އިސްރާއީލްގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރަން އިންޓަނޭޝަނަލް ކްރިމިނަލް ކޯޓް (އައިސީސީ)އިން ނެރުނު އަމުރަށް ރައީސް ޑރ. މުޙައްމަދު މުއިއްޒު މަރުހަބާ ވިދާޅުވެއްޖެއެވެ.
އައިސީސީން ވަނީ، ހަނގުރާމައިގެ ޖަރީމާތައް ހިންގުމުގެ ތުހުމަތުގައި ނަތަންޔާހޫ ހައްޔަރުކުރުމުގެ އަމުރެއް ނެރެފައެވެ.
އެ އަމުރާ ގުޅުވައި އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، އައިސީސީގެ ނިންމުމަށް ރާއްޖެއިން މަރުހަބާ ކިޔާ ކަމަށާއި މިއީ ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޖަރީމާތަކަށް ޒިންމާދާރުކުރުވުމަށް އެޅޭ މުހިންމު ފިޔަވަޅެއް ކަމަށެވެ.
"ރާއްޖެއިން އައިސީސީގެ ނިންމުމަށް އިޙުތިރާމުކޮށް، ކޯޓުގެ ނިންމުން ތަންފީޒުކުރުމުގެ މުހިންމުކަން ފާހަގަކުރަން،" އެ މަނިކުފާނު ވިދާޅުވިއެވެ.
މީގެ އިތުރުން ރައިސް ވަނީ، މެދުއިރުމަތީގެ ސުލްހައަށް ޓަކައި ބައިނަލްއަގުވާމީ ގާނޫނުތައް ނަގަހައްޓައި ފަލަސްތީނުގެ ރައްޔިތުންނަށް އިންސާފު ހޯދައިދިނުމަކީ ކޮންމެހެން ކުރަން ޖެހޭ ކަމެއްގެ ގޮތުގައި ސިފަކުރައްވައިފައެވެ.
އިޒްރޭލުން ފަލަސްތީނަށް ދެމުންދާ ހަމަލާތަކާ ގުޅިގެން އިޒްރޭލުގެ މީހުންނަށް ރާއްޖެ ނާދެވޭގޮތަށް އެ ގައުމުގެ ޕާސްޕޯޓު މަނާކުރަން ގާނޫނުތަކަށް ބަދަލުގެންނަން ކެބިނެޓުން ވަނީ މިދިޔަ ޖޫން މަހުގެ ދެވަނަ ދުވަހު ނިންމައިފައެވެ.
އޭރު އިޒްރޭލު ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށްޓަކައި ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމް އޮތީ މަޖިލީހަށް ބިލެއް ވެސް ހުށަހަޅާފައެވެ. ޕީއެންސީގެ ވެސް ފުރިހަމަ ތާއީދާ އެކު، އޭރު އެ ބިލު މަޖިލީހުން ބަލައިގަނެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އަށް ފޮނުވީ ޖޫން 10 ގައެވެ.
އޭރު ސަރުކާރު މެންބަރުން ވެސް އެ ކަމަށް ތާއީދުކުރެއްވި ނަމަވެސް ކޮމިޓީގައި އެ ބިލުގެ މަސައްކަތް ކުރިއަށް ނުގޮސް، ގިނަ ދުވަސްވުމުން އާންމުންގެ ފާޑުކިޔުންތައް ވެސް އަމާޒުވިއެވެ.
އެ ބިލުގެ މަސައްކަތް އަވަސްކުރަން ގޮވާލައި އިދިކޮޅު އެމްޑީޕީން ގަރާރެއް ހުށަހެޅި ނަމަވެސް، ވެރިކަން ކުރާ ޕީއެންސީގެ އަޣުލަބިއްޔަތު އޮންނަ މަޖިލީހުން ގަރާރު ބޭރުކޮށްލީއެވެ. އެ ޕާޓީން ބުނެފައިވަނީ، ގަރާރު ބޭރުކޮށްލީ އެއީ ހެޔޮ ނިޔަތެއް ނެތި ހުށަހަޅައިފައިވާ ގަރާރަކަށް ވުމުން ކަމަށެވެ.
އެ ބިލުގެ މަސައްކަތް މިހާރު ކޮމިޓީގައި ކުރަމުން އަންނައިރު، ޕާސްޕޯޓް މަނާކުރުމާ ގުޅޭ ގޮތުން ޕީއެންސީގެ ރާގު ވަނީ ބަދަލުވެފައެވެ. އެގޮތުން ޕާސްޕޯޓު މަނާކުރަންވާނީ އެކަށިގެންވާ ތަފާސްހިސާބުތަކަށް ބެލުމަށް ފަހު، ފަތުރުވެރިކަމުގެ ސިނާއަތުގެ ބޭފުޅުންނާ މަޝްވަރާކުރުމަށް ފަހުގައި ކަމަށް މެންބަރުން ވަނީ ވިދާޅުވެފައެވެ.
ޕީއެންސީން ވަނީ އިޒްރޭލު ޕާސްޕޯޓު މަނާކުރުމުގެ މަސައްކަތް ނުހުއްޓޭނެ ކަމަށާއި އެ މަސައްކަތް ވީހާ ވެސް އަވަހަށް ނިންމާނެ ކަމަށް ވެސް ޕީއެންސީން ވަނީ ބުނެފައެވެ.
އައިސީސީން ވަނީ ނަތަންޔާހޫގެ އިތުރުން އިޒްރޭލުގެ ކުރީގެ ޑިފެންސް މިނިސްޓަރު ވެސް ހައްޔަރުކުރުމަށް އަމުރެއް ނެރެފައެވެ. އެ އަމުރުގައި ވަނީ ހައްޔަރުކުރަން އަމުރު ނެރެނީ އޮކްޓޯބަރު 8، 2023އާއި މިއަހަރުގެ މެއި މަހުގެ 20އާ ހަމައަށް ހިންގައިފައިވާ ހަނގުރާމައިގެ އާއި އިންސާނިއްޔަތާ ޚިލާފު ޖަރީމާތަކުގެ ތުހުމަތުގައި ކަމަަށެވެ.
އައިސީސީގެ މެންބަރު ގައުމުތަކުގެ އަދަދު 124އަށް އަރާއިރު، ހައްޔަރުކުރުމުގެ އަމުރު ރައްދުވާ ފަރާތަކު އޭގެތެރެއިން ގައުމަކަށް ޒިޔާރަތް ކުރުމުން އެ މީހަކު ހައްޔަރުކުރަން ލާޒިމުވާނެއެވެ. ނަމަވެސް އެފަދަ އަމުރުތައް ތަންފީޒު ކުރުމުގެ ބާރު އައިސީސީއަކަށް ނޯވެއެވެ.
އިޒްރޭލުން މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން ޣައްޒާއަށް ދެމުންދާ ހަމަލާތަކުގައި 17,000 ވުރެ ގިނަ ކުޑަކުދިން ހިމެނޭ ގޮތަށް 43,972 މީހުން ޝަހީދުކޮށްފައިވެއެވެ.