ގދ. ހޯނޑެއްދޫގައި ގާއިމުކުރި ފެނާއި ނަރުދަމާ ނިޒާމު ރައީސް ޑރ. މުހައްމަދު މުއިއްޒު މިއަދު އިފުތިތާހުކޮށްދެއްވައިފިއެވެ.
ހޯނޑެއްދޫގައި ގާއިމުކުރި ފެނާއި ނަރުދަމާގެ ޚިދުމަތް އެ މަނިކުފާނު މިއަދު ފައްޓަވައިދެއްވީ ހުވަދުއަތޮޅު ދެކުނުބުރިއަށް ރައީސް މިހާރު ކުރައްވާ ރަސްމީ ދަތުރުފުޅުގެ ތެރެއިން މިއަދު އެ ރަށަށް ވަޑައިގެންނެވެ.
މި މަޝްރޫއަކީ އިންޑިއާގެ ލައިން އޮފް ކްރެޑިޓްގެ ދަށުން ހިންގާފައިވާ މަޝްރޫއެކެވެ.
މިއަދު ވަނީ ހޯނޑެއްދޫގެ ފެނާއި ނަރުދަމާ ނިޒާމު އިފްތިތާހުކޮށްފައި -- ފޮޓޯ/ ރައީސް އޮފީސް
މި މަޝްރޫއަކީ ކުރީ ސަރުކާރުން އިންޑިއާގެ އެގްޒިމް ބޭންކުގެ ލޯނުގައި 'ޓްރެވެނީ އިންޖިނިއަރިން އެންޑް އިންޑަސްޓްރީސް ލިމިޓެޑާ' ހަވާލުކޮށްގެން ކުރިއަށް ގެންދިޔަ މަޝްރޫއެކެވެ.
މި މަޝްރޫއުގެ ދަށުން ހޯނޑެއްދޫގައި ނަރުދަމާގެ ފަސް ޕަމްޕު ސްޓޭޝަން ގާއިމުކޮށްފައިވެއެވެ. އަދި، ދުވާލަކު 75 ޓަނުގެ ފެން އުފެއްދޭ ވަރުގެ ދެ އާރުއޯ ޕްލާންޓު ބަހައްޓާފައިވެއެވެ. މީގެ އިތުރުން، ފެން ރައްކާކުރަން ދެ ޓޭންކު ބަހައްޓައި، މުޅި ރަށް ވަނީ ފެނާއި ނަރުދަމާގެ އެއް ވިއުގައަކުން ގުޅާލައިފައެވެ.
ހޯނޑެއްދޫގައި އޭޓީއެމްއެއް ބަހައްޓަން ހޯނޑެއްދޫ ކައުންސިލާއި ގައުމީ ބޭންކު، ބީއެމްއެލްއާ ދެމެދު ވެސް މިއަދު ވަނީ އެއްބަސްވުމެއްގައި ސޮއިކޮށްފައެވެ.
ހޯނޑެއްދޫގައި އޭޓީއެމްއެއް ބަހައްޓަން ސޮއިކުރަނީ -- ފޮޓޯ/ ރައީސް އޮފީސް
ހޯނޑެއްދޫ ރައްޔިތުންނާ މުޚާތަބުކުރައްވާ ރައީސް މުއިއްޒު ވިދާޅުވީ، ނިމިދިޔަ އަހަރު އިގުތިސާދީ އަޑިގުޑަންތަކުން އަރައިގަތުމަށް ގިނަ މަސައްކަތްތަކެއް ސަރުކާރުން ކުރި ކަމަށެވެ. ބަޖެޓުގައި ހުރި ދަތިކަމުގެ ސަބަބުން ވަކިވަކި ރަށްތަކަށް ގެންނަން ބޭނުންވާ ތަރައްގީގެ އެއްވެސް ކަމެއް ނުކުރެވުނު ކަމަށް އެ މަނިކުފާނު ވިދާޅުވިއެވެ.
ނަމަވެސް، މި ފަހަރުގެ ބަޖެޓަކީ ވަރަށް އުންމީދީ ބަޖެޓެއް ކަމަށާއި، އަމަލީ ގޮތުން ނަތީޖާ ނެރެވޭނެ ކަމަށް އެ މަނިކުފާނު ވިދާޅުވިއެވެ.
އެގޮތުން، ހޯނޑެއްދޫގެ ރަށް ގިރުމާއި، އުދަ އެރުމުގެ މައްސަލައަށް ދާއިމީ ހައްލެއް މި އަހަރު ގެނެސްދެއްވާނެކަމުގެ ޔަގީންކަން ރައީސް މުއިއްޒު ވަނީ އަރުއްވައިފައެވެ. ރަށުގެ މަގުތައް ހެދުމާއި، ސިއްޙީ މަރުކަޒުގެ ޚިދުމަތް 24 ގަޑިއިރު ދެވޭ ފެންވަރަށް ބަދަލުކޮށްދެއްވާނެ ކަމަށް ވެސް އެ މަނިކުފާނު ވިދާޅުވިއެވެ.
ރައީސް ހޯނޑެއްދޫއަށް ޒިޔާރާތްކުރައްވާ ރައްޔިތުންނާ ބައްދަލުކުރައްވަނީ -- ފޮޓޯ/ ރައީސް އޮފީސް
އޭގެ އިތުރުން ރަށަށް ބޭނުންވާ ކުޅިވަރުގެ ވަސީލަތްތައް ގާއިމުކޮށްދެއްވައި، ރިޔާސީ އިންތިޚާބުގެ ތެރޭގައި އެ މަނިކުފާނު ވެވަޑައިގެންނެވި ވައުދުތައް ފުއްދަވައި ދެއްވާނެ ކަމުގެ ޔަގީންކަން ވަނީ އެ ރަށުގެ ރައްޔިތުންނަށް ވެސް ދެއްވައިފައެވެ.
ތިން ދުވަހުގެ މުއްދަތަށް ކުރައްވާ މި ދަތުރުފުޅުގައި ހުވަދުއަތޮޅު ދެކުނުބުރީގެ ފަސް ރަށަކަށާއި، ހުވަދުއަތޮޅު އުތުރުބުރީގެ ހަތަރު ރަށަކަށް ރައީސް ވަޑައިގެންނެވުމަށް ވަނީ ހަމަޖެހިފައެވެ. އެގޮތުން، ހުވަދުއަތޮޅު ދެކުނުބުރިން އެމަނިކުފާނު ވަޑައިގެންނެވުމަށް ހަމަޖެހިފައިވަނީ ހޯނޑެއްދޫ، ނަޑެއްލާ، ވާދޫ، ފިޔޯރީ އަދި ރަތަފަންދޫއަށެވެ. ހުވަދުއަތޮޅު އުތުރުބުރީން އެ މަނިކުފާނުގެ މި ދަތުރުފުޅުގައި ވަޑައިގެންނެވުމަށް ހަމަޖެހިފައި ވަނީ ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫއަށެވެ.
މި ދަތުރުފުޅުގައި އެ މަނިކުފާނުގެ އަރިހުގައި ވަޒީރުންނާއި ސަރުކާރުގެ ބައެއް އިސްވެރިން ބައިވެރިވެވަޑައިގަންނަވައެވެ.
ރައީސް ހުވަދުއަތޮޅުގެ ބައެއް ރަށްރަށަށް ކުރައްވާ މި ދަތުރުފުޅު ނިންމަވާލައްވައި، މާލެ ވަޑައިގެންނެވުމަށް ހަމަޖެހިފައިވަނީ ބުރާސްފަތި ދުވަހެވެ.