އެމްޑީޕީއަކީ ދަރިއެއް ފަދަ ޕާޓީއެއް ކަމަށާއި ނަމަވެސް މި ވަގުތު އެއްވެސް ޕާޓީއެއްގައި އަމަލީ މަސައްކަތް ކުރައްވަން ގަސްތުނުކުރައްވާ ކަމަށް، އެ ޕާޓީގެ ރައީސް ކަމުގައި ހުންނެވުމަށް ފަހު ވަކިވެވަޑައިގަތް ކުރީގެ ރައީސް މުޙައްމަދު ނަޝީދު މިއަދު ވިދާޅުވެއްޖެއެވެ.
ނަޝީދު އެކްސްގައި ކުރެއްވި ޕޯސްޓެއްގައި އެމްޑީޕީއާއި ޑިމޮކްރެޓްސްއާ ގުޅޭ ގޮތުން ވާހަކަދެއްކެވީ، މީގެ ކުރިން އެމްޑީޕީގައި އިސް މަގާމުތަކުގައި ތިއްބެވުމަށްފަހު ދަ ޑިމޮކްރެޓްސް އުފެއްދުމަށް ވަކިވެވަޑައިގަތް މެންބަރުންތަކެއް އަލުން އެ ޕާޓީއަށް ވަޑައިގަތުމާ ގުޅިގެންނެވެ.
އޭގެ ތެރޭގައި ހިމެނެނީ އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒާއި، ކުރީގެ ޗެއާޕާސަން އަދި ފަހުން ޑިމޮކްރެޓްސްގެ ރައީސް ހަސަން ލަތީފް، ކުރީގެ ޕީޖީ ލީޑަރު އަލީ އާޒިމްގެ އިތުރުން ޕާޓީގެ ޕޮލިސީ ކޮމިޓީގެ ކުރީގެ މުގައްރިރު އަދި އެސްޓީއޯގެ ކުރީގެ އެމްޑީ، ހުސައިން އަމްރެވެ.
ނަޝީދު ވިދާޅުވީ، އެ މަނިކުފާނުގެ ހަޔާތުގެ ބޮޑު ބައެއް ހޭދަކުރެއްވީ ރާއްޖޭގައި ގިނަ ޕާޓީ އެކުލެވޭ ނިޒާމެއް ގާއިމުކުރުމުގެ މަސައްކަތުގައި ކަމަށާއި، ގައުމެއްގެ ތަރައްގީއަށާއި ރައްޔިތެއްގެ ތަނަވަސް ކަމަށް އެންމެ ބޭނުން އެއް ވަސީލަތަކީ ވާދަވެރި ސިޔާސީ ހަރަކާތް ކަމަށެވެ.
"ދެހާސް އަށެއްގެ އިންތިޚާބަށް ފަހުގައި ސަރުކާރުގެ އާމްދަނީ އިތުރުވެ ދިޔަ މިންވަރުން، އަދި އެ އާމްދަނީން ކުރެވުނު އުމްރާނީ މަސައްކަތާއި ރައްޔިތުންނަށް ހޯދައި ދެވުނު އިޖުތިމާއީ ރައްކާތެރިކަން ބުނެދެނީ ގިނަ ޕާޓީ އެކުލެވޭ ނިޒާމުގެ ފައިދާ،" އެ މަނިކުފާނު ވިދާޅުވިއެވެ.
އެމްޑީޕީ އުފެއްދުމުގައި ގިނަ މަސައްކަތްތަކެއް ކުރެއްވި ނަޝީދު ވިދާޅުވީ އެ މަނިކުފާނު އެއްވެސް ސިޔާސީ ޕާޓީއަކާ އިދިކޮޅު ވެވަޑައިނުގަންނަވާނެ ކަމަށާއި އެމްޑީޕީ ވެސް ވަރުގަދަވެ އޮތުން އެއީ އަބަދުވެސް އެދިވަޑައިގަންނަވާ ގޮތް ކަމަށެވެ. އަދި ފަހުން ނަޝީދު ގުޅިވަޑައިގަތް ދަ ޑިމޮކްރެޓްސްއަކީ ޚާއްސަ ގޮތެއްގައި ޒުވާނުންނަށް ސިޔާސީ މަސައްކަތުގައި ބައިވެރިވުމަށް ލިބުނު ފުރުސަތެއް ކަމަށް އެ މަނިކުފާނު ވިދާޅުވިއެވެ.
"މީގެއިން އެއްވެސް ޕާޓީއެއްގައި އަމަލީ މަސައްކަތް ކުރާކަށް މިވަގުތު އަޅުގަނޑު ނެތިން، އެހެން ނަމަވެސް ރާއްޖޭގެ ސިޔާސީ ހަރަކާތުން މުޅިން ދުރަށްދާކަށް ވެސް ނެތިން،" އެ ޕޯސްޓުގައިވެއެވެ.
ނަޝީދު އެމްޑީޕީން ވަކިވެވަޑައިގަތީ، 2023 ވަނަ އަހަރު އޮތް ރިޔާސީ އިންތިޚާބާ ދިމާކޮށް އެ ޕާޓީގައި އެ މަނިކުފާނަށް ތާއިދުކުރާ ފެކްޝަނަކާއި ޞާލިޙަށް ތާއިދު ކުރާ ފެކްޝަނެއް އުފެދި ބައިބައިވި ފަހުންނެވެ. އެގޮތުން ރިޔާސީ ޕްރައިމަރީގައި އެ ދެ ބޭފުޅުން ވާދަކުރައްވައި ނަޝީދު ނާކާމިޔާބުވުމުން އެ މަނިކުފާނާއި އެ މަނިކުފާނަށް ތާއިދުކުރައްވާ މެންބަރުން ސަރުކާރަށް ވަރަށް ބޮޑަށް ފާޑުކިޔައި ތުހުމަތުތައް ކުރިއެވެ.
އެއަށްފަހު ނަޝީދަށް ތާއިދުކުރައްވާ މެންބަރުން އެމްޑީޕީން ވަކިވެވަޑައިގެން ޑިމޮކްރެޓްސް އުފެއްދެވީއެވެ. އަދި އެމްޑީޕީގައި ހުންނެވުމަކީ އެންމެ ރަނގަޅު ގޮތް ކަމަށް ގަބޫލުނުކުރެއްވޭ ކަމަށް ވިދާޅުވެ، ޖޫން 21، 2023ގައި އެ މަނިކުފާނު ޕާޓީން ވަކިވެވަޑައިގަތެވެ.
އެއަށްފަހު ދަ ޑިމޮކްރެޓްސްއިން ރިޔާސީ އިންތިޚާބުގައި ވާދަކުރުމުން ލިބުނީ ހަތް ޕަސެންޓް ވޯޓެވެ. އަދި ދެވަނަ ބުރުގައި އެމްޑީޕީއަށް ތާއިދު ކުރަން އެ ޕާޓީން ދެކޮޅުހެދިއެވެ.
އޭގެ ފަހުން ޑިސެމްބަރު 2023ގައި ނަޝީދުވަނީ، ރާއްޖެއާއި އެހެން 11 ގައުމަކުން އުފެއްދި ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްކަން ކުރައްވަން އެއްބަސްވެވައިޑެން، އަހަރުތަކަކަށް ސިޔާސީ މަސައްކަތުން ދުރަށް ޖެހިވަޑައިގަންނަވާން ނިންމެވިކަން އިއުލާންކުރައްވައިފައެވެ.