ބޭރު ފައިސާގެ މައްސަލަ ހައްލުކުރަން މި ސަރުކާރުން އެކުލަވައިލި އާ ގަވާއިދުގެ ދަށުން ބޭރު ފައިސާ ގަނެވިއްކުމުގެ ވިޔަފާރިކުރުމުގެ ލައިސަންސަށް އެދި 98 ވިޔަފާރިއަކުން ހުށަހެޅިއިރު، ކުރިން ދީފައި ހުރި 163 ލައިސަންސް ބާތިލްކޮށްފައިވާ ކަމަށް މަރުކަޒީ ބޭންކު، އެމްއެމްއޭއިން މިއަދު ބުނެފިއެވެ.
"މަނީ އެކްސްޗޭންޖިން ވިޔަފާރިއާ ބެހޭ ގަވާއިދު"ގެ ދަށުން ދެ ބާވަތެއްގެ މަނީ އެކްސްޗޭންޖް ލައިސަންސް ދޫކުރެއެވެ. އެއީ, 'ޓިއާ 1' މަނީ އެކްސްޗޭންޖިން ލައިސަންސާއި 'ޓިއާ 2' މަނީ އެކްސްޗޭންޖިން ލައިސަންސެވެ.
- ޓިއާ 1 މަނީ އެކްސްޗޭންޖިން ލައިސަންސް: ބޭރު ފައިސާ ގަތުމާއި ވިއްކުމުގެ ލައިސަންސް
- ޓިއާ 2 މަނީ އެކްސްޗޭންޖިން ލައިސަންސް: ބޭރު ފައިސާ ވިއްކުމުގެ ލައިސަންސް
މި ލައިސެންސަށް އެދި އެމްއެމްއޭއިން ހުޅުވާލީ އޮކްޓޯބަރު ތިނެއްގައެވެ.
އާ ގަވާއިދުގައި ބުނާ ގޮތަށް ރަޖިސްޓްރީ ކުރަން ހުޅުވާލުމަށްފަހު ސުންގަޑިއާ ހަމައަށް ޖުމްލަ 98 ވިޔަފާރިއަކުން ލައިސަންސަށް އެދި ހުށަހަޅާފައިވާއިރު މުޅިން އަލަށް 49 ވިޔަފާރިއަކުން ވަނީ ލައިސަންސަށް އެދި ހުށަހަޅާފައެވެ. ބާކީ 49 ވިޔަފާރިއަކީ މިހާތަނަށް އެމްއެމްއޭއިން މަނީ ޗޭންޖާ ލައިސަންސް ދޫކޮށްފައިވާ 212 ވިޔަފާރީގެ ތެރެއިން ލައިސެންސަށް އެދި ހުށަހެޅި ވިޔަފާރިތަކެވެ.
ލައިސެންސަށް އެދި ހުށަހެޅި 98 ވިޔަފާރީގެ ތެރޭގައި ޓިއާ 1 ލައިސަންސަށް އެދި 79 އެޕްލިކޭޝަން ހުށަހަޅާފައިވާއިރު ޓިއާ 2 ލައިސަންސަށް އެދި 19 އެޕްލިކޭޝަން ހުށަހަޅާފައިވާ ކަމަށް އެމްއެމްއޭއިން ވަނީ ހާމަކޮށްފައެވެ.
އަލަށް ލައިސެންސަށް އެދި ވިޔަފާރިތަކުން އެޕްލިކޭޝަން ހުށަހެޅިއިރު ކުރިން ދޫކޮށްފައިވާ 163 ލައިސެންސް ވަނީ ބާތިލުކޮށްފައެވެ. އެމްއެމްއޭއިން ހާމަކުރިގޮތުގައި އޭގެތެރޭގައި ހިމެނެނީ ޓިއާ 1ގެ 99 ލައިސެންސަކާއި ޓިއާ 2ގެ 64 ލައިސެންސެކެވެ.
މަރުކަޒީ ބޭންކު، އެމްއެމްއޭއިން ބުނީ އެމްއެމްއޭއިން ދޫކުރާ ލައިސަންސެއް ލިބިގެން ބޭރު ފައިސާ ގަނެވިއްކުމުގެ ވިޔަފާރި ކުރާ ފަރާތްތަކުން، އާ ގަވައިދުގެ ދަށުން ލައިސަންސަށް އެދި ހުށަހަޅާ ހުށަހެޅުމަށް ވަކި ގޮތެއް ނިންމަންދެން މިހާރު ދޫކޮށްފައިވާ ލައިސަންސްގެ ދަށުން ވިޔަފާރި ކުރިއަށް ގެންދެވޭނެ ކަމަށެވެ.
އެމްއެމްއޭއިން ބުނީ އާ ގަވާއިދުގެ ދަށުން ދޫކުރާ ލައިސެންސް ވީހާވެސް އަވަހަށް ދޫކުރުމަށް އެ ބޭންކުން މަސައްކަތްކުރަމުންދާ ކަމަށެވެ. ނަމަވެސް ވަކި މުއްދަތެއް ހާމައެއް ނުކުރެއެވެ. ހަމައެއާއެކު ލައިސެންސް ދޫކުރުމުގައި ވަކި ޝަރުތުތަކެއް ފުރިހަމަކުރަން އަންގާފައިވާނެ ކަމަށް އެމްއެމްއޭއިން ވަނީ ބުނެފައެވެ. އެ ޝަރުތުތަކަކީ:
- ހަމައެކަނި ބޭރު ފައިސާ ގަނެ ވިއްކުމުގެ ވިޔަފާރިއަކަށްވުން.
- އޮޑިޓުކޮށްފައިވާ މާލީ ރިޕޯޓުތައް ހުށަހެޅުން.
- އެމްއެމްއޭއަށް ޖަވާބުދާރީ ވާނެ ކޮމްޕްލަޔަންސް އޮފިސަރަކު ކަނޑައެޅުން.
- ކޮންމެ ވިޔަފާރިއެއްގައި ހުސް ދިވެހިން ތިބުން ލާޒިމުކުރުން.
އެމްއެމްއޭއިން ބުނި ގޮތުގައި އާ ލައިސަންސް ދޫކުރާނީ ޖުމްލަ 50 ފަރާތަށް ވުރެ އިތުރު ނުވާނެހެންނެވެ. އަލަށް ލައިސަންސްއަށް އެދޭ މީހުންގެ އަދަދު އެއަށްވުރެ އިތުުރުވާނަމަ، ލައިސަންސް ދޭނީ ޝަރުތު ހަމަވާ މީހުންގެ މެދުގައި ގުރުއަތު ނަގައިގެން ކަމަށް ވެސް އެމްއެމްއޭއިން ބުންޏެވެ.
މި ގަވައިދުގައިވާ ގޮތުން ޓިއާ 2 ލައިސަންސް ދޫކުރާނީ ޓޫރިޒަމާ ބެހޭ ގާނޫނުގެ ދަށުން ޓޫރިސްޓުން ރިސޯޓު ހިންގަން ހުއްދަ ލިބިފައިވާ ނުވަތަ ލައިސެންސް ލިބިފައިވާ ކުންފުނިތަކަށެވެ.
މި ލައިސަންސުގެ މުއްދަތަކީ ޓޫރިސްޓު ރިސޯޓު ހިންގަން ލިބިފައިވާ ހުއްދަ ނުވަތަ ލައިސަންސްގެ މުއްދަތެވެ. މި ފަރާތްތަކުން ފައިސާ ވިއްކުމުގެ މުއާމަލާތް ކުރަންވާނީ ބޭންކަކާ އެކު ނުވަތަ ޓީއާ 1 ލައިސަންސް އޮންނަ ފަރާތަކާ އެކުއެވެ.
ޓިއާ 2 ލައިސަންސަށް އެދި ހުށަހަޅާއިރު 1300 ޑޮލަރު ދައްކަން ޖެހޭނެއެވެ. އަދި ލައިސަންސް އާކުރުމަށް އެދި ހުށަހަޅާއިރު 650 ޑޮލަރު ދައްކަން ޖެހޭނެކަމަށް ގަވާއިދުގައި ވެއެވެ.