މި އަހަރު ރާއްޖޭގެ ޖުމްލަ އެކްސްޕޯޓު އަށް ޕަސަންޓް ދަށަށް ގޮސްފައިވާއިރު، ޖުމްލަ އިމްޕޯޓު ހަތަރު ޕަސަންޓު އިތުރުވެއްޖެއެވެ.
މަރުކަޒީ ބޭންކު، އެމްއެމްއޭއިން އާންމުކޮށްފައިވާ ނޮވެމްބަރުގެ އިކޮނޮމިކް އަޕްޑޭޓުގައިވާ ގޮތުން މި އަހަރުގެ ޖެނުއަރީން އޮކްޓޫބަރުގެ ނިޔަލަށް، ޖުމްލަ އެކްސްޕޯޓު އަށް ޕަސަންޓް ދަށްވިއިރު، އިމްޕޯޓު ހަތަރު ޕަސަންޓުންވީ އިތުރެވެ.
މިދިޔަ އަހަރުގެ އޮކްޓޫބަރުމަހާ އަޅައިބަލާއިރު، މި އަހަރުގެ އޮކްޓޫބަރުގައި އެކްސްޕޯޓު ވަނީ 29 ޕަސަންޓު ދަށްވެފައެވެ. އެހެން ނަމަވެސް މިދިޔަ އަހަރާ އަޅައިބަލާއިރު، އިމްޕޯޓު ދެ ޕަސަންޓު އިތުރެވެ.
މި އަހަރުގެ ޖުމްލަ އެކްސްޕޯޓު ދަށްވެފައިވަނީ ޑޮމެސްޓިކް އެކްސްޕޯޓާއި ރީއެކްސްޕޯޓު ވެސް ދަށްވުމުންނެވެ. ރީއެކްސްޕޯޓު ދަށްވުމުގެ ސަބަބުން، އެ ކެޓަގަރީން ލިބޭ އާމްދަނީ ވަނީ ދަށްވެފައެވެ. އެ ގޮތުން ރާއްޖެއިން ރީއެކްސްޕޯޓުކުރާ ޖެޓް ފިއުލްއިން ލިބޭ އާމްދަނީ ދަށްވިކަން ފާހަގަކޮށްފައިވެއެވެ.
ޑޮމެސްޓިކް އެކްސްޕޯޓު ވެސް ދަށްވެފައިވާއިރު، އޭގެ ތެރެއިން އެންމެ ބޮޑަށް ދަށްވެފައިވަނީ ދަޅު ނުވަތަ ޕެކެޓުގައި ބަންދުކޮށްފައިވާ ކަނޑުމަހާއި، ތާޒާކޮށް، އަދި ފިނިކޮށްގެންނާއި ގަނޑުކޮށްގެން އެކްސްޕޯޓު ކުރާ ކަނޑުމަހުގެ ބާވަތްތަކުން ލިބޭ އާމްދަނީއެވެ.
މި އަހަރުގެ އެކްސްޕޯޓް ދަށްވެފައިވާއިރު، މެއިމަހާއި އޮކްޓޫބަރާ ދޭތެރޭގައި ކޮންމެ މަހަކު ވެސް އެކްސްޕޯޓުކޮށްފައިވަނީ ވިއްސަކަށް މިލިއަން ޑޮލަރުގެ މުދަލެވެ.
މި އަހަރު އިމްޕޯޓަށް ކުރާ ޚަރަދު އިތުރުވެފައިވަނީ މައިގަނޑު ގޮތެއްގައި ރާއްޖެއަށް އިމްޕޯޓު ކޮށްފައިވާ އުޅަނދުތަކާއި އޭގެ ސްޕެއާތަކާއި، ކާބޯތަކެއްޗާއި، ދުންފަތާއި، ފަރުނީޗަރު ފަދަ ތަކެއްޗަށެވެ. އެހެން ނަމަވެސް އިމާރާތް ކުރުމުގައި ބޭނުންކުރާ ސާމާނާއި ތެޔޮ އިމްޕޯޓުކުރާ މިންވަރު ވަނީ މަދުވެފައެވެ.
ރާއްޖެއަކީ އިމްޕޯޓަށް ބަރޯސާވެފައިވާ ގައުމަކަށްވާއިރު، ދަރަނި ބޮޑުވެ، ޑޮލަރުގެ ތާށިކަން ދިމާވެފައިވާ މި ދަނޑިވަޅުގައި ސަރުކާރުން އަންނަނީ އިމްޕޯޓް މަދުކުރުމަށް ފިޔަވަޅުތަކެއް އަޅަމުންނެވެ.
އޭގެ ތެރޭގައި، ރާއްޖެއަށް އެތެރެކުރާ ކާބޯތަކެތީގެ މިންވަރު މަދުކުރުމަށް މާލެ ސަރަހައްދުގައި ދަނޑުވެރިކަން ކުރާ ޒޯނެއް ތަރައްގީ ކުރުމަށް ސަރުކާރުން ރާވައިފައިވެއެވެ.