ވ. އަތޮޅުގައި މީހަކު ނުވިހާތާ 12 ވަރަކަށް އަހަރު ވެފައިވާ ކަމަށް އެއަތޮޅު ފެލިދޫގައި ހިންގާ ވ. އަތޮޅު ހޮސްޕިޓަލުން މިއަދު ބުނެފިއެވެ.
ނެޝަނަލް ސްޓެޓިސްޓިކްސް އޮފް ބިއުރޯއިން މިއަދު އާންމުކުރި ވައިޓަލް ސްޓެޓިސްޓިކްސް 2024ގެ ރިޕޯޓުގައިވާ ގޮތުން، ވ. އަތޮޅުގައި 2021ވަނަ އަހަރު އެއްވެސް މީހަކު ވިހާފައެއް ނުވެއެވެ.
އެކަމާ ގުޅުވައި ސުވާލުކުރުމުން ފެލިދޫ ހޮސްޕިޓަލްގެ މެނޭޖަރު އަހުމަދު ނަސްރުﷲ "ސަން" އަށް ވިދާޅުވީ، އެތަނުގައި ހުރި ބެކަޕް ޖަނަރޭޓަރަކަށް މައްސަލައެއް ޖެހިގެން ކުރީގެ ރައީސް މުޙައްމަދު ނަޝީދުގެ ވެރިކަމުގައި ވިހެއުމުގެ ޚިދުމަތް މެދު ކަނޑާލަން ޖެހުނީ ކަމަށެވެ. މިގޮތުން، އޭރުއްސުރެ އެ އަތޮޅުގައި ދިރިއުޅޭ އެންމެން ވިހަން ދަނީ މާލެއަށް ކަމަށް ނަސްރުﷲ ވަނީ ވިދާޅުވެފައެވެ.
އެ ހޮސްޕިޓަލުގައި ވިހެއުމުގެ ޚިދުމަތްތައް ނުލިބުނަސް މާބަނޑު މީހުންނަށް ބޭނުންވާ އެހެނިހެން ޚިދުމަތްތައް ފޯރުކޮށްދޭ ކަމަށް އޭނާ ވިދާޅުވިއެވެ. އެ ޚިދުމަތްތަކުގެ ތެރޭގައި ސްކޭން ހެދުމާއި ޑޮކްޓަރަށް ދެއްކުމުގެ އިތުރުން އެހެން ޚިދުމަތްތައް ދޭއިރު، އަންހެނުންގެ ޚާއްސަ ޑޮކްޓަރަކު އެ ހޮސްޕިޓަލުގައި މަސައްކަތް ކުރާ ކަމަށް ނަސްރު ﷲ ވިދާޅުވިއެވެ.
ވ. ތިނަދޫގެ ގޮނޑުދޮށް: ވ. އަތޮޅުގައި މީހަކު ނުވިހާތާ 12 ވަރަކަށް އަހަރުވެ، އެންމެން ވިހަން މާލެއަށް -- ސަން ފޮޓޯ/ އަހްމަދު އަވްޝަން އިލްޔާސް
އޭގެއިތުރުން، މިހާރު ހުއްޓިފައި އޮތް ވިހެއުމުގެ ޚިދުމަތް އަލުން ފަށަން ސަރުކާރުން މަސައްކަތް ކުރަމުން އަންނަ ކަމަށާއި އެކަމަށް ހޮސްޕިޓަލުން ވެސް ތައްޔާރުވަމުން އަންނަ ކަމަށް ވިދާޅުވިއެވެ.
"ދެން މިހާރު އެހެންނަމަވެސް މި ސަރުކާރުން އެބަ މަސައްކަތް ކުރައްވާ ވަރަށް ބޮޑަށް މެދު ކެނޑިފައި މި އޮތް ވިހެއުމުގެ ޚިދުމަތް ދިނުމަށް. އެގޮތުން، މިހާރު އަޅުގަނޑުމެން ވާނީ ތަނުގެ ކަރަންޓު އަޕްގްރޭޑް ކުރުމުގެ މަސައްކަތަށްދާ ޚަރަދުތަކާއި ވާން ޖެހޭ ތައްޔާރީތައް ވުމަށް އިދާރީ މަސައްކަތްތައް ފަށާފައި." ނަސްރުﷲ ވިދާޅުވިއެވެ.
އޭނާ ވަނީ އެއަތޮޅުގައި މިހާރު ވިހެއުމުގެ ޚިދުމަތް ނުދިން ކަމަށް ވިޔަސް، އަތޮޅުގެ އާބާދީ ކުރިއާ ބަލާއިރު އިތުރުވަމުން އަންނަކަން ފާހަގަކުރައްވާފައެވެ.
މިއަދު އާންމުކުރި ހިސާބުތަކުން ދައްކާގޮތުގައި ވ. އަތޮޅުގެ އިތިރުން ދެން އެންމެ މަދުން ކުދިން ވިއްސާފައި ވަނީ ކ. އަތޮޅު ހޮސްޕިޓަލުގައެވެ. އެ ހޮސްޕިޓަލުގައި ވިއްސާފައި ވަނީ އެންމެ ދެ ކުދިންނެވެ.
އެއާއެކު، އެއަހަރު އެންމެ ގިނައިން މީހުން ވިއްސި ހދ. އަތޮޅުގައި ވަނީ 514 ކުދިން ވިހާފައެވެ. ދެވަނައަށް އެންމެ ގިނައިން މީހުން ވިހެއީ ރ. އަތޮޅުގައެވެ، އެއީ 395 ކުދިން ކަމަށް ހިސާބުތަކުން ދައްކައެވެ.
ދެހާސް އެކާވީސް ވަނަ އަހަރު މާލޭގައި 31،92 ކުދިން ވިއްސިއިރު، އަތޮޅުތެރޭ ރަށްތަކުގައި ވަނީ 2725 ކުދިން ވިހާފައެވެ.