ކެންސަރަށް ފަރުވާ ހޯދަމުންދާ ބަލިމީހަކަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)އިން އެހީ ނުލިބޭ ކަމަށް ބުނެ ސޯޝަލް މީޑިއާގައި ދައުރުކުރި ވާހަކަތަކަށް ރައްދުދީ އެންސްޕާއިން ދީފައިވާ އެހީ އެ ކުންފުނިން ހާމަކޮށްފިއެވެ.
ކެންސަރަށް ފަރުވާ ހޯދަމުންދާ މީހަކަށް އެންސްޕާއިން އެހީ ހަމަޖައްސައިނުދިން ކަމަށް ބުނެ ސޯޝަލް މީޑިއާގައި މީހަކު ވަނީ މިފަހުން ޕޯސްޓެއް ކޮށްފައެވެ. އެ ޕޯސްޓާ ގުޅިގެން ގިނަ ބަޔަކު ދަނީ ސަރުކާރަށާއި އެންސްޕާގެ ސީއީއޯ ހީނާ ވަލީދަށް ފާޑުކިޔަމުންނެވެ.
މި ކަމާ ގުޅިގެން އެ އޭޖެންސީން މިރޭ ނެރުނު ބަޔާނެއްގައި ވަނީ އެކްސްގައި ދައުރުކުރަނީ ހަގީގަތަކާ ޚިލާފު ވާހަކަތަކެއް ކަމަށާއި، އެ ޕޯސްޓާ ގުޅިގެން އެ އޭޖެންސީގެ މުވައްޒަފުން ބަދުނާމުވާ ގޮތަށް ވާހަކަ ދެކެވެމުންދާކަން ފާހަގަކޮށްފައެވެ.
އެހެންކަމުން، އެ ޕޯސްޓު ކުރި މީހާއާ ބައްދަލުކޮށް ހަމަޖައްސައިދިން އެހީތައް އޭނާގެ ހާޒިރުގައި އެންސްޕާގެ ސިސްޓަމްތަކުން ބެލުމުން، އެ އެހީތައް އެކައުންޓަށް ޖަމާވެފައިވާކަމަށް އެ ފަރާތުން އެއްބަސްވި ކަމަށް އެ ބަޔާނުގައި ވެއެވެ. އަދި އެކްސްގައި ދައުރުކުރި މައުލޫމާތަކީ ސައްހަ މައުލޫމާތު ނޫން ކަމަށް އޭނާ އިއުތިރާފުވެފައި ވާކަމަށް ވެސް އެ ބަޔާނުގައި ވެއެވެ.
އެންސްޕާއިން ބުނި ގޮތުގައި، އެ ޕޭޝަންޓު އާސަންދަ އަދި ވެލްފެއާގެ އެހީއަށް އެދި ހުށަހެޅިކަމަށް ލިޔެކިޔުމުންނާއި ސިސްޓަމުން ފެންނަން އޮތީ ޖުމްލަ ނުވަ ފަހަރެއްގެ މަތިންނެވެ. މި ހުރިހާ ކޭހަކަށް އެހީ ހަމަޖައްސައިދީފައި ވާކަން ވެސް ލިޔެކިޔުމުންނާއި ސިސްޓަމުން ފެންނަން އެބަ އޮތެވެ.
އެންސްޕާއިން ވަނީ އެ ތަފުސީލުތައް ހިއްސާކޮށްފައެވެ. އެ ގޮތުން:
މި ބަލިމީހާ އެންމެ ފުރަތަމަ އެހީއަށް އެދި ހުށަހަޅާފައިވަނީ 2023ވަނަ އަހަރުގެ މެއި މަހުގައެވެ.
- 5 މެއި 2023ގައި ވެލްފެއާ ކޭސްގެ ދަށުން ފައިސާގެ އެހީގެ ގޮތުގައި 3،855 ރުފިޔާ އާއި ޕޭޝަންޓާއި އޭނާގެ އެހީތެރިޔާގެ ޓިކެޓާއި ބޭސްފަރުވާގެ ފުލް ކަވަރޭޖު ހަމަޖައްސައިދީފައިވޭ
- 10 އޮގަސްޓު 2023ގައި ވެލްފެއާ ކޭސްގެ ދަށުން އަމިއްލައަށް ނަގާފައިވާ އެއް ޓިކެޓުގެ ރިއިމްބާސްމެންޓާއި ފައިސާގެ އެހީގެ ގޮތުގައި ޖުމްލަ 900 ޔޫއެސް ޑޮލަރަށްވާ ދިވެހި ރުފިޔާ އެކައުންޓަށް ޖަމާކޮށްދީފައިވޭ
- 6 ނޮވެންބަރު 2023ގައި އާސަންދަ ކޭސްގެ ދަށުން ބަލިމީހާއާއި އެހީތެރިޔާގެ ޓިކެޓާއި ބަލިމީހާގެ ބޭސްފަރުވާގެ ފުލް ކަވަރޭޖު ހަމަޖައްސައިދީފައިވޭ
- 13 ނޮވެންބަރު 2023ގައި ވެލްފެއާ ކޭސްގެ ދަށުން އާސަންދަ މެދުވެރިކޮށް އިތުރު އެހީތެރިއެއްގެ ޓިކެޓު 3،084 ރުފިޔާ ހަމަޖައްސައިދީފައިވޭ
- 9 މެއި 2024ގައި އާސަންދަ ކޭސްގެ ދަށުން ބަލިމީހާއާއި އެހީތެރިޔާގެ ޓިކެޓާއި ބަލިމީހާގެ ބޭސްފަރުވާގެ ފުލް ކަވަރޭޖު ހަމަޖައްސައިދީފައިވޭ
- 24 މެއި 2024ގައި ވެލްފެއާ ކޭސްގެ ދަށުން ފައިސާގެ އެހީގެ ގޮތުގައި 3،855 ރުފިޔާ ހަމަޖައްސައިދީފައިވޭ
- 27 ނޮވެންބަރު 2024ގައި އާސަންދަ ކޭސްގެ ދަށުން ބަލިމީހާގެ ޓިކެޓާއި ބޭސްފަރިވާގެ ފުލް ކަވަރޭޖު ހަމަޖައްސައިދީފައިވޭ
- 28 ނޮވެންބަރު 2024ގައި ވެލްފެއާ ކޭސްގެ ދަށުން އާސަންދަ މެދުވެރިކޮށް ބަލިމީހާގެ އެހީތެރިޔާގެ ޓިކެޓު އަދި 3،084 ރުފިޔާ ހަމަޖައްސައިދީފައިވޭ
އެންސްޕާއިން ބުނި ގޮތުގައި އެ ފަރާތުން އަމިއްލައަށް ނެގި ޓިކެޓުގެ ރިއިމްބާސްމެންޓުގެ ގޮތުގައި ދެވުނު ފައިސާ ފިޔަވައި، ފައިސާގެ ގޮތުގައި ދީފައިވަނީ 200-250 ޑޮލަރަށްވާ ދިވެހި ރުފިޔާއެވެ. އަދި އެއްވެސް ފަހަރަކު 1000 ޑޮލަރު ދީފައިވާކަން އެއްވެސް ލިޔުމަކުން ފެންނަން ނެތް ކަމަށް ވެސް ބުނެފައިވެއެވެ.
އެހެން ނަމަވެސް ކުރީ ސަރުކާރުގައި 1000 ޑޮލަރު ލިބެމުންދިޔަ ކަމަށް ޓްވީޓުކުރި ފަރާތުން ވަނީ ބުނެފައި ވާތީ އެކަން ބަލާފައި ވާކަމަށް ވެސް އެ ބަޔާނުގައި ވެއެވެ.
އެ ގޮތުން މިދިޔަ ސަރުކާރުގައި އެ ކޭސް އަވަސްކުރުމުގެ ގޮތުން އާސަންދަ ހިންގެވުމާ ހަވާލުވެ ހުންނެވި ފަރާތަށް ގުޅާފައި ދެންނެވުމުން އޭ4 ސައިޒު ގަނޑެއްގައި ސޮއިކުރުވައި 1000 ޑޮލަރު ދިންކަން ހާމަވެފައިވާކަމަށް އެންސްޕާއިން ވަނީ ބުނެފައެވެ.
އެންސްޕާއިން ބުނީ ލިޔެކިޔުމުން ފެންނަން ނެތް ފައިސާއެއް ދޫކޮށްފައިވާނަމަ، އެއީ މިންގަނޑުތަކާ ޚިލާފު، އެހީދޭ ނިޒާމުން ބޭރުން ހިންގާފައިވާ އަމަލެއް ކަމަށެވެ.