ހައްޖު ކޯޕަރޭޝަނުން ހައްޖަށް ގެންދާ މީހުންގެ ކޯޓާ ލިބޭ ތަރުތީބު އެކުލަވާލާފައިވާ ލިސްޓަށް މީހުން އިތުރުކޮށް، އެއްވެސް "ގަޑުބަޑެއް" ހަދާފައި ނޯންނާނެ ކަމަށާއި، އެ ލިސްޓު އާންމުންނަށް ފެންނާނެހެން އާއްމުކުރާނެ ކަމަށް މޯލްޑިވްސް ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް މިއަދު ވިދާޅުވެއްޖެއެވެ.
ޝަކީލް އެފަދައިން ވިދާޅުވި އިރު ހައްޖު ލިސްޓާ ގުޅިގެން ބައެއް އާއްމުން އަންނަނީ ކަންބޮޑުވުން ފާޅުކުރަމުންނެވެ.
މިއަހަރު އެ ލިސްޓުގެ ކިޔޫގައި ކުރީގައި ތިބި ބައެއް މީހުން މިފަހުން ޗެކްކުރިއިރު ކިޔޫގެ ފަހަތަށް ޖެހިފައި ތިބި ކަމަށް ބައެއް މީހުން ބުނެއެވެ. "ސަން" އާ އެ ވާހަކަ ހިއްސާކުރި މީހަކު ބުނިގޮތުގައި މިއަހަރު ލިސްޓްގައި 500 ގެ ވަނަ އެއްގައި އޮވެފައި މިހާރު 600 އަށް ވެއްޓިފައިވާ ކަމަށެވެ.
"ހައްޖު ކޯޓާއާ ކުޅޭތީނު ވާނީ މިހެން. އެއްކޮށް ފައިސާ ދައްކައިގެން މި ތިބެނީ ހައްޖަށް ދެވޭނެ ދުވަހެއްގެ އިންތިޒާރުގައި. މިހެން ހެދީމަ ކިހާ ދެރަ," ދެމަފިރިން އެކުގައި ހައްޖަށް ދާން ފައިސާ ދައްކާފައިވާ މީހަކު ކިޔައިދިނެވެ.
އެ ކަންބޮޑުވުމާ ގުޅިގެން "ސަން" އިން ސުވާލުކުރުމުން ޝަކީލް ވަނީ ތަފްސީލްކޮށް ލިސްޓަށް އަންނަ ބަދަލުތައް ހިއްސާކޮށްދެއްވާފައެވެ. އޭނާ ވިދާޅުވީ އެގޮތަށް ދިމާވަނީ ލިސްޓުގެ ކުރިއަށް ބަޔަކު އިތުރުކޮށްގެނެއް ނޫން ކަމަށެވެ.
މިއަހަރު ހައްޖަށް ދެވޭނެ ކަމަށް ސިސްޓަމް ސެޓްކޮށް، ލަފާކޮށްފައި އިނީ 850 މީހުން ނަމަވެސް ހައްޖަށް ދިޔައީ 714 މީހުން ކަމަށް ޝަކީލް ވިދާޅުވިއެވެ. އެހެންކަމުން ބާކީ ތިބި 136 މީހުން ދެން ދާނީ އަންނަ އަހަރު ހައްޖަށް ދާ މީހުންގެ ލިސްޓުގެ ކުރިއަށް ކަމަށް އޭނާ ވިދާޅުވިއެވެ.
"ވާގޮތަކީ މުޅި ލިސްޓު އެއްކޮށް އާންމުކޮށްފަ ނެތީމަ ބަލަން އުނދަގޫތަކެއް ހުންނާނެ. އެކަން އަޅުގަނޑުވެސް ގަބޫލުކުރަން. އެހެންނަމަވެސް 850 މީހުންނަށް ދެވޭނެ ކަމަށް އިންދަ މިއަހަރު މިދިޔައީ 714 މީހުން. ބާކީ 136 މީހުންނަށް ނުދެވޭ. އެ މީހުން މި ކެރީ ފޯވާޑް ވަނީ ޖެހިގެން އަންނަ އަހަރަށް. އެ މީހުން މައްޗަށް ދިޔާމަ ލިސްޓުގަ ދެން ތިބޭ މީހުން މިދަނީ ތިރިއަށް،" ޝަކީލް ވިދާޅުވިއެވެ.
"...ދޭތެރެ މެދަށް މީހުންތަކެއް ލަނީކީއެއް ނޫން. ނުވަތަ ފަހުން ފައިސާ ދައްކާ މީހުންނަކަށް ކިއޫގެ މައްޗަށް އެރެނީކީއެއް ނޫން. އެކަހަލަ އެއްވެސް ކަމެއް ހިނގާކަށް ފުރުސަތެއް ނޯންނާނެ،"
ޝަކީލް ވިދާޅުވީ އެ ކޯޕަރޭޝަނުން މިހާރު މަސައްކަތްކުރަމުން އަންނަނީ މަދު ދުވަސްކޮޅެއްގެ ތެރޭގައި އެ ލިސްޓު އާންމުނަށް ފެންނާނެހެން އާއްމުކުރުމަށް ކަމަށެވެ. އޭރުން ކޮންމެ މީހަކަށް ވެސް ކޮންމެ ގަޑިއެއްގައި ވެސް ލިސްޓު ބަލާލެވޭނެ ކަމަށް ޝަކީލް ވިދާޅުވިއެވެ.
"ލިސްޓު ތެރެއަށް ވަކިން މީހުން ވައްދައިގެން އެ ސަކަރާތް ޖަހާކަށް ނޯންނާނެ ފުރުސަތެއް އިރާދަކުރެއްވިއްޔާ. އަޅުގަނޑު މިތާ ހުރެގެނެއް އިރާދަކުރެއްވިއްޔާ އެ ފުރުސަތެއް ނުދޭނަން. އެއީ ހައްޖަކީ އިސްލާމްދީނުގެ ފަސް ރުކުނުގެ ތެރެއިން އެއް ރުކުން. އެ ރުކުނާ ގުޅޭކަމެއްގަ އެގޮތަށް ގަޑުބަޑުކުރާކަށް ނުދޭނަން ފުރުސަތެއް. އެ ޔަގީންކަން މި އަރުވަނީ،" ޝަކީލް ވިދާޅުވިއެވެ.
ޝަކީލް ވިދާޅުވީ 850 އެއީ "އިމްޕޮސިބަލް" އަދަދެއް ކަމަށެވެ. ރައްޔިތުންނަށް އޮޅޭ ގޮތް ވަނީ އެހެންވެ ކަމަށާއި އަމުދުން ލިސްޓު ފެންނަން ނެތުމުން ރައްޔިތުންނަށް ވާނުވާ ނޭނގި، ސުވާލު ވެސް އުފައްދާނެ ކަމަށް އޭނާ ވިދާޅުވިއެވެ.
"އިންޓާނަލް މަސައްކަތްތައް ކުރަމުން މިއަންނަނީ އިރާދަކުރެއްވިއްޔާ ކުރިއަށް އޮތް މަދު ދުވަސްކޮޅެއްގެ ތެރޭގައި މުޅި ލިސްޓު އެއްކޮށް ޕަބްލިކަށް އެ ކިއުއަށް އަރާ ތަރުތީބުން ފެންނަން އިންނާނެ. ފަހުން ވެސް މީހަކު އޮޑިޓެއް ހަދާލަން ބޭނުންވިޔަސް ބަލާލެވޭނެ ކޮންމެ ގަޑިއަކުވެސް،" ޝަކީލް ވިދާޅުވިއެވެ.
ސަރުކާރުން ވަނީ ޙައްޖަށް މީހުން ގެންދަން ލިބޭ ހުރިހާ ކޯޓާއެއް ޙައްޖު ކޯޕަރޭޝަނަށް ދޭން ނިންމައިފައެވެ.
އެކަމަކު، އަންނަ އަހަރުން ފަށައިގެން ކޯޓާ އިތުރުވެއްޖެ ނަމަ، އިތުރުވާ ބައިން އަމިއްލަ ޖަމާއަތްތަކަށް ދިނުމުގެ ވިސްނުން ވެސް ގެންގުޅުއްވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މީގެ ކުރިން ވިދާޅުވެފައިވެއެވެ.
ޝަކީލް މީގެ ކުރިން ވިދާޅުވި ގޮތުގައި ޙައްޖު ކޯޕަރޭޝަނުން މިހާރު ޙައްޖަށް މީހުން ފޮނުވަނީ ގެއްލުމުގައެވެ. އެ ގޮތުން، މިހާރު ޙައްޖަށް ގެންދާ އަގަކީ 2013 ވަނަ އަހަރު ކަނޑައެޅި އަގެކެވެ. އެއީ، 69،965 ރުފިޔާއެވެ. ޝަކީލް ވިދާޅުވީ، 3،000 މީހުން ޙައްޖަށް ގެންދާނަމަ ޙައްޖު ކޯޕަރޭޝަނުން މިހާރު އިތުރަށް 30 މިލިއަން ރުފިޔާ ޚަރަދުކުރަން ޖެހޭ ކަމަށެވެ.