ކާމިޔާބު ހޮރޯ ކޮމެޑީ ފިލްމުތަކުން ބެލުންތެރިންގެ ފަރާތުން ލިބުނު ތަރުހީބާ އެކު އެކްޓަރު ރާޖް ކުމާރު ރާއޯ ހޮރޯ ކޮމެޑީ ފިލްމު ޕްރޮޑިއުސްކުރަން ނިންމައިފިއެވެ.
ފިލްމީ ޚަބަރުތައް ގެނެސްދޭ ޕިންކްވިލާގައި ބުނެފައިވާ ގޮތުން ރާޖް ވަނީ ޑައިރެކްޓަރު އަދިތިޔަ ނިމްބާލްކަރުއާ އެކު ޑާކް ކޮމެޑީ ފިލްމެއްގައި ޕްރޮޑިއުސަރެއްގެ ގޮތުގައި މަސައްކަތް ކުރުމަށް ނިންމާފައެވެ. ވަކި ނަމެއް ހަމަޖެހިފައި ނުވާ މި ފިލްމު އެކްސްކްލޫސިވްކޮށް ސްޓްރީމް ކުރާނީ ނެޓްފްލިކްސްއިން ކަމަށް ޕިންކްވިލާގައި ވަނީ ބުނެފައެވެ.
އަންނަ އަހަރުގެ ޖަނަވަރީ މަހު ފިލްމުގެ މަސައްކަތް ފަށަން ތައްޔާރުވަމުން އަންނައިރު ބެލުންތެރިންނަށް ފިލްމު ގެނެސްދެވޭވަރު ވާނީ އަންނަ އަހަރުގެ ޑިސެމްބަރު މަހު ކަމަށް ރިޕޯޓުތައް ބުނެއެވެ.
ރާޖް އަންހެނުން ޕަތުރަލޭކާއާ އެކު--ފޮޓޯ/ބޮލީވުޑްހަންގާމާ
ޑާކް ކޮމެޑީ ފިލްމުތަކަށް ހުރި ޝައުގެއްގެ ބޮޑު ކަމުން އަލަށް ޕްރޮޑިއުސްކުރަން ނިންމި މި ފިލްމުގެ ސްކްރިޕްޓް ރާޖްއަށް ވަރަށް ބޮޑަށް ކަމުދިޔަ ކަމަށާއި މި ޖޯންރާގެ ހޮރޯ ކޮމެޑީ މިފަހަރު ރާޖް ގެނެސްދޭން ނިންމާފައި ވަނީ އާ ޓުވިސްޓަކާ އެކު ކަމަށް ފިލްމާ ގުޅުންހުރި ފަރާތަކުން މީޑިއާގައި ވަނީ ބުނެފައެވެ.
ރާޖްއާ އެކު މި ފިލްމުގައި ޑައިރެކްޓަރެއްގެ ގޮތުގައި މަސައްކަތް ކުރާ އަދިތިޔަ އަކީ މިދިޔަ ސެޕްޓެމްބަރު މަހު ނެޓްފްލިކްސްއިން ގެނެސްދިން ކްރައިމް ތުރިލަ "ސެކްޓަ 36"ގެ ޑައިރެކްޓަރެވެ. މި ފިލްމު އިއުލާނު ކުރުމުގެ ކުރިން ރާޖް އާއި އަންހެނުން ޕަތުރަލޭކާ ފިލްމު ޕްރޮޑަކްޝަންގެ މަސައްކަތަށް ނުކުންނަން އުޅޭ ކަމަށް ބައެއް މީޑިއާތަކުން ވަނީ ބުނެފައެވެ.
މި އަހަރު ރިލީޒްކޮށް ބޮކްސް އޮފީހުގައި ބޮޑު ކާމިޔާބީއެއް ހޯދި ފިލްމު "އިސްތިރީ 2"ގެ އެކްޓަރު ދެން އެންމެ އަވަހަށް ބެލުންތެރިންނަށް ފެންނާނީ "މާލިކް"ގެ ނަމުގައި އުފައްދާ އެކްޝަން ފިލްމަކުންނެވެ.