އިންޑިއާގެ މަޝްހޫރު ޓީވީ ބަތަލާ ރީމާ ޝައިހް ޗުއްޓީ ހޭދަކޮށްލުމަށް ރާއްޖެ އަތުވެއްޖެއެވެ.
ރީމާ ރާއްޖެއަށް އައިސްފައިވާ ސީދާ ތާރީޚު ހާމަކޮށްފައި ނެތް ނަމަވެސް ބަތަލާ ޗުއްޓީ ހޭދަކުރަމުން އަންނަ އޯގާ އާޓް ރިސޯޓުގައި ނަގާފައިވާ ފޮޓޯތައް އަންނަނީ ސޯޝަލް މީޑިއާގައި ޕޯސްޓު ކުރަމުންނެވެ.
ރީމާ މަންމަ ކަލްޔާނީއާ އެކު ރާއްޖޭގައި--ފޮޓޯ/އިންސްޓަގްރާމް
އަމިއްލަ އިންސްޓަގްރާމްގައި ޕޯސްޓުކޮށްފައިވާ ފޮޓޯތަކުން އެނގޭ ގޮތުގައި ރީމާ ރާއްޖެއަށް ކުރި ދަތުރަކީ ބަތަލާގެ މަންމަ ޝީތަލް ޝައިހްގެ އުފަންދުވަސް ފާހަގަކުރުމުގެ ގޮތުން ކުރި ހާއްސަ ދަތުރެކެވެ.
ޓެލެވިޒަން ޑްރާމްތަކުން މަގުބޫލުވުމުގެ އިތުރުން އުމުރުން 22 އަހަރުގެ ރީމާ އަކީ ސްޓައިލްޝް ލުކްތަކާއި ފެޝަންއަށް ލޯބިކުރާ މީހުންގެ މެދުގައި ވެސް މަގުބޫލު މޫނެކެވެ.
ރީމާ ރާއްޖޭގައި ޗުއްޓީ ހޭދަކުރަމުން އަންނަ ރިސޯޓުގައި ނަގާފައިވާ ފޮޓޯއެއް--ފޮޓޯ/ޕިންކްވިލާ
ޢުމުރުން އެންމެ ހަ އަހަރުގައި އެކްޓިންގް ކެރިއަރު ފެށި ޒުވާން ބަތަލާ ވަނީ ޓީވީ ސިލްސިލާތަކުގެ އިތުރުން ބައެއް ފިލްމުތަކުން ވެސް ފެނިފައެވެ. ހަމައެއާއެކު މިއުޒިކް ވީޑިއޯތަކާއި ބައެއް ވެބް ސީރީސްތައް ވެސް ރީމާ ވަނީ ކުޅެފައެވެ.
ޓީވީ ސިލްސިލާ "ޔޭ ރިޝްތާ ކިޔާ ކެހެލާތާ ހޭ"އިން ބޮޑު މަގުބޫލުކަމެއް ލިބުމާ އެކު ރީމާއަށް ޓެލެވިޒަން ދުނިޔެއިން އިތުރު ފުރުސަތުތައް މަގުފަހިވިއެވެ. ރީމާ އެންމެ ފަހުން ބެލުންތެރިންނަށް ފެނިފައި ވަނީ ކަލަސް ޓީވީއިން މިދިޔަ އަހަރު ގެނެސްދިން ޑްރާމާ ސިލްސިލާ "ތެރޭ އިޝްގް މޭ ގާޔަލް"އިންނެވެ.
ރީމާ އަންނަނީ "ބަޓަފްލައިސް" އަދި "ވޯލްޑްސް ފޭކެސްޓް ގްރޭޓެސްޓް ލަވް ސްޓޯރީ"ގެ ނަމުގައި އުފައްދާ ދެ ވެބް ސީރީސްއެއްގައި ވެސް މަސައްކަތް ކުރަމުންނެވެ.