މި މަހުގެ 22 ވަނަ ދުވަހު ރިލީޒްކުރި އަބީޝެކް ބައްޗަންގެ ފިލްމު "އައި ވޯންޓް ޓު ޓޯކް"އަކީ އެކްޓަރުގެ ކެރިއަރުގެ އެންމެ މޮޅު ފިލްމު ކަމަށް ކުރީގެ ބަތަލާ ޝަބާނާ އަޒްމީ ބުނެފިއެވެ.
ކާމިޔާބު ފިލްމުތަކެއް ގެނެސްދީފައިވާ ޝޫޖިތު ސިރުކާ ޑައިރެކްޓް ކޮށްފައިވާ މި ފިލްމަކީ ރިތޭޝް ޝާހްގެ ސްކްރީންޕްލޭ އަކަށް ހަދާފައިވާ ފިލްމެކެވެ. ފިލްމުގައި އަބީޝެކް ކުޅެފައިވާ ރޯލަށް ވަރަށް ފުރިހަމައަށް އިންސާފުކޮށްފައިވާ ކަމަށާއި ޝައްކެއްނެތް ގޮތުގައި މިއީ އަބީޝެކްގެ ކެރިއަރުގައި އެކްޓަރުގެ ހުނަރު އެންމެ ރަގަޅަށް ފެނުނު ފިލްމު ކަމަށް ޝަބާނާ ވަނީ ބުނެފައެވެ.
ފިލްމުގައި އަބީޝެކް ކުޅެފައި ވަނީ ކެންސަރު ބަލިން ސަލާމަތްވުމަށް ފަހު ވެސް ދިމާވާ ތަފާތު ސިއްހީ މައްސަލަތަކާ އެކު ފުރާވަރަށް އަރަމުން އަންނަ އަންހެން ކުއްޖަކު ބެލުމުގެ ޒިންމާ އަދާކުރާ ބައްޕައެއްގެ ރޯލެވެ.
އަބީޝެކް ދަރިފުޅު އަރާދިއާއާ އެކު--ފޮޓޯ/ޕިންކްވިލާ
ހަގީގީ ހާދިސާއަކަށް ބިނާކޮށް އުފައްދާފައިވާ މި ފިލްމުގެ ވަރަށް ގިނަ މަންޒަރުތައް ނަގަމުން ދިޔައިރު ދަރިފުޅު އަރާދިއާ މަތިން ހަނދާންވި ކަމަށާއި ފިލްމުގައި އުޅޭ އަންހެން ކުއްޖާއަކީ ވެސް އަރާދިއާއާ އެއް އުމުރުއްގެ ކުއްޖަކު ކަމަށް އެކްޓަރު ވަނީ ބުނެފައެވެ. ހަމައެއާއެކު ވަރަށް ގިނަ ފަހަރު ޖަޒުބާތުގައި ޖެހި ފެންކަޅިވާ ފަދަ މަންޒަރުތައް ފިލްމުގައި ހިމެނޭ ކަމަށް އަބީޝެކް ވަނީ ބުނެފައެވެ.
އަބީޝެކްގެ ހުނަރު މޮޅުވެފައި ފިލްމުގައި ގެނެސްދިން ވާހަކަ ފުރިހަމަވި ނަމަވެސް ބޮކްސް އޮފީހުގައި ފިލްމަށް ކާމިޔާބު ލިބޭގޮތެއް ނުވިއެވެ.
ފިލްމަށް ލިބިފައިވާ ޕޮޒިޓިވް ރިވިއުސްތައް ލިބިފައިވީ ނަމަވެސް މި ފިލްމުގައި ރަގަޅުކޮށްލަންޖެހޭ ވަރަށް ގިނަ ކަންކަން އެބަހުރި ކަމަށް ކްރިޓިކުން ވަނީ ބުނެފައެވެ.
އަބީޝެކް ދެން އެންމެ އަވަހަށް ބެލުންތެރިންނަށް ފެންނާނީ މިހާރު މަސައްކަތް ފަށާފައިވާ ފިލްމު "ހައުސްފުލް 5" އަދި "ބީ ހެޕީ"އިންނެވެ.