ބައިނަލްއަގުވާމީ ކްރެޓިޑް ރޭޓިން އޭޖެންސީ މޫޑީސްއިން ރާއްޖޭގެ މާލީ ހާލަތާ ގުޅިގެން ފާހަގަކޮށްފައިވާ ހިރާސްތައް ގަބޫލުކޮށް، އެ ކަންކަން ރަނގަޅުކުރަން ސަރުކާރުން ފިޔަވަޅު އަޅާނެ ކަމުގެ ޔަގީންކަން ދީފިއެވެ.
މި ސަރުކާރުން އަޅައިފައިވާ މާލީ އިސްލާހީ ފިޔަވަޅުތައް ފާހަގަކޮށް، މޫޑީސްއިން މިއަދުވަނީ ރާއްޖެއަށް ދީފައިވާ ކްރެޑިޓް ރޭޓިން ސީއޭއޭ2ގައި ދަމަހައްޓައިފައެވެ. އެ ގޮތުން ސަރުކާރުން އެޅި ފިޔަވަޅުތަކާއެކު، ބޭރު ފައިސާގެ ރިޒާވް އިތުރުވުމުގެ ފުރުސަތު ބޮޑުކަމަށް މޫޑީސްއިން އަންދާޒާކުރިއިރު، ރާއްޖެއިން ދައްކަން ޖެހޭ ބޮޑު ދަރަންޏާ ގުޅޭ ގޮތުން މި ފަހަރު ވެސް އޮތީ ކަންބޮޑުވުން ފާޅުކޮށްފައެވެ.
މި ކަމާ ގުޅިގެން ފިނޭންސް މިނިސްޓްރީން މިރޭ ނެރުނު ބަޔާނެއްގައި ބުނީ މޫޑީސްއިން އަލިއަޅުވާލާފައިވާ ނުރައްކާތައް ކުޑަކުރުމަށް ޓަކައި ފިޔަވަޅުތަކެއް ތަންފީޒުކުރާނެ ކަމުގެ ޔަގީންކަން ސަރުކާރުން ދޭ ކަމަށެވެ. އަދި ސަރުކާރުގެ އިގްތިސާދީ ރިފޯމް އެޖެންޑާގެ ދަށުން އިގުތިސާދު ފުޅާވެ، މާލީ ގޮތުންނާއި ދަރަނި އަދާކުރުމުގެ ދެމެހެއްޓެނިވިކަން ގާއިމް ކުރެވޭނެ ކަމަށް ބުނެފައިވެއެވެ.
މީގެ އިތުރުން، ބޭރު ފައިސާގެ ގަވައިދާއެކު، ރާއްޖޭގެ ބޭންކިން ނިޒާމުގެ ތެރޭގައި ބޭރު ފައިސާ ތިޔާގިވެ، ރިޒާވް އިތުރުވާނެ ކަމަށް އެ ބަޔާނުގައިވަނީ ލަފާކޮށްފައެވެ.
މީގެ އިތުރުން ޑިޕާޗާ ޓެކުހާއި އެއާޕޯޓު ޑިވަލޮޕްމަންޓަލް ފީ ބޮޑުކުރުމާއެކު ބޭރު ފައިސާގެ ލިކުއިޑިޓީ ރަނގަޅުވާނެ ކަމަށް ވެސް ލަފާކޮށްފައިވެއެވެ.
ރާއްޖޭގެ ދަތި އިގުތިސާދީ ހާލަތުން އަރައިގަތުމަށް ޓަކައި ސަރުކާރުން ވަނީ ޚަރަދު ކުޑަކުރުމުގެ ފިޔަވަޅުތަކެއް އެޅުމަށް ނިންމައިފައެވެ. އެ ގޮތުން އަންނަ އަހަރުގެ ބަޖެޓުގައި ސަބްސިޑީތަކާއި ދައުލަތުގެ ކުންފުނިތަކުގެ ހިންގުން އިސްލާހު ކުރުމާއެކު ޑެފިސިޓްތަކާ ގުޅިގެން އުފެދިފައިވާ ކަންބޮޑުވުންތައް ހައްލުވާނެ ކަމަށް ސަރުކާރުން ވަނީ ލަފާކޮށްފައެވެ.
މީގެ އިތުރުން ވެސް ޕްރަވައިވެޓް ސެކްޓަރާއެކު އިޔާދަކުރަނިވި ހަކަތައާއި ބޯހިޔާވަހިކަން ފަދަ މަޝްރޫއުތަކަށް ފަންޑު ކުރުމަށް ޓަކައި ސަރުކާރުން އިންވެސްޓްމަންޓުތައް ހޯދުމުގެ މަސައްކަތް ކުރަމުން އަންނަކަން މިނިސްޓްރީން ފާހަގަކޮށްފައިވެއެވެ. އެ ގޮތުން އިޔާދަކުރަނިވި ހަކަތައަށް ބޮޑެތި އިންވެސްޓްމަންޓުތައް ހޯދައި، ތެލަށްކުރާ ޚަރަދު ކުޑަ ކުރުމަށް ސަރުކާރުން ވަނީ އަމާޒުހިފައިފައެވެ.
މޫޑީސްއިން ސެޕްޓެމްބަރު މަހު ރޭޓިން ދަށްކުރީ ވެސް، ކުރިއަށް އޮތް ދެ އަހަރު ދައްކަން ޖެހޭ ދަރަނި އިތުރުވުމުންނެވެ. އެގޮތުން އަންނަ އަހަރު ދައްކަންޖެހޭ 600 މިލިއަން ޑޮލަރާއި 2026 ވަނަ އަހަރު ދައްކަންޖެހޭ އެއް ބިލިއަން ޑޮލަރު މޫޑީސްއިން ފާހަގަކޮށްފައިވެއެވެ.
އޭގެ ކުރިން މިދިޔަ އޮގަސްޓް މަހު 29ގައި ފިޗުން ވެސް ވަނީ ރާއްޖޭގެ ރޭޓިން 'ސީސީ'އަށް ދަށްކޮށްފައެވެ.