ބޭންކުގެ ޚިދުމަތްތައް ފޯރުކޮށްދިނުމަށްޓަކައި އެމެރިކަން އެކްސްޕްރެސް (އެމެކްސް)އާއެކު ދިވެހިރާއްޖޭގެ އާ ޖީލުތަކުން ބޭނުންވާ މާލީ ހައްލުތައް ފޯރުކޮށްދިނުމަށް މަސައްކަތް ކުރައްވާނެ ކަމަށް, ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ރޭ ވިދާޅުވެއްޖެއެވެ.
އެމެކްސްއާއި ބީއެމްއެލްގެ އެކްސްކުލޫސިވް ޕާޓްނާޝިޕަށް 20 އަހަރު ފުރުމުގެ މުނާސަބަތުގައި ބޭއްވި ހަފުލާގައި ވާހަކަ ދައްކަވަމުން ޝަރީފް ވިދާޅުވީ 2004 ވަނަ އަހަރުން ފެށިގެން އެމެކްސްއާއި ބީއެމްއެލްއާ ދެމެދު އޮތް ގުޅުމަކީ ހަމައެކަނި ކާޑު ޕާޓްނަރެއްގެ ގުޅުމެއް ނޫން ކަމަށެވެ. އެ ގުޅުމަކީ ބޭންކެއްގެ ގޮތުގައި ލިބުނު ކުރިއެރުމާއި ކާމިޔާބީގައި ވަރަށް މުހިންމު ދައުރެއް އަދާކޮށްދިން ގުޅުމެއް ކަމަށް ޝަރީފް ވިދާޅުވިއެވެ.
"އެމެކްސް އަކީ ރާއްޖޭގެ މާލީ ދާއިރާގައި މަސައްކަތްކުރަމުންދާ އެތައް ބައެއް ބިނާކުރުމަށް ވަރަށް ބޮޑު އެހީތެރިކަމެއް ދިން ފަރާތެއް. އަދި އެމެކްސް އާއެކު ގާއިމުކުރެވުނީ މުޅި ރާއްޖޭގައި ދުނިޔޭގެ ފެންވަރުގެ ޕޭމަންޓް ނިޒާމެއް ގާއިމްކުރުމުގެ ބިންގަލެއްވެސްމެ،" ޝަރީފް ވިދާޅުވިއެވެ.
ދިވެހިރާއްޖެއަށް އެންމެ ފުރަތަމަ ކްރެޑިޓް ކާޑު ތައާރަފުކުރި ދުވަހުގެ ހަނދާންއާކޮށް ޝަރީފް ވިދާޅުވީ އެ ދުވަސްވަރު ގިނަ ގޮންޖެހުންތަކަކާ ކުރިމަތިވި ކަމަށެވެ. އެއީ އޭރު ރާއްޖެއަށް މުޅިން އައު ޚިދުމަތަކަށްވުމާއެކު އެކަމާ ގުޅޭ މައުލޫމާތާއި ތަޖުރިބާ މަދުވުން ކަމަށެވެ. ނަމަވެސް، ބޭންކުގެ މައިގަނޑު އަމާޒަކަށްވީ އެއްވެސް ލަސްކަމެއް ނުގެނެސް، ހުއްޓުމެއް ނެތި ކަސްޓަމަރުންނަށް އެ ޚިދުމަތް ފޯރުކޮށްދިނުން ކަމަށް ޝަރީފް ވިދާޅުވިއެވެ.
އެމެކްސްއާއި ބީއެމްއެލްގެ އެކްސްކުލޫސިވް ޕާޓްނާޝިޕަށް 20 އަހަރު ފުރުމުގެ މުނާސަބަތުގައި ބޭއްވި ހަފްލާ -- ފޮޓޯ/ ބޭންކު
"އަޅުގަނޑުމެންނަށް އޭރު ދަސްވިކަމަކީ މި ހިތްވަރުގަދަ މަސައްކަތުން އަޅުގަނޑުމެންގެ ކަސްޓަމަރުންނަށް ބޭންކިން ޚިދުމަތް ޒަމާނީކޮށްދޭނެކަމާއި، ވިޔަފާރިތަކާއި ދަތުރުވެރިންނަށް ވެސް ފަސޭހަކަމާއި، ރައްކާތެރިކަމާއި އަދި ލުއިފަސޭހަކަން ލިއްބައިދޭނެކަން،" ޝަރީފް ވިދާޅުވިއެވެ.
އެމެރިކަން އެކްސްޕްރެސްއާއެކު، ބީއެމްއެލްއަށް ހާސިލްވި ލަނޑުދަތިތައް:
- ވަކިވަކި ފަރުދުންނާއި ވިޔަފާރިތަކަށް ދުނިޔޭގެ ފެންވަރުގެ މާލީ ހައްލުތަކަށް ވާސިލުވުމުގެ ބާރު ދިނުން.
- ބީއެމްއެލް އިން އެމެކްސްގެ ހިދުމަތް ބަލައިގަތުން ރާއްޖެއަށް ތަޢާރަފުކޮށް އަވަސް ސްޕީޑެއްގައި ފުޅާކުރުން.
- ބީއެމްއެލް އިން އެމްކްސްއާއެކު "އެކްސްޕީރިއަންސް މޯލްޑިވްސް" ޑެސްޓިނޭޝަން މާކެޓިން ކެމްޕޭން ފެށުން.
- މިއަހަރު ކުރީ ކޮޅު ތައާރަފުކުރި ރާއްޖޭގެ ފުރަތަމަ ޝަރީއާ ހުއްދަކުރާ ކްރެޑިޓް ކާޑު އެމެރިކަން އެކްސްޕްރެސްއާއެކު ތައާރަފުކުރުން.
ޝަރީފް ވިދާޅުވީ ފައިސާ ދެއްކުމާއި ބޭންކިންގެ ދުނިޔެ ބަދަލުވަމުންދާއިރު އެމެކްސްއާއެކު، ބޭންކުން ވަނީ އައު އީޖާދުތަކުގެ ކުރީ ސަފުގައި ތިބުމަށް އަޒުމްކަނޑައަޅާފައި ކަމަށެވެ.
ތިން ލައްކައަށް ވުރެ ގިނަ ކަސްޓަމަރުންނާއި 8،000 އަށް ވުރެ ގިނަ މާޗެންޓުންނާއެކު ބޭންކް އޮފް މޯލްޑިވްސް އަކީ ރާއްޖޭގައި އެންމެ ފުޅާދާއިރާއެއްގައި ކާޑު ދޫކުރުމާއި ކާޑުގެ ޚިދުމަތް ބަލައިގަންނަ ބޭންކެވެ.
މީގެ އިތުރުން ބޭންކް އޮފް މޯލްޑިވްސްއަކީ ރާއްޖޭގައި އެމެރިކަން އެކްސްޕްރެސް ޚިދުމަތް ދިނުމާއި ޚިދުމަތް ބަލައިގަންނަ ހަމައެކަނި ބޭންކެވެ.