އިސްރާއިލްގެ ބޮޑުވަޒީރު ބެންޖަމެން ނަތަންޔާހޫ ރާއްޖެ ވަޑައިގެންފި ނަމަ ހައްޔަރު ކުރާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ނަތަންޔާހޫ ރާއްޖެ އަތުވެއްޖެނަމަ ހައްޔަރުކުރާނެތޯ އަހައި ސޯޝަލް މީޑިއާގައި ކޮށްފައިވާ ސުވާލަކަށް ޖަވާބުދެއްވައި އިހުސާން ވިދާޅުވީ ރާއްޖެއަކީ އިންޓަނޭޝަނަލް ކޯޓުތަކުގެ އަމުރުތައް ވަކި މީހަކު އިސްތިސްނާނުކޮށް ތަންފީޒުކުރާނެ ގައުމެއް ކަމަށެވެ.
މި ވާހަކަތަކާ ގުޅުވައި "ސަން"އަށް އިތުރަށް މައުލޫމާތު ދެއްވަމުން އިހުސާން ވިދާޅުވީ، ނަތަންޔާހޫ ހައްޔަރުކުރަން ނެރެފައިވާ އަމުރު ވެސް ރާއްޖޭގައި ތަންފީޒު ކުރާނެ ކަމަށެވެ.
ބައިނަލްއަގްވާމީ ޖިނާއީ ކޯޓު (އައިސީސީ)އިން ވަނީ ނަތަންޔާހޫގެ އިތުރުން ޑިފެންސް ސެކެޓްރީ ޔޯވް ގަލަންޓް ހައްޔަރު ކުރަން މީގެ ހަފުތާއެއް ކުރީން އަމުރެއް ނެރެފައެވެ.
އެ އަމުރާ ގުޅިގެން މީގެ ކުރިން ރައީސް ޑރ. މުޙައްމަދު މުއިއްޒު ވަނީ ބައިނަލްއަގުވާމީ ޖިނާއީ ކޯޓުން އަޅާ ފިޔަވަޅަށް ރާއްޖޭން އިހުތިރާމު ކުރާ ކަމަށް ވިދާޅުވެ، އެ ކޯޓުން ނިންމުން ތަންފީޒު ކުރުމުގެ މުހިންމުކަން ވެސް ފާހަގަކުރައްވާފައެވެ.
އިސްރާއީލުން ޣައްޒާގައި ހިންގަމުންދާ ގަތުލްއާންމާ ގުޅިގެން އެގައުމުގެ ޕާސްޕޯޓް މަނާކުރަން މި ސަރުކާރުން ނިންމައި، ރައްޔިތުންގެ މަޖިލީހަށް ވަނީ ބިލެއް ހުށަހަޅައިފައެވެ. ނަމަވެސް، ވެރިކަން ކުރާ މައި ޕާޓީ ޕީއެންސީގެ އަޣުލަބިއްޔަތު އޮތް މަޖިލީހުގައި ބިލުގެ މަސައްކަތްތައް ލަސްވާތީ ސަރުކާރަށް ވަނީ ފާޑުކިޔުން އަމާޒުވެފައެވެ.
މީގެ އިތުރުން ޕާސްޕޯޓް މަނާކުރުމާ ގުޅޭ ގޮތުން މިހާރު ޕީއެންސީގެ މެންބަރުންގެ ރާގު ބަދަލުވެ، މުޅިން މަނާނުކުރާ ގޮތަށް ވާހަކަ ދައްކަވަމުންދާތީ ގިނަ ބަޔަކު އަންނަނީ ނުރުހުން ފާޅުކުރަމުންނެވެ.