އިންޓަނޭޝަނަލް ރެސިޑެންސް އެންޑް ސިޓިޒަންޝިޕް އެޑްވައިޒަރީ ފާމް، ހެންލީ އެންޑް ޕާޓްނާސްއިންދޭ ގްލޯބަލް ސިޓިޒަން އެވޯޑު، ކުރީގެ ރައީސް މުހައްމަދު ނަޝީދަށް ލިބިވަޑައިގެންފިއެވެ.
މިއީ ގްލޯބަލް ސިޓިޒަންގެ 18ވަނަ އެވޯޑު ހަފުލާއެވެ. މި އެވޯޑު ހަފުލާ ބޭއްވީ، ސިންގަޕޫރުގައި އިއްޔެ ފެށި ގްލޯބަލް ސިޓިޒެންޝިޕް ކޮންފަރެންސް އިވެންޓުގައެވެ.
މިއީ އެކި ދާއިރާތަކުން ބައިނަލްއަގުވާމީ މައްސަލަތައް ހައްލު ކުރުމަށް ވަކާލާތުކޮށް، މުޖުތަމައު ކުރިއެރުވުމަށް މަސައްކަތް ކުރާ ފަރާތްތަކުގެ އަގު ވަޒަން ކުރުމުގެ ގޮތުން ދޭ އެވޯޑެކެވެ. އެ ގޮތުން ހެންލީ އެންޑް ޕާޓްނާސްއިންވަނީ އިންސާނީ ހައްގުތައް ހިމާޔަތްކުރުމަށާއި މޫސުމީ ބަދަލުތަކުން އަރައިގަތުމަށް ނަޝީދު ކުރައްވަމުން ގެންދަވާ މަސައްކަތް ފާހަގަ ކޮށްފައެވެ.
ރާއްޖޭގެ ފުރަތަމަ ޑިމޮކްރެޓިކް އިންތިޚާބު ކާމިޔާބު ކުރެއްވި ނަޝީދު މި ވަގުތު ހުންނެވީ ސިޔާސީ ކަންކަމާ ފެޔަށް ޖެހިވަޑައިގެން، ކްލައިމެޓް ވަލްނަރެބަލް ފޯރަމްގެ ސެކްރެޓަރީ ޖެނެރަލްގެ މަގާމުގައެވެ.
އެ މަނިކުފާނު ވަނީ ރާއްޖޭގެ ރައީސުލްޖުމްހޫރިއްޔާ ކަމުގެ އިތުރުން، ރައްޔިތުންގެ މަޖިލީހުގެ ރައީސްގެ މަގާމު ވެސް ފުރުއްވާފައިވެއެވެ.
އެ މަނިކުފާނުގެ މި ކާމިޔާބީއަށް ޑިމޮކްރެޓްސް ހިމެނޭހެން ގިނަ ބަޔަކު އަންނަނީ މަރުހަބާ ކިޔަމުންނެވެ.