ޖަލުތަކުގައި ހުކުމް ތަންފީޒުކުރާ ގައިދީން މަސައްކަތް އުނގެނެން ހޭދަކުރާ ކޮންމެ ދުވަހަކަށް، އެ މީހުންގެ ހުކުމުން ދުވަހެއް އުނިވާނެގޮތަށް ގާނޫނަށް ބަދަލު ގެނައުމަށް ރައީސް ޑރ. މުހައްމަދު މުއިއްޒު ނިންމަވާފައި ވާކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
މާފުށީ ޖަލުގައި ގާއިމްކުރި "ދިވެހި ސަގާފީ ގޯތި" ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ، މިއީ ރައީސް ކަނޑައަޅުއްވާފައިވާ އާ ސިޔާސަތެއް ކަމަށެވެ.
"ގައިދީންގެ ތެރެއިން ރިހެބިލިޓޭޝަން މަސައްކަތުގައި ބައިވެރިވާ ކޮންމެ ގައިދީއަކު، އެއީ އެ މީހާ އިލެކްޓްރިކަލް އިންޖިއަނިރިންގެ ދާއިރާއިން ކަމުގައި ވީނަމަވެސް، ރޭނުމުގެ ދާއިރާއިން ވިއަސް ސަގާފީ މަސައްކަތުގެ ދާއިރާއިން ވިއަސް، މަސައްކަތް އުނގެނުމަށް ނުވަތަ މަސައްކަތް ކުރުމަށް މަސައްކަތް ކުރާ ކޮންމެ ދުވަހަކީ އެއީ ޖަލުހުކުމުން އެއް ދުވަސް ކެނޑިގެންދާނެ ދުވަހެއްގެ ގޮތުގައި ހަމަޖެއްސުން،" އިހުސާން ވިދާޅުވިއެވެ.
އެހެންކަމުން މިކަމާ ގުޅިގެން ގާނޫނުތަކާއި ގަވައިދުތަކަށް ގެންނަން ޖެހޭ ބަދަލުތައް ގެނެސް، ހަރުދަނާ ގޮތެއްގައި މިކަން ތަންފީޒުކުރުމަށް މަސައްކަތް ކުރައްވާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، ރައީސްގެ ވިސްނުންފުޅަކީ ޖަލުގައި ގައިދީން ހޭދަކުރާ މުއްދަތުގައި މަސައްކަތެއް ދަސްކޮށްގެން އާމްދަނީ ލިބޭނެ މަގެއް ހޯދާ، މުޖުތަމައަށް އަނބުރާ އަވަހަށް ނުކުމެވޭނެ ބަޔަކަށް ގައިދީން ހެދުން ކަމަށެވެ.
"މިތަނަށް ވަނުމާއެކު އެމީހާގެ އިސްލާހީ މަސައްކަތްތައް ފެށި އެމީހާ ކުރަންޖެހޭ ކަންތައްކޮށް ބަރާބަރަށް ދަސްކުރަންޖެހޭ ކަންތައް ދަސްކޮށްގެން މުޖުތަމައަށް އަނބުރާ ބޭނުންތެރި ދިވެއްސެއްގެ ގޮތުގައި ގޮސް ރާއްޖެ ތަރައްގީކުރުމުގެ މަސައްކަތުގައި އުޅުން އެއީ ރައީސް ތިބޭފުޅުންގެ ފަރާތުން އެދިލައްވާ އެދިލެއްވުމަކީ،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، ޖަލުގައި ތައްޔާރުކުރާ ތަކެތި ޖަލުގެ އެތެރޭގައި އަދި އެއާޕޯޓުގައި ފަތުރުވެރިންނަށް ވިއްކޭނެ މަގުވެސް ފަހިކޮށްދިނުމަށް މަސައްކަތް ކުރައްވާނެކަމަށެވެ.
މިތަކެތި ވިއްކައިގެން ލިބޭ ފައިދާގެ ބައެއް ގައިދީންނަށް އުޖޫރައެއްގެ ގޮތުގައި ދޭނެކަމަށް އޭނާ ވިދާޅުވިއެވެ.
މީގެ އިތުރުން މާލެއާ ކައިރި، ބްރިޖަކުން ގުޅާލެވޭ ހިސާބުގައި ސެންޓްރަލް ޖަލެއް ގާއިމްކުރުމަށް ވެސް މިހާރު ނިންމާފައި ވާކަމަށް މިނިސްޓަރު ވިދާޅުވިއެވެ. މި ޖަލުގެ މަސައްކަތް ތިން އަހަރުތެރޭ ނިންމައި، އޮޕަރޭޝަނަށް ގެނެވުމުން، ޖަލުގައި ގައިދީންނަށް ކުރަންޖެހޭ ޚަރަދު ވެސް ކުޑަވަނެ ކަމަށް މިނިސްޓަރު ވިދާޅުވިއެވެ.
އެހެންކަމުން އުންމީދަކީ ޖަލުތަކަށް ކުރާ ޚަރަދު ކުޑަކޮށް ޖަލުތަކުން ނެރެވޭ ނަތީޖާ އިތުރުކުރުން ކަމަށް މިނިސްޓަރު ވިދާޅުވިއެވެ.