ދިވެހިރާއްޖޭގެ ފަތުރުވެރިކަމުގެ ހައި ސީޒަނާ ދިމާކޮށް، ރާއްޖެ އަންނަ ފަތުރުވެރިންގެ ތެރެއިން ޗައިނާގެ ފަތުރުވެރިންނަށް އަމާޒުކޮށްގެން މައުލޫމާތު ދިނުމުގެ ހަރަކާތެއް ފުލުހުން ފަށައިފިއެވެ.
ފުލުހުން ބުނީ މިދިޔަ ހުކުރު ދުވަހު ފެށި މި ހަރަކާތަކީ ރާއްޖެއަށް ޒިޔާރަތްކުރާ ޗައިނާ ފަތުރުވެރިންނަށް ދިމާވާ ހިތާމަވެރި ހާދިސާތައް މަދުކުރުމަށްޓަކައި ދިވެހި ފުލުހުންގެ ޚިދުމަތުގެ ޓުއަރިސްޓް ޕޮލިހުން އިސްނަގައިގެން ފަތުރުވެރިކަމާބެހޭ ވުޒާރާ އަދި ޗައިނާ އެމްބަސީ ގުޅިގެން ކުރިއަށް ގެންދާ ހަރަކާތެއް ކަމަށެވެ.
ރާއްޖެ އަންނަ ފަތުރުވެރިންގެ ތެރެއިން ޗައިނާގެ ފަތުރުވެރިންނަށް އަމާޒުކޮށްގެން ފުލުހުން ކުރިއަށްގެންދާ މައުލޫމާތު ދިނުމުގެ ހަރަކާތުގެ ތެރެއިން --- ފޮޓޯ/ ފުލުހުން
އެގޮތުން ޗައިނާގެ ފަތުރުވެރިން ވެލާނާ އިންޓަނޭޝަނަލް އެއާޕޯޓަށް އައުމާއެކު އެފަތުރުވެރިންނާ ބައްދަލުކޮށް މޫދުގެ އެކި ހަރަކާތްތަކުގައި ބައިވެރިވުމުގައާއި ރާއްޖޭގައި ޗުއްޓީ ހޭދަކުރުމުގައި ސަމާލުކަން ދޭންވީ ކަންތައްތަކާއި ގުޅޭގޮތުން ފުލުހުން އަންނަނީ މައުލޫމާތު ދެމުންނެވެ.
ރާއްޖެ އަންނަ ފަތުރުވެރިންގެ ތެރެއިން ޗައިނާގެ ފަތުރުވެރިންނަށް އަމާޒުކޮށްގެން ފުލުހުން ކުރިއަށްގެންދާ މައުލޫމާތު ދިނުމުގެ ހަރަކާތުގެ ތެރެއިން --- ފޮޓޯ/ ފުލުހުން
މީގެއިތުރުން މި ހަރަކާތުގެ ތެރެއިން ޗައިނާ ބަހުން ތައްޔާރުކޮށްފައިވާ ލީފްލެޓެއް ފަތުރުވެރިންނަށް ދޭއިރު، އެ ލީފްލެޓްގައި މޫދުގެ އެކި ހަރަކާތްތަކުގައި ބައިވެރިވާއިރު ފަތުރުވެރިން ސަމާލުކަންދޭންވީ ކަންތައްތައް ވަނީ ހިމަނާފައެވެ. އަދި ފަތުރުވެރިން ރާއްޖޭގައި އުޅޭއިރު ސަމާލުކަންދޭންވީ ކަންތައްތަކުގެ އިތުރުން ކަމެއް ދިމާވެއްޖެ ހާލަތެއްގައި އަމަލުކުރަންވީ ގޮތުގެ މައުލޫމާތާއި އެމަޖެންސީ ހާލަތްތަކުގައި އަމަލުކުރަންވީ ގޮތުގެ މައުލޫމާތު އެ ލީފްލެޓުގައި ހިމަނާފައި ވާނެކަމަށް ފުލުހުން ވަނީ ބުނެފައެވެ.
އއ. ރަސްދޫގައި އޮކްޓޯބަރު މަހުގެ 14ވަނަ ދުވަހު ސްނޯކްލިންއަށް ގޮސް އުޅެނިކޮށް ޗައިނާ ފަތުރުވެރިއަކު މަރުވެ ހާދިސާއެއް ހިނގާފައި ވެއެވެ. އަދި މިދިޔަ މަހުގެ 15ވަނަ ދުވަހު ޗައިނާ ފަތުރުވެރިއަކަށް ވަނީ މިޔަރެއް ހަމަލާ ދީ ހާދިސާއެއް ހިނގާފައެވެ.
ރާއްޖެއަށް މިވަގުތު އެންމެ ގިނަ ފަތުރުވެރިން ޒިޔާރާތް ކުރާ ގައުމަކީ ވެސް ޗައިނާއެވެ. އެގޮތުން އެ ގައުމުން މިއަހަރުގެ މިހާތަނަށް ވަނީ ދެލައްކަ ސާޅީސްހާހަށް ވުރެ ގިނަ މީހުން އައިސްފައެވެ.