ދިރާގުން 'ލިމިޓެއް ނެތް' އިންޓަނެޓް ޕްކޭޖުތަކެއް މިރޭ ތައާރަފްކޮށްފިއެވެ.
މި ޕެކޭޖުތައް ތައާރަފްކޮށްފައި ވަނީ މިރޭ ދިރާގު ހެޑް އޮފީހުގައި ބޭއްވި ރަސްމިއްޔާތެއްގައެވެ.
ދިރާގުން ބުނީ، މިރޭ ތައާރަފްކުރި ޕެކޭޖުތަކާ އެއްކޮށް، ކުރިއަށް ވުރެ ފެންވަރު ރަނގަޅުކޮށް ކަސްޓަމަރުންނަށް ރަނގަޅު ޚިދުމަތެއް ދިނުމަށް މަގުފަހިވާނެ ކަމަށެވެ.
މިގޮތުން، ލިމިޓެއް ނެތް 20 އެމްބީޕީއެސް އިން ފެށިގެން އެއް ޖީއެމްޕީއެސް ފައިބާ ބޮރޯޑްބޭންޑް ޕްކޭޖުތަކާ ހަމައަށް ދިރާގުގެ ކަސްޓަމަރުންނަށް ކުރިން ލިބޭ ޚިދުމަތަށް ވުރެ ރަނގަޅު ފެންވަރުގެ އިންޓަނެޓު ލިބޭނެ ކަމަށެވެ. އަދި އެކި ސްޕީޑުތަކާއި ހުސްނުވާ ޑޭޓާ އެލަވަންސްތަކާ އެއްކޮށް ލިބޭނެ ކަމަށް ދިރާގުން ވަނީ ބުނެފައެވެ.
މި ޕެކޭޖުތަކަކީ ކަސްޓަމަރުންގެ ޑިޖިޓަލް ދިރިއުޅުމަށް ފެތޭ، ލިމިޓެއް ނެތް ގޮތަށް ސްޓްރީމްކޮށް، ގޭމު ކުޅުމުގެ އިތުރަށް ބްރައުޒްކުރުމަށް ފުރިހަމަ ޕެކޭޖުތަކެކެވެ،
މި ރަސްމިއްޔާތުގައި ދިރާގުގެ ޗީފް ކޮމާޝަލް އޮފިސަރު އަލީ ރިޔާޒް ވިދާޅުވީ، މުއާސަލަތީ ގޮތުން ރާއްޖެ ގުޅުވާލައި، ޑިޖިޓަލް މުސްތަގްބަލަކަށް ކަސްޓަމަރުން ތައްޔާރުކުރުމަކީ ވަރަށް ބޮޑު އަހަންމިއްޔަތުކަމެއް ދޭ ކަމެއް ކަމަށެވެ.
"އަޅުގަނޑުމެން ކުރާ ހުރިހާ ކަމެއްގައި ވެސް އެންމެ ބޮޑު އިސްކަމެއް ދެނީ އަޅުގަނޑުމެންގެ ކަސްޓަމަރުންނަށް. އަދި ދިރާގުން އަބަދު ވެސް މަސައްކަތް ކުރަނީ ކަސްޓަމަރުންނާ ހަމައަށް އިޖާދީ، ޑިޖިޓަލް ހައްލުތައް ގެނެސްދީ އެފަރާތްތަކުގެ ދިރިއުޅުން އިތުރަށް ފާގަތިކުރުމަށް،" އޭނާ ވިދާޅުވިއެވެ.
ދިރާގުގެ ފައިބާ ބްރޯޑްބޭންޑް ނެޓްވޯކަކީ ރާއްޖޭގައި އެންމެ ހަލުވި ސްޕީޑުގައި އަދި، އެންމެ ފުޅާ ދައިރާއެއްގައި ކަވަރޭޖް ފޯރުކޮށްދޭ ނެޓްވޯކު ކަމަށްވާއިރު، މިހާރު ރާއްޖޭގެ 95 އިންސައްތައަށް ވުރެ ގިނަ ގޭބީސީތަކަށް ދިރާގުގެ އިންޓަނެޓް ޚިދުމަތް ފޯރުކޮށްދެއެވެ.