އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕްގެ ވެރިކަމުގައި މެދުއިރުމަތީގެ ކަންކަމާ ބެހޭ އިސް މުޝީރުގެ މަގާމު ދަރިކަނބަލުން ޓިފަނީ ޓްރަމްޕްގެ ފިރިމީހާގެ ބައްޕަ، މަސްއޫދު ބޫލިސްއަށް އަރުވައިފިއެވެ.
"އަރަބި އަދި މެދުއިރުމަތީގެ ކަންކަމާ ބެހޭ ގޮތުން ރައީސްގެ ސީނިއާ އެޑްވައިޒަރެއްގެ ގޮތުގައި މަސްއޫދު ބޫލިސް މަސައްކަތް ކުރައްވާނެކަން ފަޚުރުވެރިކަމާއެކު އިއުލާން ކުރަން," ޓްރަމްޕް ޓްރޫތް ސޯޝަލް ކުރެއްވި ޕޯސްޓެއްގައި ލިޔުއްވާފައިވެއެވެ.
މަސްއޫދަކީ އަކީ ޓްރަމްޕްގެ ކެމްޕޭންގައި މުހިންމު ދައުރެއް އަދާކުރި މީހެކެވެ. އަރަބި އެމެރިކާ އަދި މުސްލިމުންގެ ވޯޓު ހޯދުމަށް ވަރަށް ބޮޑަށް މަސައްކަތްކުރި މީހެކެވެ.
ލުބުނާނު އަދި އެމެރިކާގެ ރައްޔިތުކަން ވެސް އޮންނަ ވިޔަފާރިވެރިޔާ މަސްއޫދަކީ ކުޅަދާނަ ވަކީލެއް އަދި ވިޔަފާރީގެ ދުނިޔޭގައި ވަރަށް އިހުތިރާމް ލިބިގެންވާ ލީޑަރެއް ކަމަށާއި ބައިނަލްއަގުވާމީ މައިދާނުގައި ގިނަ ތަޖުރިބާތަކެއް ލިބިފައިވާ ލީޑަރެއް ކަމަށް ވެސް މެދުއިރުމަތީގެ މުޝީރުގެ މަގާމަށް މަސްއޫދު އައްޔަން ކުރެއްވުމާ ބެހޭ ގޮތުން ޓްރަމްޕް ވިދާޅުވިއެވެ.
މަސްއޫދަކީ ޓްރަމްޕްގެ ދަރިކަނބަލުން ޓިފަނީ ޓްރަމްޕްގެ ފިރިމީހާގެ ބައްޕައެވެ. މަސްއޫދުގެ އިތުރުން ހޮނިހިރު ދުވަހު ޓްރަމްޕް ވަނީ ފަރަންސޭސިވިލާތުގައި ހުންނަވާ އެމެރިކާގެ ސަފީރުގެ މަގާމަށް ރިއަލް އެސްޓޭޓް ޑިވެލޮޕަރު ޗާލްސް ކުޝްނާ ވެސް އައްޔަންކުރައްވާފައެވެ. ކުޝްނަރަކީ ޓްރަމްޕްގެ އަންހެން ދަރިފުޅު އިވާންކާއާ ކައިވެނިކޮށްގެން އުޅޭ ޖޭރެޑް ކުޝްނާގެ ބައްޕައެވެ.
ވެރިކަމުގެ މުހިންމު މަގާމުތަކެއް އާއިލާގެ މެމްބަރުންނަށް އެރުވުމަކީ، ސަރުކާރުގެ ޓްރަމްޕްގެ އާއިލާގެ ނުފޫޒާއި ބާރާމެދު ސުވާލު އުފެދޭ ކަމެއް ކަމަށް ގިނަ ބަޔަކު ބުނެއެވެ.
ސިޔާސީ މަގާމުތައް ފުރުއްވުމަށް ޓްރަމްޕް މީގެކުރިން ވެސް އާއިލާގެ މެމްބަރުން ބޭނުން ކުރައްވާފައިވާއިރު، އެކަމުގެ ސަބަބުން ނެޕޮޓިޒަމް އާއި މަސްލަހަތު ފުށުއެރުންތަކާ މެދު ކަންބޮޑުވުންތަކެއް އުފެދިފައިވާ ކަމަށް ސީއެންއެން އިން ރިޕޯޓުކޮށްފައިވެއެވެ.
ޓްރަމްޕްގެ އެމެރިކާގެ ރައީސްކަން ކުރެއްވި ފުރަތަމަ އަހަރު، 2017 އިން 2021 އަށް އޭނާގެ އަންހެން ދަރިފުޅު އިވާންކާ ޓްރަމްޕާއި އޭނާގެ ފިރިމީހާ ޖޭރެޑް ކުޝްނާ ވަނީ ވެސްޓް ވިންގް އޮފީސްތަކުގެ ސީނިއާ އެޑްވައިޒަރުންގެ ގޮތުގައި މަސައްކަތްކޮށްފައެވެ.
ޓްރަމްޕްގެ ދަރިކަލުން ޑޮނަލްޑް ޓްރަމްޕް ޖޫނިއާ އާއި އެރިކް ޓްރަމްޕް އޭނާގެ ފުރަތަމަ ދައުރުގައި އާއިލީ ރިއަލް އެސްޓޭޓް ވިޔަފާރި ހިންގި ނަމަވެސް 2024ވަނަ އަހަރުގެ ކެމްޕޭންގައި މުހިންމު ދައުރެއް އަދާކުރިއެވެ.
ޖޯޖްޓައުން ޔުނިވާސިޓީން 2020 ވަނަ އަހަރު ގާނޫނީ ދާއިރާއިން ޑިގްރީ ހާސިލް ކުރެއްވި ޓިފަނީ ޓްރަމްޕް އާންމުކޮށް ސިޔާސީ ކަންކަމުގައި ފެނިފައެއް ނުވެއެވެ.
ޓްރަމްޕްގެ ހަގު ދަރިކަނލުން އަދި މި އަހަރުގެ ތެރޭގައި ނިއުޔޯކް ޔުނިވާސިޓީން ކޮލެޖް ފެށި އުމުރުން 18 އަހަރުގެ ބެރަން ޓްރަމްޕް ފާހަގަކުރެވުނީ ގިނަ ޒުވާނުންގެ ވޯޓު ހޯދުމަށް މަސައްކަތްކުރި މީހެއްގެ ގޮތުގައެވެ.