މަގުމަތީގައި ދިރިއުޅޭ ބުޅާތަކަށް ޚާއްސަކޮށް، 24ގަޑިއިރުގެ ޚިދުމަތާ އެކު ސަރުކާރުން ގާއިމްކުރި ޕެޓް ކެއާ ފެސިލިޓީ، "އޮޅު ހިޔާ" މިއަދު ހުޅުވައިފިއެވެ.
މިތަން ހުޅުވަފައި ވަނީ، މިއަދު ހުޅުމާލެ ދެވަނަ ފިޔަވައްސާ ގުޅިފައި އޮތް ފަރުކޮޅުފުށީގައި ބޭއްވި ރަސްމިއްޔާތެއްގައި ރައީސް ޑރ. މުހައްމަދު މުއިއްޒެވެ. މި ރަސްމިއްޔާތުގައި ނައިބު ރައީސް ހުސައިން މުހައްމަދު ލަތީފާއި މިނިސްޓާ އޮފް އެނިމަލް އެންޑް ވެލްފެއާ ޑރ. އާއިޝަތު ރަމީލާގެ އިތުރުން މާލޭސިޓީގެ މޭޔަރު އާދަމް އާޒިމް ވެސް ބައިވެރިވެ ވަޑައިގަތެވެ.
މި ރަސްމިއްޔާތުގައި ވާހަކަ ދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ، އެމަނިކުފާނު މޭޔަރުކަމާ ހަވާލުވުމަމުގެ ކުރިން ހުންނެވި މޭޔަރަށް، މާލޭގައި ޕެޓް ކެއާ ފެސިލިޓީއެއް އެޅުމަށް ބިމެއް ސަރުކާރުން ހަމަޖެއްސި ކަމަށެވެ. ނަމަވެސް، އެމަނިކުފާނު މޭޔަރުކަމާ ހަވާލުވުމުން ޕެޓް ކެއާ ފެސިލިޓީ އެޅުމުގެ ފުރުސަތު ކުރީ ސަރުކާރުން ނުދިން ކަމަށާއި، ބިން ހޯދުމަށް އަހަރެއްހާ ދުވަހު މަސައްކަތް ކުރަން ޖެހުނު ކަމަށް އެމަނިކުފާނު ވިދާޅުވިއެވެ.
"...ސަރުކާރުގެ ތެރެއިން އެ ބޭނުންވާ އެއްބާރުލުން އަޅުގަނޑަކަށް ނުލިބުން. ނުދެއްވި،" ރައީސް ވިދާޅުވިއެވެ.
އެއަށްފަހު ރިޔާސީ އިންތިޚާބުގައި އެމަނިކުފާނަށް ފުރުސަތެއް ދެއްވައިފި ނަމަ، މާލޭ ރައްޔިތުންނަށް ކުރިމަތިވެފައިވާ ބުޅަލުގެ މައްސަލަ ހައްލުކޮށްދިނުމަށް ވައުދުވެވަޑައިގެން ކަމަށް ރައީސް ވިދާޅުވިއެވެ.
އެހެންކަމުން، ހަފުތާ 14ގައި ހިމަނައިގެން މި މަސައްކަތް ފެށިކަމަށާއި އެނިމަލްވެލްފެއާއަށް ޚާއްސަކޮށް މުޅިން އަލަށް ވުޒާރާއެއް އުފެއްދެވި ކަމަށް ވެސް ރައީސް ވިދާޅުވިއެވެ.
"އަޅުގަނޑު ބޭނުންވީ އޭރުގެ ތަޖުރިބާގެ އަލީގައި، ސަރުކާރުން އިސްކަން ނުދިނުމުން ނުވި ކަންތައް، ސަރުކާރުން އިސްވެ ކައުންސިލް މެދުވެރިކޮށް ކުރެވޭގޮތް ހަމަޖައްސަން،" ރައީސް ވިދާޅުވިއެވެ.
ޕެޓް ކެއާ ފެސިލިޓީ، "އޮޅު ހިޔާ" ހުޅުއްވައިދެއްވުމަށް ފަހު، ރައީސް ވަނީ އެތަން ބައްލަވައިލައްވާފައެވެ.
މީގެ ކުރިން މިތަނާ ގުޅިގެން ވާހަކަ ދައްކަވަމުން މާލޭ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވީ، ކައުންސިލުން ވިސްނަނީ އެތަނަށް ގެންދާ ބުޅާތައް އެއް ތަނެެއްގައި ބަހައްޓައިގެން މޮނިޓާ ކުރުމަށް ކަމަށެވެ.
އެގޮތުން، އެކަމަށް ބޭނުންވާ ތިން ކޭޖެއް ހަދާ ކަމަށާއި އެ ކޭޖުތައް ހަދަނީ 20 ޕަސެންޓު ހިޔާކޮށްފައި ކަމަށް މޭޔަރު އާޒިމް ވިދާޅުވިއެވެ.
ބުޅާ ފެސިލިޓީ އެޅުމުގެ އަމަލީ މަސައްކަތް ފަށާފައި ވަނީ މާޗު މަހުގެ 19ވަނަ ދުވަހެވެ.
މާލޭގައި ބުޅާ ގިނަވެފައިވާއިރު، އޭގެ ސަބަބުން ސިއްހީ އެތައް މައްސަލަތަކެއް ވެސް ކުރިމަތިވެއެވެ. މޭޔަރު މީގެ ކުރިން ވިދާޅުވީ މާލޭގައި ބުޅަލުގެ އާބާދީ 3،000އަށް އަރާނެ ކަމަށް ލަފާކުރެވޭ ކަމަށެވެ.
މާލޭގެ އެކި ސަރައްހައްދުތަކުގައި ބުޅާ ނަޖިސް ގިނަވާތީ، ޚާއްސަކޮށް ސަލްމާން މިސްކިތް ސަރަހައްދަށް ދާ މީހުނަށް އެ ތަކެއްޗަށް އެރޭ ހާދިސާތައް ދިމާވާކަން އާޒިމް ފާހަގަކުރެއްވިއެވެ.
ފަރުކޮޅުފުށީގައި ކެޓް ޝެލްޓަރު ގާއިމުކުރަނީ 5،000 އަކަފޫޓުގެ ބިމެއްގައެވެ. މި ތަނުގައި ކެޓް ޝެލްޓަރު ގާއިމު ކުރުމުން މާލޭގައި އުޅޭ ބުޅާތައް ގެންގޮސް، ފަރުވާ ދިނުމުގެ އިންތިޒާމު ގާއިމުކުރާނެއެވެ. މި ފެސިލިޓީއަކީ 24 ގަޑިއިރު ޚިދުމަތް ދޭނެ ފެސިލިޓީއެކެވެ.