ކެންސަރަށް ފަރުވާ ހޯދަމުންދާ ބަލިމީހަކަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)އިން އެހީ ނުލިބޭ ކަމަށް ބުނެ ސޯޝަލް މީޑިއާގައި ދައުރުކުރި ތުހުމަތުތަކަށް ރައްދުދިންއިރު އެ އޭޖެންސީން އާންމުކުރި ބައެއް މައުލޫމާތަށް، އެންސްޕާއިން މިއަދު މައާފަށް އެދިއްޖެއެވެ.
ކެންސަރަށް ފަރުވާ ހޯދަމުން އަންނަ މީހަކަށް ކުރީ ސަރުކާރުގައި އެންސްޕާއިން ދިން ފައިސާގެ އަދަދަށް ވުރެ މަދުން މިހާރު ފައިސާދޭ ކަމަށް ބުނެ ސޯޝަލް މީޑިއާގައި ކޮށްފައިވާ ޕޯސްޓަކާ ގުޅިގެން އިއްޔެ އެ އޭޖެންސީން ވަނީ އެ މީހާއަށް ފޯރުކޮށްދީފައިވާ އެހީގެ ތަފުސީލުތަކެއް ހާމަކޮށްފައެވެ.
މިރޭ އެ އޭޖެންސީން ނެރުނު ބަޔާނެއްގައި ބުނީ، އެ ބަޔާނުގައި އެ ބަލި މީހާއަކީ ކާކުކަން ބުނެފައި ނުވި ނަމަވެސް އެ މީހާއަށް އެންސްޕާއިން ދީފައިވާ އެހީގެ މައުލޫމާތު ހިމަނައިފައިވުމަކީ އެންމެ ރަނގަޅު ގޮތް ނޫން ކަމަށެވެ.
"އެފަދަ މައުލޫމާތެއް ހިމެނިފައިވާތީ އެކަމަށް މި އެޖެންސީން މައާފަށް އެދެމެވެ." އެ ބަޔާނުގައިވެއެވެ.
ސޯޝަލް މީޑިއާ ޕޯސްޓާ ގުޅޭ ގޮތުން މީގެ ކުރިން އެންސްޕާއިން ބުނެފައި ވަނީ އެއީ ހަގީގަތަކާ ޚިލާފު ވާހަކަތަކެއް ކަމަށާއި، އެ ޕޯސްޓާ ގުޅިގެން އެ އޭޖެންސީގެ މުވައްޒަފުން ބަދުނާމުވާ ގޮތަށް ވާހަކަ ދައްކަމުންދާ ކަމަށެވެ.
އެހެންކަމުން، އެ ޕޯސްޓު ކުރި މީހާއާ ބައްދަލުކޮށް ހަމަޖައްސައިދިން އެހީތައް އޭނާގެ ހާޒިރުގައި އެންސްޕާގެ ސިސްޓަމްތަކުން ބެލުމުން، އެ އެހީތައް އެކައުންޓަށް ޖަމާވެފައިވާކަމަށް އެ ފަރާތުން އެއްބަސްވި ކަމަށް އެ ބަޔާނުގައި ވެއެވެ. އަދި އެކްސްގައި ދައުރުކުރި މައުލޫމާތަކީ ސައްހަ މައުލޫމާތު ނޫން ކަމަށް އޭނާ އިއުތިރާފުވެފައި ވާކަމަށް ވެސް އެ ބަޔާނުގައި ވެއެވެ.
އެންސްޕާއިން ބުނި ގޮތުގައި، އެ ޕޭޝަންޓު އާސަންދަ އަދި ވެލްފެއާގެ އެހީއަށް އެދި ހުށަހެޅިކަމަށް ލިޔެކިޔުމުންނާއި ސިސްޓަމުން ފެންނަން އޮތީ ޖުމްލަ ނުވަ ފަހަރެއްގެ މަތިންނެވެ. މި ހުރިހާ ހާލަތެއްގައި އެހީ ހަމަޖައްސައިދީފައި ވާކަން ވެސް ލިޔެކިޔުމުންނާއި ސިސްޓަމުން ފެންނަން އެބަ އޮތް ކަމަށް ބުނެ، އެންސްޕާއިން ވަނީ އެހީގެ ތަފުސީލުތައް އާންމުކޮށްފައެވެ.