ޖަލުތަކުގައި ހުކުމް ތަންފީޒު ކުރަމުންދާ ގައިދީން ރިހެބިލިޓޭޝަން ޕްރޮގްރާމްތައް ފުރިހަމަ ކުރުމުން، ހުކުމަށް ލުޔާއި މައާފު ލިބުމުގެ ފުރުސަތު ފަހިކޮށްދިނުމަށް ރައީސް ޑރ. މުޙައްމަދު މުއިއްޒު ނިންމަވައިފިއެވެ.
ރައީސް އޮފީހުން ނެރުނު ބަޔާނެއްގައި ވަނީ، ރައީސް އެގޮތަށް ނިންމެވީ އިއްޔެ ކެބިނެޓުގެ ޖަލްސާގައި ހޯމް މިނިސްޓްރީން ހުށަހެޅި ކަރުދާހަކަށް ވަޒީރުންނާ މަޝްވަރާކުރެއްވުމަށްފަހުގައި ކަމަށެވެ.
އެ ބަޔާނުގައިވާ ގޮތުން އެ މަނިކުފާނު ނިންމެވީ، ޖަލުގައި ހިންގާ ރީހެބިލިޓޭޝަން ޕްރޮގްރާމްތަކުގެ ބައެއްގެ ގޮތުގައި ޖަލުގެ އެތެރޭގައާއި ބޭރުގައި ތަފާތު އެކި މަސައްކަތްތައް ކުރުމުގެ ފުރުސަތު ވެސް ގައިދީންނަށް ފަހިކޮށްދިނުމަށެވެ. އަދި އެ ޕްރޮގްރާމްތައް ހޯމް މިނިސްޓްރީއާއި މޯލްޑިވްސް ކަރެކްޝަނަލް ސާވިސްގެ ފަރާތުން ކަނޑައަޅާ އުސޫލުތަކާ އެއްގޮތްވާ ގޮތުގެ މަތިން ފުރިހަމަ ކުރާ މީހުންނަށް، އެކަމާ ގުޅުވައިގެން ކަނޑައަޅާ ނިޒާމެއްގެ ތެރެއިން ހުކުމަށް ލުއި ދިނުމާއި، ހުކުމް މައާފުކޮށްދިނުމުގެ ފަހިކޮށްދިނުމަށެވެ.
ހޯމް މިނިސްޓްރީންގެ ހުށަހެޅި ކަރުދާހުގައިވާ ގޮތަށް އަޅާނެ ފިޔަވަޅުތަކަކީ:
- ރީހެބިލިޓޭޝަން ފްރޭމްވޯކަށް އަމަލުކުރަން ފެށުން
- ޖަލުތަކުގައާއި، ޖަލުން ބޭރުގައި ގައިދީންނަށް ވަޒީފާ އަދާކުރެވޭނެ ފުރުސަތުތައް އިތުރުކުރެވޭނެ ގޮތަށް ނިޒާމް ބަދަލުކުރުން
- ރީހެބިލިޓޭޝަން ފްރޭމްވޯކާއި، މައާފުދިނުމާއި، ޕެރޯލް ހަމަޖެއްސުމާއި ހުކުމަށް ލުއި ދިނުމުގެ ނިޒާމް ގުޅުވާލުން
- ކޮމިއުނިޓީ ސާވިސް އިތުރަށް ފުޅާކުރުމަށް އަޅަންޖެހޭ ފިޔަވަޅުތައް އެޅުން
އެ ކަންކަން ކުރުމަށްޓަކައި ސަރުކާރުގެ ކަމާގުޅުންހުރި އިދާރާތަކާ ހަވާލުކޮށް، އެކަންކަން ތަންފީޒު ކުރުމަށްޓަކައި ކުރަންޖެހޭ މައިގަނޑު ކަންކަން ހާސިލްކުރުމަށް ޓައިމްލައިނެއް އެކުލަވާލައި، އެކަންކަން ހާސިލްކުރެވޭ މިންވަރު ބެލުމަށް ވެސް ނިންމުމުގައިވާ ކަމަށް ރައީސް އޮފީހުން ބުންޏެވެ.
މީގެ ކުރިން ހޯމް މިނިސްޓަރު އަލީ އިހުސާން ވަނީ، ޖަލުތަކުގައި ހުކުމް ތަންފީޒުކުރާ ގައިދީން މަސައްކަތް އުނގެނެން ހޭދަކުރާ ކޮންމެ ދުވަހަކަށް، އެ މީހުންގެ ހުކުމުން ދުވަހެއް އުނިވާނެގޮތަށް ގާނޫނަށް ބަދަލު ގެނައުމަށް ރައީސް ނިންމަވައިފައިވާކަން އިއުލާން ކުރައްވައިފައެވެ.
މިނިސްޓަރު ވިދާޅުވެފައިވަނީ، ރައީސްގެ ވިސްނުންފުޅަކީ ޖަލުގައި ގައިދީން ހޭދަކުރާ މުއްދަތުގައި މަސައްކަތެއް ދަސްކޮށްގެން އާމްދަނީ ލިބޭނެ މަގެއް ހޯދައި، މުޖުތަމައަށް އަނބުރާ އަވަހަށް ނުކުމެވޭނެ ބަޔަކަށް ގައިދީން ހެދުން ކަމަށެވެ.
ގައިދީންގެ އަދަބު ލުއިކޮށްދިނުމަށާއި މައާފު ދިނުމަށް އެދި، މައާފުދިނުމާއި އަދަބު ލުއިކޮށްދިނުމުގެ ގާނޫނު ދަށުން ރައީސަށް ހުށަހެޅޭނެއެވެ.
އެ ގާނޫނުގައި މައާފު ނުދެވޭނެ ކުށްތަކެއް ވެސް ކަނޑައަޅާފައިވެއެވެ. އޭގެ ތެރޭގައި މީހުން މެރުމާއި އިސްލާމީ ޝަރީއަތުގައި ހައްދު ކަނޑައެޅިފައިވާ ކުށްކުށާއި، ޓެރަރިޒަމާއި، ކުޑަކުދިންނަށް ޖިންސީ ގޯނާ ކުރުމުގެ ކުށާއި، ރޭޕް ފަދަ ގަދަކަމުން ބަދު އަހުލާގީ އަމަލު ހިންގުމުގެ ކުށާއި އެއް ޖިންސުން ގުޅުން ހިންގުމުގެ ކުށް ހިމެނެއެވެ. ނަމަވެސް މަރުގެ އަދަބު ދޭން ހުކުމްކޮށްފައިވާ މައްސަލަތަކުގައި، އުމުރު ދުވަހުގެ ޖަލު ހުކުމަކަށް ލުއިކޮށްދިނުމުގެ އިޚުތިޔާރު ރައީސަށް ލިބިދީފައިވެއެވެ.