ގދ. ތިނަދޫއަކީ ސިޓީއެއްގެ ގޮތުގައި ކަނޑައެޅީ ގާނޫނާ ހިލާފަށް ކަމަށް ވިދާޅުވެ، ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ މިއަދު މަޖިލީހަށް އެ މައްސަލަ ހުށަހަޅުއްވައިފިއެވެ.
ތިނަދޫ ސިޓީއަކަށް ހެދީ ރިޔާސީ އިންތިޚާބުގެ ކެމްޕޭންތެރޭގައި ކުރީގެ ރައީސް އިބްރާހީމް މުޙައްމަދު ޞާލިޙު, މިދިޔަ އަހަރުގެ އޮގަސްޓް 30 ގައެވެ. ފަހުން މި ސަރުކާރުން ވެސް ނިންމީ އެކަން އެގޮތަށް ބާއްވާށެވެ.
ނަމަވެސް ތިނަދޫއަށް ސިޓީއެއްގެ ދަރަޖަ ދީފައިވަނީ ގާނޫނާ ހިލާފަށް ކަމަށް ބުނެ، ހައިކޯޓަށް ދުސްތޫރީ މައްސަަލައެއް ވެސް މި ފަހުން ހުށަހެޅިއެވެ. އެކަމަކު، އެ މައްސަލަ ހުށަހެޅުއްވުމާ ގުޅިގެން ރައީސް ޑރ. މުޙައްމަދު މުއިއްޒު ވަނީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީގެ ޑެޕިއުޓީ މިނިސްޓަރު މުހައްމަދު ރާޣިބު މަގާމުން ވަކިކޮށްފައެވެ.
މެންބަރު ސައުދުﷲ މިއަދު މަޖިލީހަށް ހުށަހެޅުއްވި މައްސަލައިގައިވަނީ ތިނަދޫގެ އާބާދީގައި 10،150 މީހުން ހަމަވާ ކަމަށް ބުނަނީ އޮޅުވާލައިގެން ކަމަށެވެ. އޭނާ ތުހުމަތުކުރެއްވި ގޮތުގައި އެކަން އެގޮތަށް ކުރީ، ތިނަދުއަށް އިންތިޚާބުވި ކައުންސިލަރުން މޭޔަރުންނަށްވުމުގެ ބޭނުމުގައާއި އޭރުގެ ރައީސް އިބްރާހިމް މުހައްމަދު ޞާލިޙަށް، ތިނަދޫ ސިޓީއަކަށް ހައްދަވާނެ ކަމަށް ވައުދުވެވަޑައިގެންނެވިފައި އޮތުމުގެ ސަބަބުންނެވެ.
އޭނާ ވިދާޅުވީ، ތިނަދޫގެ އާބާދީގައި 10،000 ހަމަކޮށްފައިވަނީ ތަކުރާރުކޮށް މީހުންގެ ނަންތައް ހިމަނައިގެންނާއި އޮޅުވާލައިގެން އެހެން މީހުން އާބާދީގައި ހިމަނައިގެންނެވެ.
ސައުދުﷲ ތުހުމަތުކުރެއްވި ގޮތުގައި ތިނަދޫގެ އާބާދީގައި 10،000 ހަމަވާ ކަމަށް ނިންމާފައިވަނީ ކައުންސިލުން ފޮނުވި ލިސްޓް އެއްވެސް ވަރަކަށް ޔަގީންނުކޮށެވެ. އެހެންވެ، ކައުންސިލްތަކަށް ދައުލަތުގެ މާލިއްޔާއިން ދޭ ބްލޮކް ގްރާންޓް ވެސް އޮޅުވާލައިގެން ހޯދުމުގެ ފުރުސަތު އޮތް ކަމަށް އޭނާ ވިދާޅުވިއެވެ.
އޭނާ ވިދާޅުވީ، އެފަދައިން ކަންތައްކުރުމުން އެހެން ރަށްރަށުން ވެސް 10،000 މީހުން ހަމަނުވަނީސް ސިޓީއަކަށް ހަދަން އޮޅުވާލައިގެން ހުށަހެޅުމުގެ ފުރުސަތު އޮންނަ ކަމަށެވެ.
އެހެންވެ، މަޖިލީހުގެ ކަމާ ގުޅުންހުރި ކޮމިޓީން މި މައްސަލަ ބަލައި، ކަމާ ގުޅުންހުރި އިދާރާތައް މަޖިލީހަށް ހާޒިރުކުރަން އެދި ސައުދުﷲ ވަނީ ހުށަހަޅުއްވައިފައެވެ.
ތިނަދޫއަށް ދީފައިވާ ސިޓީގެ ދަރަޖަ ބާތިލުކުރަން ހުށަހަޅާފައިވަނީ ވެސް މިހާރު ތިނަދޫގެ އަބާދީގައި ތިބީ 7,924 މީހުން ކަމަށް ބުނެފައެވެ. ހައިކޯޓު ރިސެސްގައި އޮތުމުގެ ސަބަބުން އެ މައްސަލަ މިހާތަނަށް ބަލަން ފަށާފައެއް ނުވެއެވެ.