އިސްރާއީލުން ހިފާފައިވާ ފަލަސްތީނު ސަރަހައްދުތަކުގައި ވަޒަންވެރިވުން ވީހާވެސް އަވަހަކަށް ނިމުމަކަށް ގެނައުމަށް ގޮވާލައި އދ. އަށް ހުށަހަޅާފައިވާ ގަރާރަށް އޮސްޓްރޭލިއާއިން ވޯޓު ދީފިއެވެ. އިތުރު 156 ގައުމަކާއެކު އޮސްޓްރޭލިއާއިން ވޯޓުދީފައިވާއިރު، މިއީ އޮސްޓްރޭލިއާއާއި އެމެރިކާއާ ދެމެދު ބައިބައިވުން އުފެދުން ކަމަށް ބޭރުގެ ނޫސްތަކުން ރިޕޯޓުކުރެއެވެ.
އެ ގަރާރަށް ތާއީދުކޮށް، އޮސްޓްރޭލިއާ، އިނގިރޭސިވިލާތް އަދި ކެނެޑާ ހިމެނޭ ގޮތަށް އދ.ގެ މެމްބަރު 157 ގައުމަކުން ވަނީ ވޯޓު ދީފައެވެ. އާޖެންޓީނާ، އިސްރާއީލް އަދި އެމެރިކާ ހިމެނޭ ގޮތަށް އަށް ގައުމަކުން ގަރާރާ ދެކޮޅަށް ވޯޓުދީފައިވާއިރު، އިތުރު ހަތް ގައުމަކުން ވަކި ކޮޅަކަށް ވޯޓު ދީފައެއްނުވެއެވެ.
"ދެ ދައުލަތުގެ ހައްލަކީ ނިމުމެއް ނެތް އަނިޔާވެރިކަމުގެ ދައުރު ނިންމާލުމަށް އޮތް ހަމައެކަނި އުންމީދު، ދެ ގައުމުގެ ރައްޔިތުންނަށް ވެސް ރައްކާތެރި އަދި ފާގަތި މުސްތަގުބަލެއް ފެނުމުގެ ހަމައެކަނި އުންމީދު." އާންމު މަޖިލީހުގެ ބައްދަލުވުމުގައި ވާހަކަފުޅު ދައްކަވަމުން އޮސްޓްރޭލިއާއިން އދ. އަށް ކަނޑައަޅާފައި ހުންނަވާ ސަފީރު ޖޭމްސް ލާސެން ވިދާޅުވިއެވެ.
އެ ގަރާރުގައި އިސްރާއީލުން ބައިނަލްއަގުވާމީ ގާނޫނުތަކުގެ ދަށުން ވާޖިބުތަކަށް އަމަލުކުރުމަށް އިސްރާއީލަށް ގޮވާލާފައިވާއިރު، އެ ގަރާރުގައި މި އަހަރުގެ ޖުލައި މަހު ފަލަސްތީނުގައި ވަޒަންވެރިވުން ނިމުމަކަށް ގެނައުމަށް އިންޓަނޭޝަނަލް ކޯޓު އޮފް ޖަސްޓިސް (އައިސީސީ)އިން އިސްރާއީލުގެ މައްޗަށްކޮށްފައިވާ ހުކުމަށް ވެސް އިޝާރާތްކޮށްފައިވެއެވެ. އަދި ޣައްޒާގެ ސަރަހައްދުގެ އާބާދީއަށް ނުވަތަ ސަރަހައްދީ ބަދަލެއް ގެނައުމަށް އިސްރާއީލުން ކުރާ އެއްވެސް މަސައްކަތެއް ކުރުންވެސް އެ ގަރާރު މަނާކުރެއެވެ.
ފަލަސްތީނު ރައްޔިތުންގެ ހައްގުތަކަށް ޚާއްސަ އޮފީހަކަށް ދޫކުރާ ފައިސާއާ ގުޅޭ އދ. ގެ ގަރާރަށް އޮސްޓްރޭލިއާއިން ވަކިކޮޅަކަށް ވޯޓު ނުދިނުމަކީ ވެސް ވޯޓު ދިނުމުގެ ތާރީޚުގައި އޮސްޓްރޭލިއާއިން ގެނައި ބޮޑު ބަދަލެކެވެ.
ދެހާސް ތިން ވަނަ އަހަރުން ފެށިގެން އޮސްޓްރޭލިއާއިން އަންނަނީ އެ ގަރާރާ ދެކޮޅަށް ވޯޓު ދެމުންނެވެ.
ފަލަސްތީނުގެ ބިންތަކުން އިސްރާއީލުން ފޭބުމަށް ގޮވާލައި ހުށަހެޅި ގަރާރަށް އޮސްޓްރޭލިއާއިން ވޯޓު ދިނުމާ ގުޅިގެން އިދިކޮޅު ލީޑަރު ޕީޓާ ޑަޓަން ވިދާޅުވީ ގަރާރަށް ތާއީދު ކުރުން އިދިކޮޅުން ބަލައިނުގަންނަކަމަށެވެ. އަދި ފޯކަސް ކުރަން ޖެހޭނީ ފަލަސްތީނުގެ މިނިވަން ކަމަށް މަސައްކަތްކުރާ ހަމާސް ޖަމާއަތް ބަލިކުރަން ކަމަށްވެސް ޑަޓަން ވިދާޅުވިއެވެ.
"މެދުއިރުމަތީގައި ސުލްހައަށް އަޅުގަނޑުމެންނަށް ކުރެވޭނެ އެންމެ ރަނގަޅު ކަމަކީ ހަމާސް އާއި ހިޒްބުالله ބަލިކޮށް، އީރާނުގައި ތިބި އެމީހުންގެ އޮޕަރޭޓިވް ނިއުކްލިއާ ހަތިޔާރު، ހޫތީން ނުވަތަ އެހެން ވަސީލަތެއް ބޭނުން ނުކުރާކަން ކަށަވަރުކުރުން،" ޑަޓަން ވިދާޅުވިއެވެ.
ނޮވެމްބަރު މަހު ވެސް އޮސްޓްރޭލިއާއިން ވަނީ އިސްރާއީލާ ދެކޮޅަށް ހުށަހެޅި އދ.ގެ ދެ ގަރާރަކަށް ތާއިދުކޮށް ވޯޓު ދީފައެވެ.