އުތުރުތިލަފަޅުގައި 200 ހެކްޓަރުގެ ބިން ހިއްކައި، ދަނޑުވެރިކަން ކުރާ ޒޯނެއް ތަރައްގީކުރުމުގެ މަސައްކަތް، ސަރުކާރުން ތަރައްގީކުރާ ފުށިދިއްގަރުފަޅަށް ބަދަލުކޮށްފިއެވެ.
ރައީސް އިބްރާހީމް މުޙައްމަދު ޞާލިޙުގެ ސަރުކާރުން ނިންމާފައިވަނީ އިންޑިއާއާ ހަވާލުކޮށްގެން އުތުރުތިލަފަޅުގައި ކޯސްޓްގާޑުގެ ބަނދަރަކާއި ޑޮކްޔާޑެއް ތަރައްގީ ކުރުމަށެވެ. އަދި އެތަނުގައި ޒަމާނީ، ނޭވަލް ބަނދަރަކާއިި އެތަނަށް ބޭނުންވާ އެހެނިހެން އުމްރާނީ ވަސީލަތްތައް ތަރައްގީ ކުރަން ވެސް އޮތީ ނިންމާފައެވެ.
ނަމަވެސް ރައީސް ޑރ. މުޙައްމަދު މުއިއްޒުގެ މި ސަރުކާރުން ވަނީ, އުތުރުތިލަފަޅުގެ ވަކި ހިސާބެއްގައި ދަނޑުވެރިކަމުގެ ޒޯނެއް ތަރައްގީކުރުމަށް, ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ)އާ މި އަހަރުގެ މާޗު 28ގައި ހަވާލުކޮށްފައެވެ.
ދިވެހި ސަރުކާރުގެ ފަރާތުން އެ މަސައްކަތް ކުރަނީ, މޯލްޑިވްސް އިންޑަސްޓްރިއަލް ޑިވަލޮޕްމެންޓް ފްރީ ޒޯން (އެމްއައިޑީ) އިންއެވެ. އެމްއައިޑީއަކީ ދައުލަތުގެ ފަސް ކުންފުންޏެއް ގުޅިގެން އުފައްދާފައިވާ ޖޮއިންޓް ވެންޗާއެކެވެ. މީގެ ތެރޭގައި ހިމެނެނީ އެސްޓީއޯއާއި، އެމްޕީއެލްއާއި، އެމްޓީސީސީގެ އިތުރުން އެމްއޭސީއެލް އަދި އެޗްޑީސީއެވެ.
ގައުމީ ފެންވަރުގައި ކުރިއަށްގެންދާ މި މަޝްރޫއުގެ މައިގަނޑު އަމާޒަކީ ރާއްޖޭގެ ފުޑް ސެކިއުރިޓީ ވަރުގަދަކޮށް، ރާއްޖޭގައި މޭވާއާއި ތަރުކާރީ އަދި ޕޯލްޓްރީ އުފައްދާމިންވަރު އިތުރުކުރުމާއެކު އިމްޕޯޓަށް ބަރޯސާވާ މިންވަރު މަދުކުރުމެވެ. އަދި އިގްތިސާދީ ތަރައްގީ ހޯދައިދިނުމާއެކު ދަނޑުވެރިކަމުގެ ދާއިރާއަށް އިވެންސްޓްމެންޓް ހޯދުމެވެ.
މި މަޝްރޫއުގެ ފަހުގެ ތަފްސީލް ހިއްސާކުރަމުން އެސްޓީއޯގެ މީޑިއާ އޮފިޝަލް ޔޫސުފް ޝާހު "ސަން"އަށް ވިދާޅުވީ މިހާރު މި މަޝްރޫއު ހިންގުން ފުށިދިއްގަރު ފަޅަށް ބަދަލުކޮށްފައިވާ ކަމަށެވެ.
މަޝްރޫއު މާލެ ސަރަހައްދުގައި ކުރިއަށް ގެންދިއުމުގެ ބޭނުމަކީ، މި ސަރަހައްދުގައި ލޮޖިސްޓިކް ވަސީލަތްތައް ގާއިމްވެފައި ހުރުމާއި، ގިނަ ބަޔަކު މާލެ ސަރަހައްދުގައި އުޅުން ކަމަށެވެ.
އެހެންކަމުން އެންމެ ބޮޑު ޑިމާންޑެއް އޮންނާނެ ކަމަށް ވެސް ބެލެވެނީ މާލެ ސަރަހައްދުގައިކަމަށް ވުމުން، މަޝްރޫއު މި ސަރަހައްދުގައި ކުރިއަށް ގެންދާ ގޮތަށް ކުރިއަށްދަނީ ކަމަށް ޝާހު ވިދާޅުވިއެވެ.
މި މަޝްރޫއުގެ ދަށުން ދަނޑުވެރިކަމުގެ ބާވަތްތަކާއި، ދަނޑުވެރިކަން ކުރުމުގައި ބޭނުންކުރާ ތަކެތި ޑިސްޓްރިބިއުޓްކުރާ ސެންޓަރެއްގައި ގޮތުގައި ދަނޑުވެރިކަމަށް ޚާއްޞަ ޒޯން ތަރައްގީކުރުމަށްވަނީ ނިންމާފައެވެ. އަދި ކުރިން އުތުރުތިލަފަޅުގައި ފަސިންޖަރުންނާއި މުދާ އުފުލާ ޓާމިނަލް ގާއިމްކޮށް، ދަނޑުވެރިކަމުގެ އިންޑަސްޓްރިއަލް ޕާކެއް ވެސް ތަރައްގީކުރުމަށް ވަނީ ހިމަނާފައެވެ.
އެސްޓީއޯއިން ބުނެފައިވަނީ މޭވާއާއި ތަރުކާރީއަށް އަދި ދަނޑުވެރިކަމަށް މީހުން ތަމްރީނުކުރާ ބަޔަކު ވެސް މި މަޝްރޫއު ނިމޭއިރު ތިބޭނެ ކަމަށެވެ.