކީ އަންހެނުންނާއި ފިރިހެނުންނަށް ޢިލްމު އުނގަންނައިދިން ދީން ކަމަށެވެ.
އެގޮތުން، އިސްލާމްދީނަކީ އިލްމުގެ ދީން ކަމަށާއި އިންސާނީ ޙަޔާތުގެ އަސާސަކީ އިލްމު ކަމަށް މިނިސްޓަރު ވިދާޅުވިއެވެ.
އިސްލާމްދީން އިލްމު އުނގަންނައިދިނީ ހަމަ އެކަނި ފިރިހެނުންނަށް ނޫންކަމާއި އަންހެނުންނަކީ ވެސް އިލްމުވެރި ބަޔަކަށް ހެދީ އިސްލާމްދީން މިނިސްޓަރު ޝަހީމް ފާހަގަކުރެއްވިއެވެ،
މީގެއިތުރުން، ކީރިތި ރަސޫލާގެ އަނބިކަނބަލުން ޢާއިޝަތުގެފާނަކީ އިލްމުވެެރި ނަމޫނާއެއްކަމަށް މިނިސްޓަރު ޝަހީމް ވިދާޅުވިއެވެ. އަދި، ރަސޫލާގެ ޙަޔާތްޕުޅުގައި އަންހެނުންނަށް އިލްމު ދެއްވުމަށް ވަކި ވަގުތެއް، އިތުރު އެކަލޭގަފާނު ޚާއްޞަ ކުރެއްވިކަން ސާބިތުވާ ކަމަށް މިނިސްޓަރު ވަނީ ވިދާޅުވެފައެވެ.
ޑރ. ޝަހީމް ވަނީ އިލްމު ފެތުރުމަށް ރާބިތާއިންނާއި ސައުދީ އަރަބިއްޔާގެ ސަރުކާރުން އިލްމުފެތުރުމަށް ކުރައްވާ މަސައްކަތްތަކަށް ޝުކުރު އަދާކުރައްވާފައެވެ. އަދި، ޕާކިސްތާނާއި އިސްލާމީ އެންމެހައި ޤައުމުތަކުން އިލްމު ފެތުރުމަށް ކުރައްވާ މަސައްކަތް ޑރ ޝަހީމް ފާހަގަކުރެެއްވިއެވެ.
މިނިސްޓަރު ޝަހީމަކީ މުސްލިމު ވޯލްޑްލީގްގެ ސްޕްރީމް ކައުންސިލްގެ މެންބަރެކެވެ.