ސިއްހީ ހާލުކޮޅު ހުރިިގޮތުން އެގްރިކަލްޗާ އެންޑް އެނިމަލް ވެލްފެއާ މިނިސްޓަރު ޑރ. އައިޝަތު ރަމީލާ މިއަދު އިސްތިއުފާދެއްވައިފިއެވެ.
މިނިސްޓަރު ރަމީލާ ގެންދެވީ ކެންސަރު ބައްޔަށް ބޭސްކުރައްވަމުންނެވެ.
ރައީސް ޑރ. މުހައްމަދު މުއިއްޒު މިއަދު ނެރުއްވި ބަޔާނެއްގައި ވިދާޅުވީ، ސިއްހީ ހާލުކޮޅު ހުރިގޮތުން ރަމީލާ މިނިސްޓަރުކަމުން އިސްތިއުފާދެއްވާފައިވާތީ، އެކަން ގަބޫލުކުރައްވާފައިވާ ކަމަށެވެ.
އަލާސްކަންފުޅުގައި އުޅުއްވަމުން ވެސް، ގާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދީ، ދައުލަތުގެ ކަންތައްތައް ރަނގަޅަށް ހިންގުމުގައި ކުރައްވާފައިވާ މަސައްކަތްތަކަށް ރައީސް މުއިއްޒު ވަނީ ރަމީލާއަށް ޝުކުރު އަދާކުރައްވާފައެވެ.
"ތެދުވެރިކަމާއި ވިސްނުންތެރިކަމާ އެކު، ސަރުކާރަށް ކޮށްދެއްވި އަގުހުރި ޚިދުމަތްތަކަށްޓަކައި އަޅުގަނޑު ވަރަށް އިޚުލާޞްތެރިކަމާ އެކު ޝުކުރުއަދާކުރަމެވެ،" ރައީސްގެ ބަޔާނުގައި ވިދާޅުވެފައިވެއެވެ.
ރައީސް ވިދާޅުވީ، ރަމީލާ ފަދަ ހީވާގި، އަމާނާތްތެރި، ގާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ އެ މަނިކުފާނަށް ލިބިފަޑައިގެން އުފަލެއް ކަމަށެވެ. އަދި، ކުރިއަށް އޮތް ތަނުގައި ރަމީލާގެ ޚިދުމަތް ގައުމަށް ލިބޭނެކަން ޔަގީންކުރާ ކަމަށް އެ މަނިކުފާނު ވިދާޅުވިއެވެ.
އެ މަނިކުފާނު ވަނީ ރަމީލާއަށް ސާބިތުކަން ދެއްވައި، އަވަސް އަދި ދާއިމީ ޝިފާއެއް މިންވަރުކުރެއްވުން އެދި ދުޢާ ދަންނަވައިފައެވެ.
މިނިސްޓަރުކަމާ މިދިޔަ އަހަރުގެ 17 ނޮވެމްބަރުގައި ހަވާލުވެވަޑައިގަތުމަށް ފަހު ވެސް މި އަހަރުގެ ފެބްރުއަރީ މަހާ ޖެހެންދެން ރަމީލާ ގިނަ ދުވަސްތަކެއް ރާއްޖެއިން ބޭރުގައި ފަރުވާ ހޯއްދަވަން ހޭދަކުރެއްވިއެވެ.
އެގްރިކަލްޗާ އެންޑް އެނިމަލް ވެލްފެއާ މިނިސްޓްރީއަކީ މި ސަރުކާރުުން އަލަށް އުފެއްދި މިނިސްޓްރީއެކެވެ. އެ މިނިސްޓްރީގެ މައިގަނޑު މަސައްކަތަކީ ދަނޑުވެރިކަން ބެލެހެއްޓުމާއި ޖަނަވާރާ ގުޅޭ ކަންކަން ބެލުމެވެ.
ރަމީލާ އިސްތިއުފާދެއްވި ނަމަވެސް، އެ މިނިސްޓްރީގެ ހިންގުން ވަގުތީ ގޮތުން އެހެން ބޭފުޅަކާ ހަވާލުކުރެއްވި ކަމެއް ނުވަތަ ނޫން ކަމެއް ސަރުކާރުން ހާމަކޮށްފައެއް ނުވެއެވެ.
މީގެ ކުރިން މާލީ ވަޒީރަކަށް ހުންނެވި ޑރ. މުހައްމަދު ޝަފީގު ވެސް މަގާމުން އިސްތިއުފާދެއްވިއެވެ. އެ މަގާމަށް ފަހުން އައްޔަންކުރީ އޭރު ފޮރިން މިނިސްޓަރަކަށް ހުންނެވި މޫސާ ޒަމީރެވެ. ފޮރިން މިނިސްޓަރުކަމަށް އައްޔަންކުރެއްވީ އޭރު ހެލްތު މިނިސްޓަރަކަށް ހުންނެވި ޑރ. އަބްދުﷲ ޚަލީލެވެ. ހެލްތު މިނިސްޓަރަކަށް އައްޔަންކުރެއްވީ އޭރު ރައީސް އޮފީހުގެ މިނިސްޓަރުކަމުގައި ހުންނެވި އަބްދުﷲ ނާޒިމެވެ.