އަލް ހިޖްރަ ޓްރެވަލް އެންޑް ޓުއާސް ޕްރައިވެޓް ލިމިޓެޑުގެ ފަރާތުން އުމްރާއަށް ގޮސް ނާދެވި، މައްކާގައި ހާލުގައި ޖެހުނު ޢުމްރާވެރިން އިއްޔެ މާލެ ގެނެސްފިއެވެ.
"ސަން"އަށް މައުލޫމާތު ދެމުން މިއަދު ޙައްޖު ކޯޕަރޭޝަންސްގެ ހެޑް އޮފް އޮފީސް އޮޕަރޭޝަންސް އާއިޝަތު ގާހިރު ވިދާޅުވީ، ހާލުގައި ޖުހުނު އުމްރާވެރީން އިއްޔެ ރާއްޖެ ގެނެސްފައިވާ ކަމަށެވެ. އެގޮތުން، އިއްޔެގެ މެންދުރު 13:00 ހާއިރު އުމްރާވެރީންނަށް މާލެ އާދެވިފައިވާ ކަމަށާއި ހުރިހާ އުމްރާވެރީންގެ ހާލު ވެސް ރަނގަޅު ކަމަށް އޭނާ ވަނީ ވިދާޅުވެފައެވެ.
އުމްރާއަށް ގޮސް އެނބުރި މާލެ ނާދެވި މައްކާގައި ހާލުގައި ޖެހިފައި ތިބީ 23 އުމްރާވެރިންނެވެ. އޭގެ ތެރޭގައި 12 އަހަރުން ދަށުގެ ތިން ކުޑަކުދިން ހިމެނެއެވެ.
މި މައްސަލައާ ގުޅިގެން އެ ކުންފުނި 100,000 ރުފިޔާއިން ޖޫރިމަނާކޮށް، އިސްލާމިކް މިނިސްޓްރީން ދޫކޮށްފައިވާ ހުއްދަ ވަނީ މި މަހުގެ ނުވަވަނަ ދުވަހު ހިފަހައްޓާފައެވެ.
ފުލުހުން ބުނީ، އަލް ހިޖްރަ ޓްރެވަލް އެންޑް ޓުވާސްއިން އުމްރާއަށް ދާން މީހުން ދެއްކި ފައިސާއަށް ހިޔާނާތްތެރިވި މައްސަލަ ފުލުހުން ބަލަމުން އަންނަ ކަމަށެވެ. އިސްލާމިކް މިނިސްޓްރީން މި މައްސަލަ ފުލުހުންނަށް ހުށަހަޅާފައިވަނީ ނިމިދިޔަ ބުރާސްފަތި ދުވަހެވެ.
އެ ކުންފުނިން އުމްރާވެރީންގެ ދަތުރަށް ފައިސާ ދެއްކި ނަމަވެސް އުމްރާވެރިންގެ ދެކޮޅު ޓިކެޓު ހަމަނުޖައްސާ އެ ފައިސާއިން ކުންފުނީގެ އެހެނިހެން ކަންކަމަށް ބޭނުންކޮށްފައިވާ ކަމަށް ވަނީ އެއްބަސްވެފައެވެ.