އަލްހިޖްރަ ޓްރެވަލް އެންޑް ޓުއާސް ޕްރައިވެޓް ލިމިޓެޑުގެ ހަވާލުގައި އުމްރާއަށް ގޮސް މައްކާގައި ތާށިވި އުމްރާވެރިން، އަންނަ ހޮނިހިރު ދުވަހު މާލެ ގެންނަން ނިންމާފައިވާ ކަމަށް އިސްލާމިކް މިނިސްޓްރީން މިއަދު ބުނެފިއެވެ.
އުމްރާއަށް ދިޔަ މީހުންގެ ތެރެއިން ހާލުގައި ޖެހިފައި ތިބީ 23 އުމްރާވެރިންނެވެ. އޭގެ ތެރޭގައި، 12 އަހަރުން ދަށުގެ ތިން ކުޑަކުދިން ތިއްބެވެ.
އުމްރާވެރިން ހާލުގައި ޖެހެން މެދުވެރިވީ، އުމްރާވެރިން ދަތުރަށް ފައިސާ ދައްކާފައިވީ ނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަނުޖައްސާ އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާތީކަމަށް އެ ކުންފުނިން ވަނީ އިއުތިރާފުވެފައެވެ.
އެކަމާ ގުޅުވައި އިސްލާމިކް މިނިސްޓަރު މުޙައްމަދު ޝަހީމް ޢަލީ ސައީދު ވިދާޅުވީ، ހާލުގައި ޖެހުނު މީހުން، އެ މިނިސްޓްރީގެ އިރުޝާދުގެ ދަށުން ހައްޖު ކޯޕަރޭޝަންގެ އުމްރާވެރިން ތިބި ހޮޓަލަށް ބަދަލުކޮށްފައިވާ ކަމަށެވެ.
އެ އުމްރާވެރިން އަންނަ ހޮނިހިރު ދުވަހު ހެނދުނު ގަތަރު އެއާވޭސް އިން މާލެއަށް އަންނާނެ ކަމަށް މިނިސްޓަރު ޝަހީމް ވަނީ ވިދާޅުވެފައެވެ.
މި މައްސަލައާ ގުޅިގެން އެކުންފުނި ވަނީ 100,000 ރުފިޔާއިން ޖޫރިމަނާކޮށްފައެވެ. މީގެ އިތުރުން، އެ ކުންފުނީގެ މައްޗަށް އަޅާފައިވާ ފިޔަޅުތަކަކީ:
- ދިވެހިރާއްޖެއިން އުމްރާއަށް މީހުން ގެންދިއުމަށް މިނިސްޓްރީން، އެ ކުންފުންޏަށް ދޫކޮށްފައިވާ ހުއްދަ ހިފެހެއްޓުން.
- އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިޔުމުގެ ހުއްދަނުދިނުން.
- ކުންފުނީގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް މިނިސްޓްރީން ކުރި ޚަރަދު އެ ކުންފިން ހޯދުން.
- އެ ކުންފުނީގެ ފަރާތުން އުސޫލާ ޚިލާފުވެފައިވާތީ އެ މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް ފުލުހުންނަށް ހުށަހެޅުން.
އަލް ހިޖްރަ ޢުމްރާ ގްރޫޕުގެ ހަވާލުގައި އުމްރާއަށް ދިޔަ 23 މީހުންގެ އެ ގްރޫޕު މައްކާއަށް ގެންދިޔައީ ވެސް ތިންބައި ކޮށް، ތިން ފްލައިޓެއްގައި ކަމަށާއި، ހުރުމުގެ އިންތިޒާމުތަކެއް ވެސް ހަމަޖެހިފައި ނެތް ކަމަށް ވަނީ މައުލޫމާތު ލިބިފައެވެ. އެގޮތުން ދަތުރުގެ ތެރެއިން އެއް ރެއަކު، ހޮޓަލުން ވެސް ނިކުންނަށް ޖެހުނު ކަމަށް ވަނީ ބުނެފައެވެ.
މި ކަމާ ގުޅިގެން އެ ޖަމާއަތުގެ ބަހެއް ހޯދަން މަސައްކަތްކުރި ނަމަވެސް، ފޯނަށް ޖަވާބު ނުދޭތީ، ލިބޭ ގޮތެއް ނުވެއެވެ.